Vakatekivu 43 - Ai Vola Tabu (Vakadewa Makawa Vakavoutaki 2021)（FRV21）

Sa Kau ki Ijipita ko Penijamini

1A sa ka levu sara na dausiga e na vanua.

2Ia ni ra sa kania oti na sila era a kauta mai Ijipita, sa qai kaya vei ira ko tamadra, “Dou lako tale, ka volia vakalailai mai na keda kakana.”

3Ia sa vosa vua ko Juta, ka kaya, “Sa vakarota vinaka sara vei keitou na tamata ko ya, ka vaka, ‘Dou na sega ni raica tale na mataqu kevaka sa sega ni tiko kei kemudou na tacimudou.’

4Kevaka ko na tala vata kei keitou na taci keitou, keitou na qai lako sobu ka volia na kemu;

5ia kevaka ko na sega ni tala, keitou na sega ni lako sobu, ni sa kaya vei keitou na tamata ko ya, ‘Dou na sega ni raica tale na mataqu, kevaka sa sega ni tiko kei kemudou na tacimudou.’ ”

6A sa kaya ko Isireli, “A cava dou a sega ni lomani au kina, ni dou a tukuna vua na tamata oqori ni sa dua tale na tacimudou?”

7A ra sa kaya, “Sa tarogi keitou matua na tamata ko ya e na veika e baleti keitou, kei ira na weka i keitou, ka kaya, ‘E se bula tiko li na tamamudou? Sa dua tale tiko li na tacimudou?’ Keitou sa tukutuku ga vua me vaka na nona taro. Me keitou a kila vakacava mada ni na kaya, ‘Dou kauta sobu mai na tacimudou’?”

8A sa qai kaya ko Juta vei Isireli na tamana, “Mo talai keirau vata kei na gone, keitou na qai cavu tu ka lako, me da bula kina ka sega ni mate—koi keitou, kei iko, kei ira talega na noda lalai.

9Au sa yalataki au e na vukuna ke sa yali; ka me'u na saumi taro vei iko e na vukuna. Kevaka ka'u sa sega ni kauti koya tale mai vei iko, ka vakatura e matamu, me'u na qai beitaki kina ka sega ni mudu.

10Kevaka keitou a sega ni vakaberabera, ke keitou sa lesu vakarua tale oqo.”

11A sa kaya vei ira ko Isireli na tamadra, “Kevaka sa qai vakaoqo, dou cakava mada na ka oqo: dou kauta e na nomudou taga eso na vuata ni vanua oqo ka vinaka cake, ka kauta sobu me ka ni loloma vua na tamata—me vakalailai nai lumu wainimate, ka dua na oni lailai, na drega boi vinaka, kei na mura, na ivi, kei na amodi.

12Dou vakaruataka na levu ni i lavo mo dou kauta. Dou kauta lesu tale nai lavo sa kau tale mai e na gusu ni nomudou taga; de mani a raici cala ga.

13Dou kauta talega na tacimudou, ka ia, ka lako tale vua na tamata;

14ia na Kalou Kaukauwa me na vakayacora mo dou lomani mai vua na tamata, ka me sereki koya mai na tacimudou kadua, kei Penijamini. Ia koi au, kevaka ka'u sa rarawa e na vukudra na luvequ, au sa rarawa dina ga.”

15A ratou sa qai kauta na ka-ni-loloma ko ya na veitacini, ka ra sa kauta nai lavo sa vakaruataki, kei Penijamini. Ka ratou sa ia, ka lako sobu ki Ijipita, ka tu e na mata i Josefa.

16Ia ni sa raici Penijamini kei iratou ko Josefa, sa kaya vua na tamata dauveiqaravi ni nona vale, “Mo kauti iratou na tamata oqo ki vale, ka vakamate manumanu, ka vakarautaka, ni ratou na vakasigalevu vata kei au ko iratou.”

17A sa kitaka na tamata ko ya me vaka sa kaya ko Josefa; a sa kauti iratou na veitacini ki na vale i Josefa.

18A ratou sa rere na tamata ni ratou sa kau ki na vale i Josefa, ka ratou sa kaya, “Sa yaco oqo e na vuku ni lavo ka vakasukai eliu e na noda taga, eda sa kau kina, me beitaki keda kina ka tauri keda, ka vakabobulataki keda kei na noda asa.”

19A ratou sa toro vua na tamata dauveiqaravi e na vale i Josefa, ka ra sa veivosaki kaya mai katuba ni vale.

20A ratou sa kaya vua, “Kemuni na turaga, keitou a lako dina mai eliu me voli kakana;

21ia ni keitou a yaco ki na dua na bure, keitou sa qai sereka na neitou taga, ka raica, sa tiko na nona i lavo na tamata yadua e na gusu ni nona taga, ia na neitou i lavo kece sara. Ia keitou sa kauta tale mai oqo,

22kei nai lavo tale eso keitou sa kauta vata mai oqo me keitou voli kakana kina. Keitou sa sega ni kila se ko cei ka biuta na neitou i lavo ki na neitou taga.”

23A sa kaya vei iratou ko koya, “Dou vakacegu ga, dou kakua ni rere; na nomudou Kalou, ko koya sa nona Kalou na tamamudou talega sa rairai solia vei kemudou nai yau e na nomudou taga; ni ka'u sa taura oti na nomudou i lavo.” A sa qai kauti Simione mai ki tautuba kivei iratou.

24Ia ni sa kauti iratou yani na veitacini ki na vale i Josefa ko koya na tamata dauveiqaravi, ka solia vei ira na wai, ka ratou sa vuya oti na yavadratou, ka ni sa vakania oti ko koya na nodratou asa,

25a ratou sa qai vakarautaka na ka ni loloma ka waraki Josefa me lako mai e na siga levu, ni ratou sa rogoca era na kana mai kea.

26Ia ni sa lako mai ki vale ko Josefa, era sa kauta vua na ka ni loloma sa tu vei iratou, a ratou sa cuva vua ki na qele.

27A sa tarogi ira se ra bula vinaka tiko, ka sa kaya, “E vinaka tiko li na tamamudou, ko koya na qase dou a tukuna voli? E se bula tiko beka ga, se segai?”

28A ratou sa kaya, “Na nomuni tamata na tama i keitou sa vinaka tiko, ka se bula tiko.” A ra sa vakarokoroko, ka cuva.

29Ni sa vakanamata cake ko koya, ka raici Penijamini na tacina, na luve i tinana, a sa kaya, “Oqo beka na tacimudou gone, ko koya dou a tukuna voli vei au?” Sa kaya talega, “Me yalololoma na Kalou kivei iko, na luvequ!”

30Ia sa luluvu na yalona ni sa lomana na tacina, ka sa kusarawa ko Josefa ni sa voleka na tagi. A sa qai curu ki na nona vale ni moce, ka tagi kina.

31Sa qai tavoya na matana, ka curu yani, ka kinoci koya, ka kaya, “Dou vakarautaka mai na magiti.”

32A ra sa vakarautaka vua vakai koya, vei iratou talega na veitacini vakai iratou, vei ira talega na kai Ijipita era kana vata ga vakai ira, ni sa dredre me ra kana vata na kai Ijipita kei ira na Iperiu; ni sa ka vakasisila oqori vei ira na kai Ijipita.

33Ni ratou sa dabe tiko e matana, me vaka sa tiko mai liu ko koya sa ulumatua ka sa muri sara ko koya sa gone, a ratou sa veiraici vakai iratou e na qoroqoro.

34A sa kau yani mai na tepeli i Josefa na kedratou i votavota, ia nai votavota kei Penijamini sa levu cake ka vakalimataki mai na kedra yadua. A ratou sa gunu vata kaya, ka marau vata.