Same 12 - Ai Vola Tabu (Vakadewa Makawa Vakavoutaki 2021)（FRV21）

A Masu ni Kere Veivuke Vua nai liuliu ni sere: me baleta na Seminica. A Same i Tevita.

1I Jiova, mo ni ia na veivakabulai, ni sa oti na tamata lotu dina;

sa yali ko ira sa lomadina mai vei ira na luve ni tamata.

2Era sa cavuta tiko ko ira yadua na ka lasu vua na nona i tokani;

era sa vosa vakaveicavilaki tiko ka ra dauveivakaisini.

3Ena seledrutia ko Jiova na tebenigusudra na dauveicavilaki,

kei na yamedra na dauvosa vakaviavialevu,

4o ira era sa kaya, “Keitou na gumatua e na yame i keitou;

sa neitou ga na tebenigusu i keitou—o koya na neitou turaga?”

5“Ni ra sa vakararawataki na tamata malumalumu,

ka ni ra sa vutugu tiko na tamata dravudravua,

Au na qai tucake,” sa kaya ko Jiova;

“Au na vakabulai ira yadua mai vei koya sa dauvakalialiai ira.”

6A vosa savasava na vosa i Jiova,

me vaka na siliva sa vakatovolei e na kuro qele,

sa vakasavasavataki vakavitu.

7I Jiova, ko ni na maroroi ira,

kemuni na maroroi ira e nai tabatamata oqo ka sega ni mudu.

8Era sa daulako voli e na veiyasana kecega na tamata ca,

ni ra sa vakalevulevui na tamata velavela sara.