1 Tui 16 - Ai Vola Tabu (Vakadewa Makawa Vakavoutaki 2021)（FRV21）

1A sa yaco mai na vosa i Jiova vei Jeu na luve i Anani e na vuku i Pasa, ka vaka,

2“E na vuku ni ka'u a laveti iko cake mai na kuvu-ni-qele, ka lesi iko mo turaga vei ira na noqu tamata na Isireli, ka ko sa muria ga nai tovo i Jeropoama, ka sa vakaivalavalacataki ira na noqu tamata na Isireli, ka vakacudrui au e na vuku ni nodra i valavala ca,

3raica, ka'u na kauti Pasa tani kei na nona vuvale, ka'u na cakava na nomu vale me tautauvata kei na vale i Jeropoama na luve i Nipati.

4O koya yadua sa nei Pasa ka sa mate e na koro ena kania na koli; kei koya na nona ka sa mate e na were ena kania na manumanu vuka.”

5Ia na kena vo ni cakacaka i Pasa, kei na ka sa cakava ko koya, kei na nona kaukauwa, sa sega li ni volai e nai Vola ni Veika sa Caka e na Nodra Gauna na Tui Isireli?

6A sa moce vata kei ira na nona qase ko Pasa, a sa bulu mai Tirisa; a sa tui ko Ela na luvena, me kena i sosomi.

7A sa yaco talega mai na vosa i Jiova e na gusu i Jeu na parofita, na luve i Anani, e na vuku i Pasa kei na nona vale; io e na vuku ni ka ca kecega ka cakava ko koya e na mata i Jiova, me vakacudrui koya e na cakacaka ni ligana, ni sa tautauvata kei na vale i Jeropoama, ka ni sa mokuti koya.

Sa Tui Isireli ko Ela

8E na kenai karuasagavulu ka ono ni yabaki i Esa na tui Juta, sa tekivu me lewa vei ira na Isireli mai Tirisa ko Ela na luve i Pasa, ka lewa yabaki rua.

9A sa buki kena vere ni sa tiko mai Tirisa na nona tamata ko Simirai, na kavetani ni dua na kena wase ni nona qiqi-ni-valu, ni sa gunu ka sa mateni e na vale i Erisa, ko koya sa lewa na vale-ni-tui mai Tirisa.

10A sa curu ko Simirai, ka mokuti koya, ka vakamatea, e na kenai karuasagavulu ka vitu ni yabaki i Esa na tui Juta, ka sa tui me kena i sosomi.

11A sa yaco ni sa qai tui ko koya, ni sa tiko e na nona i tikotiko vakaturaga, sa qai vakamatei ira kecega na lewe-ni-vuvale i Pasa. Sa sega ni vakabula vua e dua na gone tagane e sega vei ira na wekana dina, se vei ira na nona i tau.

12A sa vakarusai ira kece na lewe-ni-vuvale i Pasa ko Simirai, me vaka na vosa i Jiova ka vosataki Pasa kina e na gusu i Jeu na parofita—

13e na vuku ni valavala ca kecega i Pasa, kei nai valavala ca i Ela na luvena, erau sai valavala ca kina, ka vakaivalavalacataki ira kina na Isireli, me vakacudrui Jiova na nodra Kalou na Isireli, e na nodra veika vakailasu.

14Ia na kena vo ni cakacaka i Ela, kei na ka kecega ka cakava ko koya, sa sega li ni volai e nai Vola ni Veika sa Caka e na Nodra Gauna na Tui Isireli?

Sa Tui Isireli ko Simirai

15E na kenai karuasagavulu ka vitu ni yabaki i Esa na tui Juta, sa tui mai Tirisa ko Simirai, ka bogi vitu. A sa tiko vakaivalu ko ira na tamata ki Kipiconi, ka nodra na kai Filisitia,

16ka sa rogoca ko ira na tamata ka tiko vakaivalu ni sa tukuni vakaoqo, “Sa bukivere ko Simirai, ka sa vakamatea talega na tui.” A ra sa buli Omira na turaga-ni-valu ko ira kecega na Isireli me tui Isireli e na siga ko ya e nai tikotiko ni valu.

17A sa lako cake mai Kipiconi ko Omirai, kei ira vata kaya na Isireli kecega, ka buku druadrua ki Tirisa.

18Ia ni sa raica ko Simirai ni sa kabai na koro, sa curu ki na tikina cecere e na vale-ni-tui, ka vakama na vale-ni-tui ni sa tiko e loma, ka sa mate—

19e na vuku ni nona i valavala ca sai valavala ca kina ni sa caka ca e na mata i Jiova, ni sa muria nai tovo i Jeropoama, kei na nona i valavala ca ka kitaka ko koya, ni sa vakaivalavalacataki ira na Isireli.

20Ia na kena vo ni cakacaka i Simirai, kei na nona vere ka kitaka ko koya, sa sega li ni volai e nai Vola ni Veika sa Caka e na Nodra Gauna na Tui Isireli?

Sa Tui Isireli ko Omirai

21Sa ra qai wase rua ko ira na Isireli. E dua na kena wase sa muri Tipini na luve i Kinaci, me ra buli koya me nodra tui, ka dua na kena wase sa muri Omirai.

22Ia na tamata era sa muri Omirai era sa gumatua vei ira na tamata era sa muri Tipini na luve i Kinaci. A sa mate ko Tipini, ka sa tui ko Omirai.

23E na kenai katolusagavulu ka dua ni yabaki i Esa na tui Juta, sa qai tekivu me lewai ira na Isireli ko Omirai, ka sa lewa yabaki tinikarua; e ono na yabaki sa tui kina mai Tirisa ko koya.

Ko Samaria na Koro-turaga Vou

24A sa volia ko koya na Ulunivanua ko Samaria mai vei Semeri, e na taledi siliva e rua, a sa tara e dua na koro e na ulunivanua, ka vakayacana ko koya, vei Semeri, nai taukei ni Ulunivanua ko Samaria.

25A sa daucaka ca ko Omirai e na mata i Jiova, ia sa levu cake na nona ca ka lailai sobu na nodra ca ko ira kecega sa bula eliu vei koya.

26A sa muria ko koya nai tovo kecega i Jeropoama na luve i Nipati, kei na nona i valavala ca sa vakaivalavalacataki ira kina na Isireli, ka me vakacudrui Jiova na nodra Kalou na Isireli e na nodra veika vakailasu.

27Ia na kena vo ni cakacaka i Omirai ka kitaka ko koya, kei na nona qaqa ka rairai vua, sa sega li ni volai e nai Vola ni Veika sa Caka e na Nodra Gauna na Tui Isireli?

28A sa moce vata kei ira na nona qase ko Omirai, ka sa bulu mai Samaria; a sa tui ko Eapi na luvena, me kena i sosomi.

Sa Tui Isireli ko Eapi

29Ia e na kenai katolusagavulu ka walu ni yabaki i Esa na tui Juta, sa tekivu me lewa ko Eapi na luve i Omirai vei ira na Isireli; a sa tui vei ira na Isireli mai Samaria ko Eapi na luve i Omirai, ka yabaki ruasagavulu ka rua.

30A sa daucaka ca e na mata i Jiova ko Eapi na luve i Omirai, ka uasivi vei ira kecega era a bula eliu vua e nai valavala ca.

31Ia me vaka sa ka lailai vua me muria nai valavala ca i Jeropoama na luve i Nipati, sa kuria ni sa kauti Jesipeli me watina, o koya na luve i Ecipeali, na nodra tui na kai Saitoni, ka la'ki qaravi Peali, ka cuva vua.

32A sa cakava e dua nai cabocabo-ni-soro vei Peali, e na burekalou i Peali, oqori ka tara ko koya mai Samaria.

33A sa cakava ko Eapi e dua na kalouyalewa ni veikau; a sa levu cake na ka sa vakacudrui Jiova kina na nodra Kalou na Isireli ko Eapi, ka lailai na ka era cakava ko ira kecega na tui Isireli era a bula eliu vua.

34Josua 6.26E na nona gauna sa tarai Jeriko ko Aieli na kai Peceli. Ni sa tauyavutaka ko koya, sa mate ko Epairami na nona ulumatua, ia ni sa vakaduria cake na kena matamata-ni-koro, sa mate ko Sikupi, o koya sa nona i tinitini, me vaka na vosa i Jiova ka vosataka e na gusu i Josua na luve i Nuni.