2 Samuela 24 - Ai Vola Tabu (Vakadewa Makawa Vakavoutaki 2021)（FRV21）

Wiliki Ira na Isireli kei na Juta ko Tevita(1 Veigauna 21.1-27)

1A sa cudru tale vei ira na Isireli ko Jiova, a sa vakauqeti Tevita ko koya vei ira, ka vaka, “Mo la'ki wiliki ira na Isireli kei ira na Juta.”

2A sa kaya na tui vei Joape na kavetani ni valu erau tiko vata kaya, “Mo lako voli mada e na kedra maliwa na veiyavusa kecega ni Isireli, mai Tani ka yacovi Peri-sepa, ka wiliki ira na tamata, me'u kila na kedrai wiliwili.”

3Ia sa kaya vua na tui ko Joape, “Me vakaikuritaka vakadrau ko Jiova na nomuni Kalou na kedrai wiliwili na tamata, me raici ira talega ko koya na noqu turaga na tui! Ia ka cava ko ni sa vinakata kina na ka oqo na noqu turaga na tui?”

4Ia sa gumatua ga na nona vosa na tui vei Joape, vei ira talega na turaga-ni-valu. A sa lako tani kina mai vua na tui ko Joape kei ira na turaga-ni-valu me ra wiliki ira na tamata e Isireli.

5A ra sa qalo kosova na Joritani, ka la'ki tiko ki Aroeri, mai na yasa ni koro ki nai matau, mai na loma ni buca nei Kata, ka donui Jaseri.

6Era sa qai lako ki Kiliati, kei na vanua ko Tatimi-otisi; a ra sa yaco ki Tani-jeani, ka lako voli ki Saitoni,

7ka yaco ki na koro vakabai ko Taia, kei na nodra veikoro kecega na Aivaiti, kei na kai Kenani; ka ra lako yani vaka ki na mata ni ceva i Juta ka yaco ki Peri-sepa.

8Ia ni ra sa veilakoyaki voli e na vanua taucoko, era sa yaco ki Jerusalemi ni sa oti e ciwa na vula ka ruasagavulu na bogi.

9A sa cavuta ko Joape vua na tui na kedrai wiliwili na tamata: a sa le oba vakawalusagavulu (800,000) na tamata qaqa vei ira na Isireli, era sa vakaiyaragi e nai seleiwau; ia ko ira na Juta, era sa le limasagavulu na oba (500,000) na tamata.

Na Lewa e Vauca nai Valavala Ca nei Tevita

10Ia sa beitaki Tevita na lomana ni sa wiliki ira oti na tamata. A sa kaya vei Jiova ko Tevita, “Au sa kitaka na ca levu e na ka ka'u sa cakava. Ia oqo, kemuni Jiova, mo ni kauta tani mada na noqu i valavala ca na nomuni tamata, ni'u sa cakava na ka lialia sara.”

11Ni sa duri cake ko Tevita e na mataka, a sa lako mai na vosa i Jiova vei Kata na parofita, na daurai nei Tevita, ka sa kaya,

12“Mo la'ki kaya vei Tevita, ‘Sa vosa vakaoqo ko Jiova: E tolu na ka ka'u sa cavuta vei iko. Mo digitaka e dua, me'u vakayacora vei iko.’ ”

13A sa lako vei Tevita ko Kata, ka kaya vua, “Me yacovi iko na dausiga e nomu vanua ka yabaki vitu? Se mo dro tiko e matadra na nomu meca ka vula tolu, ni ra sa vakasavi iko? Se me bogi tolu na mate levu e na nomu vanua? Mo lewa mada, se cava na vosa me'u kauta tale vua ka talai au mai.”

14A sa kaya vei Kata ko Tevita, “Au sa taqaya vakalevu. Me da lutu mada ki na liga i Jiova, ni sa levu na nona yalololoma; ia me'u kakua ga ni lutu ki na liga ni tamata.”

15A sa vakayacora ko Jiova na mate levu vei ira na Isireli e na mataka ko ya ka yacova na siga sa lokuca. A ra sa mate vei ira na tamata mai Tani ka yaco ki Peri-sepa e le vitu na oba (70,000) na tamata.

16Ia ni sa dodoka na ligana na agilosi vaka ki Jerusalemi me vakarusa, sa qai veivutuni ko Jiova e na vuku ni rarawa, a sa kaya vua na agilosi ka vakarusai ira tiko na tamata, “Sa rauta oqo; mo tarova na ligamu.” A sa tu na agilosi i Jiova e na rara ni samu sila nei Arauna na Jepusaiti.

17Ia ni sa raica ko Tevita na agilosi ka mokuti ira na tamata, sa vosa vei Jiova ka kaya, “Mo ni raica, koi au ga sa caka cala, io, ka'u sa kitaka na ka ca. Ia ko ira na sipi oqo, a cava era sa cakava? Me yaviti au ga kei na vale i tamaqu na ligamuni.”

Sa Tara nai Cabocabo-ni-soro ko Tevita

18A sa lako vei Tevita e na siga ko ya ko Kata, ka kaya vua, “Mo lako cake, mo cakava e dua nai cabocabo-ni-soro vei Jiova mai na rara ni samu sila nei Arauna na Jepusaiti.”

19Ka sa lako cake ko Tevita me vaka na vosa i Kata, me vaka ka vakarota ko Jiova.

20A sa vakararai voli ko Arauna, ka raica na tui kei ira na nona tamata ni ra lako mai vua. A sa lako yani ko Arauna, ka cuva vakatoboicu ki na qele vua na tui.

21A sa kaya ko Arauna, “A cava e lako mai kina na noqu turaga na tui vei au na nomuni tamata?” A sa kaya ko Tevita, “Me'u volia vei iko na rara ni samu sila me'u cakava kina e dua nai cabocabo-ni-soro vei Jiova, me mudu kina na mate levu vei ira na tamata.”

22A sa kaya vei Tevita ko Arauna, “Me taura ga na noqu turaga na tui, ka cabora na ka e vinaka vua. Raica, na bulumakau mei soro kama, ia me kena buka mo ni taura nai yaya ni samu sila, kei nai yaya ni bulumakau.

23A ka kecega oqo sa solia vakaturaga ko Arauna vei koya na tui.” Sa kaya talega vua na tui ko Arauna, “Me qai ciqomi kemuni ko Jiova na nomuni Kalou.”

24Ia sa kaya vei Arauna ko koya na tui, “E segai, ia ka'u na volia ga vei iko e na kenai voli. Au na sega ni vakacabora vei Jiova na noqu Kalou nai soro kama sa sega ni'u solia na kena i voli.” A sa volia kina ko Tevita na rara ni samu sila kei na bulumakau e na sikeli siliva e limasagavulu.

25A sa cakava mai kea ko Tevita nai cabocabo-ni-soro vei Jiova, ka vakacabora eso nai soro kama ka so nai soro ni veivinakati. A sa rogoca ko Jiova na vakamamasu e na vuku ni vanua, ka sa mudu na mate levu vei ira na Isireli.