Lako Yani 11 - Ai Vola Tabu (Vakadewa Makawa Vakavoutaki 2021)（FRV21）

Kacivaka ko Mosese ni na Mate na Ulumatua Kecega

1A sa kaya vei Mosese ko Jiova, “Sa vo tale e dua na mate ca levu ka'u na vakayacora vei Fero kei Ijipita. Ni sa oti ko ya, ena qai laivi kemudou ko koya mo dou lako tani eke. Ia ni sa laivi kemudou mo dou lako, ena qai vakasavi kemudou tani sara eke ko koya.

2Mo vosa mada vei ira na tamata, ka mo dou kerea nai ukuuku siliva kei nai ukuuku koula, na tagane yadua mai vua na nona lewe-ni-koro, kei na yalewa yadua mai vua na nona lewe-ni-koro.”

3A sa vakayalovinakataki ira na kai Ijipita ko Jiova me ra lomani ira na tamata. Ia ko Mosese talega sa tamata rogo ka dokai e na vanua ko Ijipita, e na matadra na vakailesilesi nei Fero kei na matadra na tamata kecega.

4A sa kaya ko Mosese, “Sa kaya vakaoqo ko Jiova: E na lomaloma ni bogilevu tutu, au na lako voli e loma i Ijipita.

5Era na mate kecega na ulumatua e na vanua ko Ijipita, io, na ulumatua i Fero, ko koya sa tiko e nona i tikotiko-vakaturaga, kei na nona ulumatua talega na yalewa bobula sa tiko mai na daku ni vatu ni qaqi sila, kei na ulumatua kecega ni manumanu e yavai va.

6Ena yaco e dua na tagi levu e na vanua taucoko ko Ijipita, ka se sega mada ni se bau yaco eliu ka na sega tale ni yaco mai muri.

7Ia ena sega ni kodrova e dua vei ira na Isireli na koli—ki vua na tamata se na manumanu—mo dou kila kina ni sa wasei ira na kai Ijipita kei ira na Isireli ko Jiova.

8Ko ira kecega oqo na nomui vakalesilesi era na qai lako sobu mai vei au, ka cuva vei au, ka kaya, ‘Mo ni lako tani, kei ira kecega na tamata era sa muri kemuni.’ Ni sa oti ko ya, ka'u na qai lako tani.” A sa cudru vakalevu sara, ka sa lako tani ko koya mai na mata i Fero.

9A sa kaya vei Mosese ko Jiova, “Ena sega ni vakarorogo vei iko ko Fero, ka me vakavuqataki kina na noqu cakacaka mana e na vanua ko Ijipita.”

10A sa cakava na cakacaka mana kecega oqo ko Mosese kei Eroni e na mata i Fero; ia sa vakaukauwataka na loma i Fero ko Jiova, ka sa sega kina ni laivi ira na luve i Isireli me ra lako tani mai na nona vanua.