Roma 13 - Ai Vola Tabu (Vakadewa Makawa Vakavoutaki 2021)（FRV21）

Na Noda i Tavi Vei Ira na Veiliutaki

1Me ra talairawarawa vei ira na veiliutaki ko ira na tamata kecega. Ni sa sega na kaukauwa ni lewa sa tubu wale, mai vua ga na Kalou, kei ira era sa veiliutaki, sa lesi ira na Kalou.

2Ia ko koya sa vorati ira na veiliutaki, sa vorata nai lesilesi ni Kalou, ka na cudruvi ko ira era sa vorata.

3Ko ira na veiliutaki era sa sega ni vu ni rere vei ira sa caka vinaka, vei ira ga sa caka ca. O sa qai gadreva li mo sega ni rerevaka koya sa veiliutaki? Mo kitaka na ka e vinaka, ena qai dokai iko kina ko koya;

4ni sa nona talai na Kalou ko koya vei iko mo vinaka kina. Ia kevaka ko sa caka ca, mo rere ga, ni sa sega ni taura walega nai seleiwau ko koya! Ni sa nona talai na Kalou, me cudruvi koya sa caka ca.

5O koya oqo e dodonu kina mo dou talairawarawa, e segai walega e na vuku ni cudru, e na vuku ni lewa-e-loma talega.

6Maciu 22.21; Mari 12.17; Luke 20.25O koya mo dou qai ia talega na saumi vakacavacava, ni ra sa nona talai na Kalou, era sa qarava tiko na ka oqo.

7Dou solia vei ira na ka kecega sa dodonu me soli—nai vakacavacava vei ira sa nodra nai vakacavacava, na sigana vei ira sa nodra na sigana, na veidokai vei ira e dodonu me ra dokai, na vakarokoroko vei ira e dodonu me ra vakarokorokotaki.

Na Vakayacori ni Vunau mai na Loloma

8Me kakua ni tiko e dua na dinau ko sa sega ni sauma, ia na veilomani ga me ia tiko; ni sa vakayacora na vunau taucoko ko koya sa daulomana na tani.

9Lako 20.13-15,17; Vrua 5.17-19,21; Vsoro 19.18Io, oqo nai vakaro, “Mo kakua ni ia na veibutakoci; Mo kakua ni laba; Mo kakua ni butako; Mo kakua ni kocokoco”; ia kevaka sa dua tale nai vakaro, sa soqoni vata kecega e na vosa oqo, “Mo lomana na kai nomu me vaka ko sa lomani iko.”

10Na loloma sa sega ni daucaka ca vua na kai nona; o koya oqo, sa cakava kina na vunau taucoko na loloma.

E Dua na Kerekere Bibi

11Ia oqo, ni da kila na gauna, ni sa gauna oqo mo dou yadra kina mai na moce. Ni sa qai voleka oqo na noda vakabulai ka yawa na gauna eda se qai vakabauta taumada kina.

12Sa vakarau oti na bogi, ka sa voleka na siga. O koya me da qai luvata tani nai valavala ni butobuto, ka me da vakaiyaragi tu e na rarama.

13Me da lako voli me vaka e kilikili, me vaka e na siga, me kakua nai soqosoqo lialia ni vakacaca se na mateni, me kakua na veidauci se nai valavala velavela, me kakua na veileti se na vuvu.

14Ia dou vakaisulu e na Turaga ko Jisu Karisito, ka kakua ni goleva nai tovo vakayago, me vakayacori na kena gagadre ca.