Iperiu 6 - Ai Vola Tabu (Vakadewa Makawa Vakavoutaki 2021)（FRV21）

Me da Toso Tikoga ki Liu

1O koya oqo me da qai laiva nai vakatekivu ni vakavuvuli kei Karisito me da toro cake me da matua sara; me da kakua ni lesuva tale na yavu ni vakabauta: na veivutuni e na vuku ni valavala eda mate kina kei na vakabauta na Kalou,

2nai vakavuvuli ni veipapitaisotaki, kei na veitabaki liga, kei na nodra tucake talega ko ira na mate, kei na veilewai tawa mudu.

3Na ka oqo eda na cakava kevaka e vakatara na Kalou.

4Ni sa dredre sara me vakavoui tale me ra veivutuni ko ira era sa vakararamataki oti, ka ra sa tovolea nai solisoli vakalomalagi, ka vakaivotavota e na Yalo Tabu,

5ka tovolea na vosa vinaka ni Kalou kei na kaukauwa ni bula ena muri mai,

6ka ra sa qai vuki tale, ni ra sa vakota tale tiko na Luve ni Kalou vakai ira ka beci koya e na matanavotu.

7Ni sa vakalougatataka na Kalou na qele sa gunuva na uca sa lako wasoma kina, sa vakatubura na kau sa yaga vei ira era sa kelia.

8Vteki 3.17,18Ia sa sega ni vakabau ka sa vo vakalailai me biu sara oqori sa vakatubura na kau votovotoa kei na soni; ia na kenai tinitini me vakamai.

9Ia koi kemudou ga, sa lomani, e dina ga keitou sa vosa vakaoqo, ia keitou sa nanumi kemudou ni dou sa vinaka cake, ka ni na tu vei kemudou na ka sa lako vata kei na bula.

10Ni sa sega ni daucakacaka vakatawadodonu na Kalou; ena sega ni guilecava na nomudou cakacaka kei na loloma dou a vakatakila ki na yacana e na nomudou qaravi ira era sa lotu, ka dou se qarava tikoga oqo.

11Ia keitou sa vinakata mo dou dui gugumatua vakakina, mo dou vakanuinui matua sara kina ka me yacova nai vakataotioti,

12mo dou kakua ni vucesa, mo dou muri ira ga era sa qai taukei ni veika ka yalataki ni ra a vakabauta ka vosota vakadede.

Na Yalayala Tudei ni Kalou

13Ia ni sa yalayala vei Eparaama na Kalou, ka ni sa sega ni cavuta rawa e dua sa uasivi cake, sa qai cavuti koya ga e na nona bubului,

14Vteki 22.16,17ka kaya, “E dina ka'u na vakalougatataki iko vakalevu, ka vakalewevuqataki iko vakalevu sara.”

15Sa vaka ga kina, ni sa vosota vakadede mada ko koya, sa qai yaco me taukena na ka sa yalataki.

16Ia ni sa bubului ko ira na tamata, era sa daucavuta na ka sa levu cake, ka sa oti vei ira na veileti e na bubului mei vakadinadina.

17Sa vakakina na Kalou, ni sa vinakata ko koya me vakatakila dina sara kivei ira era na taukena na ka sa yalataki ni sa tudei na nona lewa, sa vakadinadinataka e na bubului,

18me rua kina na ka sa tudei sara, sa sega ni rawa kina me vosa lasu na Kalou, me da vakacegui sara kina, koi keda eda sa laki vakaruru ni da sa taura nai nuinui sa viritu e matada.

19Vsoro 16.2Ko ya sa tu vei keda nai nuinui oqo me i kelekele ni yaloda sa dina ka kaukauwa, ka sa curu sara ki loma ni lati,

20Same 110.4ki na tikina ko ya sa curu kina e na vukuda ko Jisu, me noda i liuliu, ni sa qisi me bete levu ka tawa mudu me vaka nai valavala i Melikiseteki.