Aisea 14 - Ai Vola Tabu (Vakadewa Makawa Vakavoutaki 2021)（FRV21）

Na Vakalesui ni Bula e Juta ni Oti na Tiko Vakabobula

1Ni na lomani ira na Jekope ko Jiova, ka digitaki ira tale na Isireli, ka vakalesui ira ki na nodra vanua; ia ko ira na kai tani era na la'ki to vata kei ira, ka kabita na vale i Jekope.

2Ko ira na lewe-ni-vanua era na kauti ira ki na nodra yasana, ia na vale i Isireli ena tauri ira e na vanua i Jiova me nodra tamata kei na nodra yada. Ia na tamata era vakabobulataki ira eliu era na qai tauri me nodra bobula, ka ra na lewai ira era a vakasaurarataki kina.

Na Leqa nei Tui Papiloni

3Ia ena yaco e na siga sa vakacegui iko kina ko Jiova mai na nomu rarawa, kei na nomu rere, kei na oca dredre ka lavaki vei iko,

4ko na qai taurivaka nai bole oqo kei na tui Papiloni, ka kaya.

“Sa qai mudu ko koya ka ia na dauveivakasaurarataki!

Na kena sa muduki na nona veivakalolomataki!

5Sa musuka ko Jiova na nodra laciu na tamata ca,

na nodra i titoko na mataveilewai.

6Ko koya ka dauyaviti ira na veimataqali

e na yalo ca ni sa ia tiko na veiyaviyaviti,

Ko koya ka daulewa na veimatanitu e na cudru,

sa qai cudruvi ka sega e dua e tarova.

7Sa qai cegu, ka vinaka mai ko vuravura taucoko;

era sa ia mada na sere.

8Io, na damanu sa reki e na vukumu,

kei na sitari ni Lepanoni, ka sa kaya,

‘Ni ko sa qai koto no,

sa sega ni cabe mai e dua na dauta kau me vakacaca kivei keimami.’

9Ko bulubulu era sa yavala

me mani tavaki iko ni ko sa lako yani kina;

Sa vakayadrati ira na yalo ni qaqa e na vukumu,

ko ira kecega era turaga ni vuravura;

Sa vakaduri ira kecega na tui ni veimatanitu

mai na nodra i tikotiko.

10Era na vosa kecega

ka kaya vei iko,

‘Ko iko talega ko sa malumalumu mai me vakataki keimami!

Ko sa tautauvata kei keimami?’

11Sa biu sobu ki nai bulubulu na nomu lagilagi,

kei na domo ni nomu api;

Sa tevu e rukumu na baca,

ka sa nomu i tutuvi na baca.

12 Vtaki 8.10; 9.1 “Isa na nomu lutu mai lomalagi,

ko iko Lusefa (na kalokalo i volasiga), na luve ni Kida-ni-mataka!

E vakacava na nomu tamusuki sobu ki na qele,

ko iko ka dauvakasaurarataka na veimatanitu!

13 Maciu 11.23; Luke 10.15 Io ko a kaya e lomamu,

‘Ka'u na cabe ki lomalagi,

ka'u na vakaceceretaka na noqu i tikotiko

me cecere ka lolovira na veikalokalo ni Kalou;

ka'u na tiko talega mai na dela ni ulunivanua ni soqoni,

e na tikina ki na vualiku;

14ka'u na cabe ki na yasana ki cake me no ki ra na o,

ka'u na cakava me'u tautauvata kei Koya sa Cecere Sara.’

15Ia ko na biu sobu ga ki Etesi,

ki na boto ni qara ni bulubulu.

16Ko ira era raici iko era na dikevi iko,

era na vakananumi iko, ka kaya,

‘Oqo li na tamata ka sautaninini kina ko vuravura,

ka vakayavalata na veimatanitu,

17ka cakava na vuravura me vaka na vanua dravuisiga,

ka dauvakarusa na kena veikoro,

ka sega ni vakasukai ira tale na nona bobula ki nodratou?’

18Ko ira kece na tui ni veimatanitu, ko ira kecekecega,

era dui koto yadua vakaiukuuku e na nona vale;

19ia ko iko ko sa biu tani mai na nomu i bulubulu,

me vaka na tabanikau sa vakasisilataki,

ka vakaisulu kei ira na mate, o ira era lausua e nai seleiwau,

ka lako sobu ki na veivatu ni bulubulu,

me vaka na yago ni mate sa butubutuki.

20Ko na sega ni bulu vata kei ira,

ni ko sa vakacacana na nomu vanua,

ka vakamatei ira na nomu tamata.

“Era na sega sara ni rogo

na nodra kawa nai valavala ca!

21Dou vakarau ki na nodra veivakamatei na luvena

e na vuku ni valavala ca ni nodra qase;

Me ra kakua ni tucake me taukena na vanua,

ka vakarobota na dela i vuravura e na koro.”

Na Kalou ena Vakarusai Papiloni

22“Ni'u na tucake vei ira,” sa kaya ko Jiova-ni-lewevuqa, “ka muduka tani mai Papiloni na yacadra, kei na kedra vo, kei na luvedra tagane, kei na nodra kawa,” sa kaya ko Jiova.

23“Ka'u na cakava na vanua me nodra i tikotiko na belo, me vanua dranodrano, ia ka'u na taviraka laivi e nai taviraki e dauveivakarusai,” sa kaya ko Jiova-ni-lewevuqa.

Na Kalou e na Vakarusai Ira na Kai Asiria

24 Aisea 10.5-34; Neumi 1.1—3.19; Sefa 2.13-15 Sa bubului ko Jiova-ni-lewevuqa, ka kaya,

“Me vaka dina na ka ka'u sa nanuma,

ena yaco vakakina;

ka me vaka na ka ka'u sa nakita,

ena tu ga vakakina,

25me'u musuki koya na kai Asiria e na noqu vanua,

ka buturaki koya e na noqu ulunivanua;

ia na nona i vua ena qai biu tani vei ira,

kei na nona i kaukau ena kau tani mai na domodra.”

26Oqo na kenai naki

e na vuku i vuravura taucoko;

ia oqo na liga sa dodo yani

ki na veimatanitu kecega.

27Ni sa nakita ga ko Jiova-ni-lewevuqa,

ia ko cei me vakadaroya?

Ka sa dodo yani na ligana,

ia ko cei me na vakasuka lesu?

Na Kalou e na Vakarusai Ira na Kai Filisitia

28 2Tui 16.20; 2Vei 28.27 E na yabaki ka mate kina ko Easi na tui,

sa qai kilai na vosa ni parofisai bibi oqo.

29 Jere 47.1-7; Isi 25.15-17; Joeli 3.4-8; Emo 1.6-8; Sefa 2.4-7; Saka 9.5-7 Mo kakua ni reki, i Filisitia taucoko,

ni sa qai ramusu nai titoko i koya ka yaviti iko,

ni na tubu mai na vu ni gata na gata katakata,

ia na vuana ena gata vakabukawaqa sa vuka.

30Ena qai kana ko ira na nodra ulumatua na dravudravua,

ka ra na koto sobu vakavinaka na luveniyali;

ia ka'u na vakamatea na wakamu e na dausiga,

ia na kemu vo ena vakamatei.

31Mo tagi, na matamata-ni-koro; mo qoqolou, na koro;

ko iko, Filisitia taucoko, ko sa waicala e na rere!

Ni na lako mai na vualiku na kubou,

ka na sega e dua me tiko tani e na gauna sa lokuci.

32Ia na vosa cava me qai tau vei ira na mata ni veivanua?

“Ni sa tauyavutaki Saioni ko Jiova,

ka ra na dro kina ko ira na nona tamata era vakararawataki.”