Jope 30 - Ai Vola Tabu (Vakadewa Makawa Vakavoutaki 2021)（FRV21）

1“Ia oqo era sa vakalialiai au,

ko ira era gone vei au,

ko ira ka'u a sega ni nanuma na tamadra

me yaga ni wili vata kei na koli ni noqu qele ni sipi.

2A cava beka ka'u na rawata mai na kaukauwa ni ligadra?

Na nodra kaukauwa kece sa yali ka ra sa malumalumu.

3E na vuku ni viakana kei na dausiga

era sa barilaka kina na veitikina lala ka mamaca,

4era drutia na co gaga mai veikau,

kei na waka ni junipa me kedra.

5Era vakasavi tani mai vei ira na tamata;

era kailavaki ira me vaka era daubutako.

6Sa dau nodra i tikotiko na veiqakilo rerevaki,

e na qara e loma ni qele kei na veivatu.

7Era sa tagi e loma ni veikau lalai;

era soqoni vata e ruku ni kau votovotoa.

8Era sa luve ni lialia, ai lawalawa sa sega ni vakayacani,

ka ra sa vakasavi tani mai na vanua.

9“Era sa veiwalitaki au oqo e na sere;

io, era sa cavuti au me'u ka lialia.

10Era vakasisilataki au, era dro vakayawa vei au;

ka ra sa sega ni rere ni kasivita na mataqu.

11Ni sa sereka na Kalou na wa ni noqu dakaititi ka vakayalomalumalumutaki au,

era sa biuta nai tatarovi e mataqu.

12Era sa tucake na cauravou e na ligaqu i matau;

era biliraka na yavaqu,

ka tara cake na nodra sala dauveivakarusai me'u ca.

13Era vakacacana na noqu sala,

era vinakata na noqu rarawa,

ka sa sega e dua sa vukei ira.

14Era sa yaco mai me vaka ni sa bote nai bono;

ni sa ia na veivakarusai era sa luvuci au mai.

15Sa vakalesui mai vei au na ka rerevaki;

sa ra vakaciciva na ka au sa dokai kina me vaka na cagi,

ka sa seavu na noqu tiko vinaka me vaka na o.

16“Ia oqo sa qai sova yani na yaloqu e lomaqu;

sa kani au na veisiga rarawa.

17Sa daucoka na sui ni yagoqu na bogi,

ka sa sega ni cegu rawa na mosi sa kani au.

18E nai tovo voravora sa taura vakaukauwa kina na noqu i sulu;

sa muloraki au me vaka na domo ni noqu i sulu.

19Sa biuti au ko koya ki na lolobo,

ka'u sa qai vaka na kuvu-ni-soso kei na dravusa.

20Au sa tagi vei kemuni, ia ko ni sa sega ni rogoci au;

au sa tucake, ia ko ni sa sega ni via kilai au.

21Ko ni sa vuki me yalovakatani vei au;

ko ni sa vorati au e na ligamuni kaukauwa.

22Ko ni sa laveti au cake e na cagi, ko ni sa kitaka me'u vodo kina,

ka ko ni sa kolotaki au vaka ka vaka e na liwa ni cagilaba.

23Ka'u sa kila ni ko ni na kauti au ki na mate

kei na vale sa lesi me nodra kecega era bula tiko.

24“E dina sara ni sega ni dauvuki e dua me dodoka na ligana ki vua sa vakaleqai,

ka ra sa dautagica ga na veivuke ni sa ia na veivakarusai.

25Au a sega li ni tagi e na vuku i koya ka rarawa?

A sega li ni bibi na yaloqu e na vukudra na dravudravua?

26Ia e na gauna ka'u nuitaka kina na ka vinaka, sa qai yaco ga na ka ca;

ka gauna au waraka kina na rarama, sa qai yaco ga na butobuto.

27Sa rise na ketequ, ka sega ni vakacegu;

sa yacovi au na veisiga rarawa.

28Au sa tagi voli ga, ka sa sega ni cilavi au na siga;

au sa tucake e na loma ni soqoni ka'u sa tagica na veivuke.

29Au sa tacidra na jakeli

kei na nodra i tokani na ositeriji.

30Sa loaloa na kuli ni yagoqu,

ka sa kama na suiqu e na katakata.

31Sa vukici talega na noqu api me ka ni tagiyaso,

kei na noqu kove me domo ni dautagi.