1Ena ca na koro dauvakadave-dra,
sa sinai sara e na veivakaisini kei nai valavala vakasausa—
ka sega ni mudu e na daukovekove!
2A rorogo ni kuita kei na vadugu ni yava ni qiqi-ni-valu,
kei na ose e butubutu kei na qiqi-ni-valu e ladelade tiko!
3Na tamata dauvodo ose sa vakacibi i valu,
kei nai seleiwau e makualiliva kei na moto e veitibiyaki,
kei na kedra lewe vuqa era vakamavoataki,
ka dua nai binibini yago mate;
ka sa sega ni wili rawa na mate—
era sa tarabe kina na tamata!
4E na vuku ni kena sa rui levu na nona caka ca na yalewa dautagane,
e na veivakacalai kei na daucaka-mana lasu,
ka vakaleqa na veimatanitu e na nona dautagane,
ka vakacalai ira na tamata e na nona caka mana lasu.
5Raica, koi au ka'u sa nomu meca,
sa kaya ko Jiova-ni-lewevuqa,
ia ka'u na cega cake na nomu i sulu ki matamu;
ka vakaraitaka na nomu luvawale ki na veivanua,
kei na nomu veivakamaduataki ki na veimatanitu.
6Ia ka'u na viritaka vei iko na ka vakasisila,
ka cakava mo vakasisilataki,
ka vakasesevotuni iko.
7Ia ko ira kece era raici iko era na drotaki iko, ka kaya,
Sa rusa ko Ninive; ko cei me na tagicaki koya?
Me'u qarai ira mai vei era na mai vakacegui iko?
8Sa vinaka li ko iko ka ca ko Noamoni,
o koya ka koto e na bati ni Naile,
a wai ga sa volita,
a nona i keli na uciwai,
ka sa kena bai na wai?
9Ko Eciopea,
kei Ijipita sa nona kaukauwa, ka sega ni yalani rawa;
ko Puti kei na kai Lupime era nomu i to.
10Ia sa vakabobulataki ga ko koya,
ka sa lako tani vakabobula;
a luvena lalai talega sa ra botobotolaki
e na mua ni sala ni koro kecega;
ia na nona tamata rogo sa ra vakawiri madigi kina,
kei ira kece na nona tamata turaga sa ra vesuki e na sinucodo.
11O iko talega ko na mateni, ko na vunitaki;
ko iko talega ko na qara e dua nai drodro mai na meca.
12A nomu koro-ni-valu kecega sa vaka na vuni lolo
sa tiko kina nai sevu ni vuana dreu—
ke sa kureitaki, sa na lutu sara
ki na gusu i koya sa daukania.
13Raica, ko ira na nomu tamata e na nomu vanua
sa ra yalewa ga.
Ena dolavi sara na matamata-ni-koro ni nomu vanua
vei ira na nomu meca;
ena kania na bai ni nomu matamata na bukawaqa.
14Mo la'ki takiva na memu wai,
me ganita ni sa buku na druadrua ni koro;
vakaukauwataka na nomu bai ni valu;
lako ki na tete ka butuka na qele dregadregata,
gumatuataka na lovo ni vatu-buli!
15Ia na bukawaqa mai kea ena kati iko,
ena muduki iko tani nai seleiwau.
Ena kani iko sara me vaka na vodre dramidrami.
Dou lewe vuqa mai me vaka na vodre dramidrami,
dou lewe vuqa mai me vaka na vodre!
16O sa vakalewevuqataki ira na nomu dauveivoli
me ra lewe vuqa cake ka lailai na kalokalo ni lomalagi.
Na vodre dramidrami sa dodoka na tabana, ka ra sa vuka yani.
17A nomu turaga era sa vaka na vodre,
kei ira na nomu kavetani era sa vaka na qele ni vodre lelevu,
era sa vakavale voli e na bai
e na dua na siga liliwa—
ni sa cadra mai na mata-ni-siga, era sa vuka tani;
sa sega ni dua e kila na vanua era sa lako kina.
18Sa ra moce na nomu i vakatawa,
na tui Asiria;
sa ra koto sobu na nomu tamata qaqa.
Sa ra dui vakasevi ko ira na nomu tamata ki na veiulunivanua,
ka sa sega e dua me vakasoqoni ira rawa tale.
19Sa sega ni maca rawa na nomu mavoa,
sa ka rarawa na nomu vue.
O ira kece era rogoca na kemui tukutuku
era na vakasausau e na reki.
Ni ko cei li sa dro tani rawa
mai na nomu ca sa sega ni mudu?
Who We AreWhat We EelieveWhat We Do
2025 by iamachristian.org,Inc All rights reserved.
