Same 31 - Ai Vola Tabu (Vakadewa Makawa Vakavoutaki 2021)（FRV21）

Na Masu ni Tamata e Vakararavi Vua na Kalou Vua nai liuliu ni sere. A Same i Tevita.

1I Jiova, ka'u sa vakararavi vei kemuni,

ni kakua ni laivi au me'u madua;

ni vakabulai au e na nomuni yalododonu.

2Ni vakala na daligamuni vei au;

mo ni vakabulai au kusarawa.

Mo ni noqu uluvatu kaukauwa,

na noqu i drodro me'u vakabulai kina.

3Kemuni sa noqu uluvatu kei na noqu i drodro;

ia mo ni tuberi au, ka liutaki au, e na vuku ni yacamuni,

4ni kaliraki au mai na lawa era sa kitaka vuni vei au;

ni sai kemuni ga na noqu kaukauwa.

5 Luke 23.46 Au sa solia na yaloqu ki na ligamuni;

o ni a vakabulai au, Jiova, na Kalou daudina.

6Au sa cati ira era sa nanuma na ka lasu wale,

ia koi au, ka'u sa vakararavi vei Jiova.

7Au na reki ka marau e na nomuni yalololoma,

kemuni sa vakananuma na noqu rarawa;

kemuni a kila na kena veivakararawataki ni yaloqu;

8ka sa sega ni sogolati au e na liga ni meca;

ko ni sa tea na yavaqu e na vanua rabailevu.

9Ni lomani au, Jiova, ni'u sa rarawa;

sa buawa na mataqu e na tagi,

ka sa ca na yaloqu kei na yagoqu.

10Ni sa takali na noqu bula e na rarawa,

kei na noqu veiyabaki e na vutugu;

sa oti na noqu kaukauwa e na vuku ni noqu caka cala,

a sa vuca na suiqu.

11Au sa rogo ca vei ira kece na noqu meca,

ka vakalevu vei ira na kai noqu,

a ra sa rerevaki au ko ira keitou sa veikilai;

o ira era kunei au e tautuba era sa dro tani vei au.

12Au sa guileca me vaka na mate sa sega ni nanumi;

ka'u sa vaka na bilo sa kavoro.

13Ni'u sa rogoca na nodra vosa ca na lewe vuqa—

sa vakavolivoliti au na ka rerevaki!—

ni ra sa bosei au me'u ca,

ni ra sa bukiveretaka me ra kauta tani na noqu bula.

14Ia ka'u a vakararavi vei kemuni, Jiova;

ka'u a kaya, “Sai kemuni ga na noqu Kalou.”

15Sa tu e na ligamuni na noqu gauna;

ni vakabulai au mai na ligadra na noqu meca, mai vei ira talega era sa vakacacani au.

16Me cilava na nomuni tamata na matamuni;

ni vakabulai au e na vuku ni nomuni loloma.

17I Jiova, kakua ni laivi au me'u madua,

ni'u sa masu vei kemuni;

me ra madua na tamata i valavala ca,

me ra galu ga e nai bulubulu.

18Me vagalui na tebenigusu daulasu

era sa vosalevutaka na tamata yalododonu

e na viavialevu kei na veivakalialiai.

19A ka vakaidina na nomuni loloma

ko ni sa maroroya me nodra era sa rerevaki kemuni,

ko ni sa vakarautaka me nodra era vakararavi vei kemuni,

e matadra na luve ni tamata!

20O ni na vunitaki ira e na yasana vuni e matamuni

mai na nodra vere na tamata;

o ni na vunitaki ira tiko e na nomuni vale tabu

mai na veileti ni yamedra.

21Me vakavinavinakataki ko Jiova,

ni sa vakatakila vei au na nona loloma vakaidina

e na koro kaukauwa.

22Ia koi au ka'u a kaya ni'u sa kidroa,

“Au sa muduki tani mai na matamuni.”

Ia ko ni sa rogoca ga na domo ni noqu masu

ni'u sa tagi vei kemuni.

23Dou lomani Jiova, koi kemudou kecega na nona tamata yalosavasava.

Ni sa maroroi ira era sa lomadina ko Jiova,

ka sa cudruvi ira vakalevu era daucakacaka vakaviavialevu.

24Dou gumatua, ena qai vakaukauwataka na yalomudou ko koya,

oi kemudou kecega sa nuitaki Jiova.