Emosi 9 - Ai Vola Tabu (Vakadewa Makawa Vakavoutaki 2021)（FRV21）

Na Lewa i Jiova ena Nodra Cudruvi na Isireli

1Au a raica na Turaga ni sa tu e na dela ni cabocabo-ni-soro, ka sa kaya ko koya:

“Mo yavita na kenai ukuuku momokiti me yavala kina na duru ni sogo,

ia mo yavita na uludra kecega;

ia na kena vo vei ira ka'u na vakamatea e nai seleiwau;

ena sega e dua vei ira me dro bula,

ena sega talega ni vakabulai ko koya sa dro.

2“Ke ra mani kelikeli me yaco ki Bulu,

ena tauri ira mai kea na ligaqu;

ka kevaka era mani kaba cake ki lomalagi,

ka'u na qai kauti ira sobu mai kea.

3Ia ke ra vunitaki ira e na dela i Kameli,

ka'u na qarai ira ka kauti ira mai kea;

ka kevaka era tabonaki ira mai na mataqu e na boto ni wasawasa,

ka'u na qai vosa ki na gata mai kea, ka na kati ira ga.

4Ia ke ra lako vakabobula e matadra na nodra meca,

ka'u na vakarota nai seleiwau ka na vakamatei ira mai kea;

ia ka'u na wanonovi ira me ra ca kina,

ka segai me ra vinaka.”

5Ni sai koya na Turaga ko Jiova-ni-lewevuqa,

o koya sa tara na vanua ka sa waicala kina,

ka ra na dui tagi ko ira kece era tiko kina,

sa na tubu cake sara ga me vaka na Naile,

ka sa na lutu sobu tale me vaka na Uciwai na Naile mai Ijipita;

6sai koya e tara mai lomalagi na nona i taba loma ni vale mai lomalagi,

ka sa vakatikora na kena yavu e vuravura;

sai koya ka kaciva na wai ni wasawasa,

ka sovaraka sobu yani ki na dela i vuravura—

na yacana ga ko Jiova.

7“Dou sa sega li ni vakataki ira na kai Eciopea vei au,

oi kemudou na Isireli?” sa kaya ko Jiova.

“Au a sega beka ni kauti ira cake na Isireli mai na vanua ko Ijipita,

kei ira na kai Filisitia mai Kafitori kei ira na kai Siria mai Kiri?

8Raica, sa wanonova tiko na matanitu i valavala ca ko ya na mata ni Turaga ko Jiova,

ka'u na vakarusa tani talega mai na dela i vuravura

—ia ka'u na sega ga ni vakarusa vakadua sara na vale i Jekope,”

sa kaya ko Jiova.

9“Ka raica, au na qai vakarota,

ka'u na vakayavalata na vale i Isireli e na veimatanitu kecega

me vaka sa vakayavalati e dua e na loma ni vulo,

ka na sega ni lutu e dua na vatu lailai ki na qele.

10Ena mate e nai seleiwau ko ira kece na noqu tamata era i valavala ca,

o ira era kaya, ‘Ena sega ni vauci keda se sotavi keda na ca oqori.’

Sa Vakalesuya Tale na Matanitu i Tevita ko Jiova

11 Caka 15.16-18 “E na siga ko ya au na vakatura tale

na vale i Tevita ka sa bale sobu,

au na viria tale na tikina sa cicila,

ka vakaduria na veitikina sa rusa

ka tara tale me vaka e na gauna eliu;

12me ra taukena na kena vo ni Itomi,

kei na veimatanitu kecega sa cavuti kina na yacaqu,

sa kaya ko Jiova, o koya ka cakava na ka oqo.

13“Raica, ena yaco na gauna,” sa kaya ko Jiova,

“ena vauci koya sa tamusuka na vuana ko koya sa daucuki were,

kei koya sa butuqaqia na vua-ni-vaini ena vauci koya sa kaburaka na sila;

na veiulunivanua ena vakatauca mai na waini vou,

ka ra na vakawaicalataki na veiulu-ni-koro kecega.

14Ia ka'u na kauti ira tale mai na noqu tamata na Isireli era vakabobulataki,

ka ra na tara tale na veikoro sa vakacacani ka vakatawa;

era na tea tale na veiloga-ni-vaini ka gunuva na kena waini,

ka ra na cakava talega na were ka kania na vuana.

15Ia ka'u na teivaki ira e na nodra vanua,

ka ra na sega ni cavuti tani tale

mai na nodra vanua ka'u sa solia vei ira,”

sa kaya ko Jiova na nomudou Kalou.