Ruci 3 - Ai Vola Tabu (Vakadewa Makawa Vakavoutaki 2021)（FRV21）

Ko Ruci kei Poasa e na Rara ni Samu Sila

1Sa qai kaya vua ko Neomai na vugona, “Na luvequ, me'u sega li ni qara me nomu e dua nai vakavakacegu, mo vinaka kina?

2Ia oqo, sa sega li ni wekadaru ko Poasa, ko a tiko vata kei ira na nona yalewa? Raica, ena vakarautaki barile ko koya e na bogi edaidai e na rara ni samu sila.

3Mo sili mada, ka lumuti iko, ka vakasulumi iko e na nomu i sulu, ka lako sobu ki na rara ni samu sila; ia mo kakua ni vakatakilai iko vua na tamata, ka me kana ka gunu oti mada ko koya.

4Ia ni sa la'ki davo ko koya, mo raica na tikina sa davo kina ko koya, ia mo lako kina, ka cega nai tutuvi sa ubi kina na yavana, ia mo koto sobu; ka na qai tukuna vei iko ko koya na ka mo cakava.”

5A sa kaya vua ko koya, “A ka kecega ko sa kaya vei au ka'u na kitaka.”

6A sa lako sobu ko koya ki na rara ni samu sila, a sa cakava na ka kecega ka vakarota vua na vugona.

7Ia ni sa kana ka gunu oti ko Poasa, a sa marau na yalona, sa la'ki koto mai na mua ni binibini co-vuata. A sa lako vakamalua ko koya, ka cega nai tutuvi sa ubi kina na yavana, a sa koto sobu.

8Ia ni sa lomaloma ni bogi, sa rere ko koya na tagane, a sa vuki, ka raica, sa dua na yalewa sa koto ki yavana.

9A sa taroga ko koya, “O cei ko iko?” A sa kaya ko koya, “Oi au ko Ruci, na nomuni vada. Mo ni tevuka na nomuni tutuvi me ubia na nomuni vada, ni daru sa veiwekani ka mo ni tauri au.”

10A sa kaya koya, “Mo kalougata mai vei Jiova, na luvequ. Sa levu na loloma ko sa cakava e muri oqo ka lailai eliu; ni ko sa sega ni muri ira na cauravou, se ra dravudravua se vutuniyau.

11Ia oqo, na luvequ, mo kakua ni rere. Au na cakava vei iko na ka kecega ko sa kaya, ni ra sa kila ko ira kecega na kai noqu mai na koro ni ko sa yalewa vinaka.

12Ruci 2.20Sa dina sara ni'u sa wekamu dina, ia sa dua ga na wekamu sa voleka ka'u sa yawa koi au.

13Mo tiko ga e na bogi oqo, ia e na mataka, kevaka ena cakava vei iko ko koya nai valavala ni veiwekani dina, ena daumaka; me cakava ga ko koya na cakacaka ni veiwekani. Ia kevaka e sega ni mani vakayacora vei iko na cakacaka ni veiwekani dina, me vaka sa bula ko Jiova, ka'u na qai vakayacora vei iko koi au na cakacaka ni veiwekani. Mo koto ga me yacova na mataka.”

14A sa koto voleka ki na yavana ko koya ka yacova na mataka, ia sa duri cake ko koya ni ra se bera ni veiraici mata rawa na tamata. A sa kaya ko koya, “Me kakua mada ni kilai ni sa lako mai e dua na yalewa ki na rara ni samu sila.”

15Sa kaya talega ko koya, “Kauta mai nai tutuvi ko sa vakaisulu kina ka taura cake tu.” Ia ni sa taura cake tu ko Ruci, sa vakarautaka ko Poasa e ono nai vakarau barile, ka sa vakatauca vua. A sa qai lako ko koya ki na koro.

16A sa lako mai ko koya vua na vugona, ka sa kaya vua na vugona, “O sa vakaevei, na luvequ?” A sa tukuna vua ko koya na ka kecega ka cakava vua ko koya na tamata,

17ka sa kaya talega, “Sa solia mai vei au ko koya nai vakarau barile oqo e ono, ni sa kaya vei au, ‘Mo kakua ni lesu lala vua na vugomu.’ ”

18A sa kaya na vugona, “Mo wawa, na luvequ, mo kila mada se na vakaevei nai tinitini ni ka oqo. Ni na sega ni vakacegu o koya na tamata, ka me na qarava oti mada na ka oqo edaidai.”