2 Samuela 2 - Ai Vola Tabu (Vakadewa Makawa Vakavoutaki 2021)（FRV21）

Sa Buli ko Tevita me Tui Juta

1Ia sa oti na ka oqo, sa qai tarogi Jiova ko Tevita, ka kaya, “Me'u lako cake ki na dua na koro ni Juta, se me'u kakua?” A sa kaya vua ko Jiova, “Mo lako cake.” A sa kaya ko Tevita, “Me'u lako cake kivei?” A sa kaya ko koya, “Ki Epironi.”

21Samu 25.42,43A ratou sa qai lako cake kina ko Tevita, kei rau talega na watina, ko Eiinoami na yalewa ni Jesireli, kei Apikali na yalewa ni Kameli na wati Nepali.

3A sa kauti ira cake na nona tamata era tiko vata kaya ko Tevita, na tamata yadua kei na nona lewe-ni-vuvale, ka ra sa tiko e na veikoro ki Epironi.

41Samu 31.11-13A ra sa lako mai na Juta, ka ra sa lumuti Tevita mai kea me nodra tui na Juta.

Ni ra sa tukuna vakaoqo vei Tevita, “Sai ira na kai Jepesi-kiliati era sa buluti Saula,”

5a sa talaka eso na tamata ko Tevita vei ira na kai Jepesi-kiliati, ka kaya vei ira, “Me vakalougatataki kemudou ko Jiova, ni dou a cakava na ka vinaka oqo vua na nomudou turaga, io, vei Saula, ni dou a buluti koya!

6Ia me qai cakava na ka vinaka vei kemudou ko Jiova, kei na ka dina! Ia koi au talega, ka'u na sauma vei kemudou na ka vinaka oqo, ni dou a cakava na ka oqo.

7Ia oqo, me kaukauwa na ligamudou, ka mo dou qaqa, ni sa mate tu ko Saula na nomudou turaga, ka ra sa lumuti au me'u nodra tui na Juta.”

Sa Buli ko Isiposeci me Tui Isireli

8Ia ko Epineri na luve i Neri, na kavetani ni valu i Saula, sa kauti Isi-poseci na luve i Saula, ka kauti koya mai ki Meeneimi,

9ka buli koya me nodra tui na Kiliati, kei na Asuri, kei na kai Jesireli, kei na Ifereimi, kei na Penijamini, kei ira kecega na Isireli.

10(Sa vasagavulu na nona yabaki ko Isi-poseci na luve i Saula ni sa buli me nodra tui na Isireli, a sa tui tiko ka yabaki rua). Ia na Juta ga era sa muri Tevita.

11Ia na kena dede sa tui kina mai Epironi ko Tevita vei ira na Juta, sa vitu na yabaki ka ono na vula.

Rau Veivaluvaluti ko Isireli kei Juta

12A sa lako tani mai Meeneimi ki Kipioni ko Epineri na luve i Neri, kei ira na tamata i Isi-poseci na luve i Saula.

13A sa lako yani ko Joape na luve i Seruwaia kei ira na tamata i Tevita, a ra sa la'ki veitavaki kei ira mai na mata-ni-wai ki Kipioni, a ra sa tiko ko ira oqo e na yasa ni mata-ni-wai oqo, kei ira oqori e na yasa ni mata-ni-wai ko ya.

14A sa kaya vei Joape ko Epineri, “Me ra ia mada na cauravou, ka qito e matada.” Ka sa kaya ko Joape, “Me ra ia ga.”

15A ratou sa ia, ka lako e lewe tinikarua na kedrai wiliwili vei ira na Penijamini, era sa nei Isi-poseci na luve i Saula, kei na lewe tinikarua talega na tamata i Tevita.

16A ra sa dui taura yadua na uluna na nona i sa, ka cokavaka na nona i seleiwau ki na sarisarina; a ra sa bale sobu vata. A sa vakatokai kina na tikina ko ya ko Elakaca-asurimi (Na yasa ni veiseleiwau), ko ya mai Kipioni.

17A sa rui katakata nai valu, e na siga ko ya; a sa gu ca ko Epineri, kei ira na Isireli, ka gumatua ko ira na nona tamata ko Tevita.

18A ratou sa tiko mai kea na luve i Seruwaia tolutolu, ko Joape, kei Apisai, kei Asaeli. Ia sa yava totolo ko Asaeli me vaka e dua na me ni veikau.

19A sa cicimuri Epineri ko Asaeli; ia ni sa lako tu sa sega ni gole tani ki nai matau se ki nai mawi ni sa muri Epineri.

20A sa rai ki muri ko Epineri, ka kaya, “O iko ko Asaeli, se segai?” A sa kaya ko koya, “Koi au oqo.”

21A sa kaya vua ko Epineri, “Mo lako tani ki nai matau se ki nai mawi, ka taura e dua vei ira na cauravou, ka kauta yani na nona i toki-ni-valu.” A sa bese ni gole tani mai vua ko Asaeli.

22A sa kaya tale vei Asaeli ko Epineri, “Mo lako tani ka kakua ni muri au. A cava me'u mokuti iko kina ki na qele? Au na qai ta cake vakaevei vua na tuakamu ko Joape?”

23Ia sa bese ga ni gole tani ko koya. Sa qai cokai koya kina e ketena ko Epineri e na dia ni moto, ka sa basika sara ki muri na moto. A sa bale sobu mai kea, ka mate kina. Ia sa tu vakadua ko ira kecega era yaco ki na tikina sa bale mate kina ko Asaeli.

24A sa muri Epineri ko Joape kei Apisai. A sa dromu na mata-ni-siga ni ra sa yacova na vanua-cecere mai Ama, ko ya sa donui Kia, e na sala e na vanua lala ki Kipioni.

25A ra sa soqoni vata na luve i Penijamini ka muri Epineri, a ra sa yaco me dua ga na mataivalu, ka ra sa tu e dela ni dua na vanua-cecere.

26A sa kaci vei Joape ko Epineri, ka kaya, “Me kana tiko li nai seleiwau, ka tawa mudu? O sa sega beka ni kila ni na ka gaga na kenai vakataotioti? A cava na kena dede, mo sega ni kaya kina vei ira na tamata me ra lesu yani, me ra kakua ni muri ira tiko na wekadra?”

27A sa kaya ko Joape, “Me vaka sa bula na Kalou, kevaka ko a sega ni vosa, era sa lesu tale vakaidina e na mataka ko ira na tamata, me ra kakua ni muria na wekana ko ira yadua.”

28A sa uvuca na davui ko Joape, ka ra sa tu vakadua na tamata kecega, ka sega ni muri ira tiko na Isireli, ka sega tale ni kitaka nai valu.

29A sa lako yani e na buca ko Epineri kei ira na nona tamata e na bogi ko ya ka siga, ka qalo kosova na Joritani, ka lako yani e lomai Picironi taucoko, ka basika yani ki Meeneimi.

30A sa lesu mai ko Joape me kakua ni muri Epineri. Ia ni sa vakasoqoni ira vata kecega na tamata ko koya, sa yali vei ira e le tinikaciwa na tamata i Tevita, kei Asaeli.

31Ia ko ira na tamata i Tevita era sa mokuta mate vei ira na Penijamini, kei ira na tamata i Epineri, e le tolu na drau ka onosagavulu.

32A ra sa kauti Asaeli, ka buluti koya e nai bulubulu i tamana, mai Peceliema. A sa lako tu ko Joape kei ira na nona tamata e na bogi ko ya, a sa kida na mataka vei ira mai Epironi.