1E na gauna ko ya sa tauvi mate ko Apaija na luve i Jeropoama.
2A sa kaya ko Jeropoama vua na watina, “Mo tucake mada, ka liayalewa tani, mo kakua ni kilai kina ni ko sa wati Jeropoama, ka lako ki Sailo. Raica, sa tiko mai kea ko Eaija na parofita, o koya ka tukuna vei au ni'u na nodra tui na tamata oqo.
3Ia mo kauta vata kei iko e tini nai buli madrai, ka so na keke, ka dua na tavaya oni, ka lako vua. Ena tukuna vei iko ko koya na ka ena yaco vua na gone.”
4A sa kitaka vakakina na wati Jeropoama, ka cavu tu, ka lako ki Sailo, ka lako ki na vale i Eaija. Ia sa sega ni rai rawa ko Eaija, ni sa buawa na matana ni sa qase sara.
5A sa kaya vei Eaija ko Jiova, “Raica, sa lako tiko mai na wati Jeropoama me taroga vei iko se na vakaevei na luvena; ni sa tauvi mate ko koya. Mo qai vosa vua me vaka ka vaka.”
Ni sa curu yani ko koya, a sa vakalecaleca me vaka e duatani tale na yalewa.
6Ia ni sa rogoca na vadugu ni yavana ko Eaija, ni sa curu mai ko koya e katuba, sa kaya, “Mo curu mai, na wati Jeropoama. A cava ko sa liayalewa tani kina? Ni sai tukutuku bibi ka'u sa talai kina vei iko.
7Mo lako, mo kaya vei Jeropoama, ‘Sa vosa vakaoqo ko Jiova na nodra Kalou na Isireli: Ni ka'u a vakalevui iko cake mai vei ira na tamata, ka lesi iko mo tui vei ira na noqu tamata na Isireli,
8ka kaliraka na matanitu mai na vale i Tevita, ka solia vei iko; ia ko sa sega ga ni vakataki Tevita na noqu tamata, o koya ka vakabauta na noqu i vakaro, ka muri au e na yalona taucoko, me cakava ga na ka e dodonu vei au,
9ka ko sa ia nai valavala ca sa uasivia na nodra i valavala ca kecega era a bula eliu vei iko, ni ko sa la'ki cakava eso na nomu kalou tani, kei na matakau eso sa vakawaicalataki, ka me vakacudrui au, ka sa biuti au ki dakumu;
101Tui 15.29o koya oqo, ka'u na vakayacora kina na ca ki na vale i Jeropoama, ka muduka laivi vei Jeropoama na tagane kecega, io ko koya sa sogolati, kei koya sa lako voli, e Isireli, ia ka'u na taviraka tani na vo ni vuvale i Jeropoama, me vaka sa taviraka tani na de-ni-manumanu na tamata, ka me oti kece sara.
11O koya sa mate vei Jeropoama e na koro, ena kania na koli; kei koya sa mate e na were, ena kania na manumanu vuka, ni sa tukuna ko Jiova.’
12Ia ko iko, mo ia, mo lako ki na nomu vale. Ia ni sa curu ki na koro na yavamu, ena ciba na gone.
13A ra na tagicaki koya ko ira kecega na Isireli, ka buluta; ni na yaco ki nai bulubulu ko koya duaduaga mai vei Jeropoama, ni sa kune vua na ka vinaka vei Jiova, na nodra Kalou na Isireli, e na vale i Jeropoama.
14Ia ena vakatubura ko Jiova e dua na tui vei ira na Isireli, o koya ena muduka laivi na vuvale i Jeropoama e na siga oqo, ka sa kena gauna oqo.
15“Ia ena yaviti ira na Isireli ko Jiova, me vaka sa vakayavalati na gasau e na wai; ka na cavuivuvutaki ira na Isireli mai na vanua vinaka oqo, ka solia ko koya vei ira na nodra qase eliu, ka na duibiubiuti ira ki tai kadua ni Uciwai, ni ra sa cakava na nodra veikalou-yalewa ni veikau, ka vakacudrui Jiova.
16Ia ena biuti ira tani na Isireli e na vuku ni valavala ca sa kitaka ko Jeropoama, ka ni sa vakaivalavalacataki ira kina na Isireli.”
17A sa ia na wati Jeropoama, ka lesu yani, ka yaco ki Tirisa. Ia ni sa yaco ko koya ki nai lago ni katuba, sa ciba na gone.
18A ra sa buluta, ka ra sa tagicaka ko ira kecega na Isireli, me vaka na vosa i Jiova, ka cavuta ko koya e na gusu ni nona tamata ko Eaija na parofita.
Na Mate i Jeropoama19Ia na vo ni cakacaka i Jeropoama, na nonai valu, kei na nona lewa, raica, sa volai e nai Vola ni Veika sa Caka e na Nodra Gauna na Tui Isireli.
20Ia na gauna sa lewa kina ko Jeropoama sa ruasagavulu ka rua na yabaki. A sa moce vata kei ira na nona qase, a sa tui ko Netapi na luvena, me kenai sosomi.
Ko Reopoama na Tui Juta(2 Veigauna 11.5—12.15)21A sa tui mai Juta ko Reopoama na luve i Solomoni. Sa vasagavulu ka dua na yabaki i Reopoama ni sa buli me tui, a sa tinikavitu na yabaki sa lewa kina ko koya mai Jerusalemi, na koro ka digitaka ko Jiova mai na nodra veiyavusa kecega na Isireli, me vakatikora kina na yacana. Ia na yaca i tinana ko Neema, na yalewa ni Amoni.
22A ra sa daucaka ca ko ira na Juta e na mata i Jiova; a ra sa vakavuvutaki koya vakalevu e na nodra i valavala ca era sa cakava, ka vakalailai ko ira kece na nodra qase.
232Tui 17.9,10Ni ra sa tara talega na nodra veitikina cecere, kei na veimatakau, kei na veikau lalai eso, e na veiulu-ni-koro cecere kecega, kei na ruku ni kau bulabula kecega;
24Vrua 23.17ka sa so na tamata talega e na vanua era sai valavala vaka-Sotoma. Era sa vakayacora na veika vakasisila kecega ni veimatanitu ka sa vakaseva tani ko Jiova e matadra na Isireli.
25 2Vei 12.2-8 A sa yaco e na kenai kalima ni yabaki i Reopoama na tui, sa la'ki vala ki Jerusalemi ko Sisaki na tui Ijipita.
261Tui 10.16,17; 2Vei 9.15,16A sa kauta tani nai yau mai na vale i Jiova kei nai yau mai na nona vale na tui; sa kauta kece yani. A sa kauta talega nai sasabai koula kecega ka cakava ko Solomoni.
27A sa cakava ko Reopoama na tui eso nai sasabai parasa me kedrai sosomi, ka solia kivei ira na turaga-ni-valu i vakatawa, ko ira sa vakatawa mai na katuba ni nona vale na tui.
28Ia ni sa la'ki curu na tui ki na vale i Jiova, sa qai kauta oqori ko ira nai vakatawa, a sa qai vakasuka ki na nodra vale nai vakatawa.
29Ia na vo ni cakacaka i Reopoama, kei na ka kecega sa cakava ko koya, sa sega li ni volai e nai Vola ni Veika sa Caka e na Nodra Gauna na Tui Juta?
30A rau sa veivaluti tiko ko Reopoama kei Jeropoama e na nodrau gauna kecega.
31A sa moce vata kei ira na nona qase ko Reopoama, a sa bulu vata kei ira na nona qase e na koro i Tevita. Ia na yaca i tinana ko Neema, na yalewa ni Amoni. A sa tui ko Epaijami na luvena, me kena i sosomi.
Who We AreWhat We EelieveWhat We Do
2025 by iamachristian.org,Inc All rights reserved.
