Jope 25 - Ai Vola Tabu (Vakadewa Makawa Vakavoutaki 2021)（FRV21）

Sa Vosa ko Vilitati: E Rawa Vakacava Vua na Tamata me Yalododonu e na Mata ni Kalou?

1Sa qai vosa ko Vilitati na luve i Sua, ka kaya:

2“Na lewa kei na ka vakurabui sa tu vua na Kalou;

sa vakayacora ko koya na tiko sautu e nona vanua cecere.

3Sa wiliki rawa li na nona mataivalu?

Ia ko cei li sa sega ni cadra vua na nona rarama?

4Ena qai dodonu rawa vakaevei na tamata vua na Kalou?

Ena savasava rawa vakaevei ko koya sa sucu mai vua na yalewa?

5Raica, ni kevaka sa sega ni serau mai na vula,

ka sa sega ni savasava e matana na kalokalo,

6ena qai vakaevei na lailai sobu ni tamata, ni sa manumanu somidi walega,

kei na luve ni tamata, ni sa baca-ni-qele walega!”