Isikeli 19 - Ai Vola Tabu (Vakadewa Makawa Vakavoutaki 2021)（FRV21）

A Lele e na Vukudra na Turaga ni Isireli

1Ia oqo ko iko, mo taurivaka na lele e na vukudra na turaga ni Isireli,

2ka kaya:

Sa dua dina na laione yalewa na tinamu

e na kedra maliwa na laione!

Sa davo sobu e na kedra maliwa na luve ni laione,

ka susuga na luvena.

3Ka sa susuga e dua na luvena;

ka sa tubu cake me laione e kaukauwa cake,

ka sa vakavulici me toboka na kena;

ka sa daukana tamata.

4Era sa rogoca kina na veivanua;

ka sa tobo e na nodra qara;

ka ra sa kauti koya ni sa vesu tu

ki na vanua ko Ijipita.

5Ia ni sa raica na laione yalewa ni sa wawa tiko,

ka sa yali na ka e nuitaka,

sa qai kauta e dua tale na luvena dramidrami ka tagane,

ka susugi koya me laione gone ka kaukauwa.

6A sa veilakoyaki tu e na kedra maliwa na laione,

ka sa tubu cake me laione kaukauwa cake,

ka sa vakavulici me toboka na kena,

ka sa daukana tamata ko koya.

7Ka sa kunea ko koya na nodra vale vakaturaga sa lala tu,

a sa vakalalataka na nodra veikoro;

ka sa rusa na vanua, kei na ka kece sa tu kina,

e na vuku ni rorogo ni nona tagi.

8Sa qai mai vala kaya na veimatanitu

mai na veiyasana mai na veiqali,

ka ra ubi koya e na nodra lawa;

ia sa tobo e na nodra qara.

9A ra sa sogolati koya ni sa vesuki,

ka kauti koya vei tui Papiloni;

era kauti koya ki na dua na vale kaukauwa,

me kakua ni rogo tale na domona

e na veiulunivanua ni Isireli.

10Na tinamu e sa vaka na vaini

sa tei e na bati ni wai,

sa vuavuai vinaka ka sa levu na drauna

e na vuku ni levu ni wai.

11A sa vakatabana kaukauwa

me nodra i titoko masei era ia na lewa;

ka sa cecere vakaidina ko koya

e loma ni tabanikau rugurugua,

a sa rairai vakacecere ko koya

ni sa vuqa na tabana.

12Ia sa cavuivuvutaki ko koya e na cudru,

sa biu sobu ki na qele,

ia na cagi mai na tokalau sa vakamalaitaka na vuana;

sa raramusumusu na tabana kaukauwa ka sa malai;

ka sa yavu e na bukawaqa.

13Ia sa qai tei ko koya e na vanua lala,

e na vanua mamaca ka daukaramaca.

14A sa lako tani na bukawaqa mai na dua na basoga lailai ni tabana,

a sa kama kina na vuana,

ka sa qai sega kina na tabana kaukauwa

me caka kina nai titoko masei me ia kina na lewa.

Oqo e dua na lele, ka sa vakayagataki e na lele.