Aisea 15 - Ai Vola Tabu (Vakadewa Makawa Vakavoutaki 2021)（FRV21）

Na Vosa ni Parofisai Bibi kei Moapi

1 Aisea 25.10-12; Jere 48.1-47; Isi 25.8-11; Emo 2.1-3; Sefa 2.8-11 Oqo na vosa ni parofisai bibi kei Moapi.

Ni sa vakarusai e na bogi ko Ari,

sa vakanomodi ko Moapi,

ni sa vakarusai e na bogi ko Kiri,

sa vakadigagalu ko Moapi.

2Era sa cabe cake ki na burekalou,

ki Taiponi talega ki na veiyasana cecere, me tagi;

e dela i Nipo kei Metipa

sa tagi yaso ko Moapi.

Sa tasi na uludra kecega,

sa tasi laivi na kumidra kecega.

3E na nodra saqata ni koro era sulumaka nai sulu taga;

era na qoqolou kecega e dela ni nodra veivale,

e na nodra rara talega, ka tagi vakalevu sara.

4Ia ena tagi ko Esiponi kei Elale,

ena rogo yani ki Jeasa na domodrau;

o koya oqo sa qoqolou kina nai valu i Moapi;

sa rarawa na yalona e lomana.

5Sa tagi na lomaqu e na vuku i Moapi;

era sa dro ki Soa nai se,

me vaka na luve ni bulumakau sa yabaki tolu.

Era sa tagi lako ni ra sa cabe ki Luici,

io e na sala ki Oroneimi

era tabalaka na tagi ni veivakarusai;

6ni sa di na wai ni Nimirimi;

a sa malai na co, ka sa yali na buroro,

sa sega na ka e bulabula.

7Ia na ka era sa rawata

kei na nodra i yaya,

era sa kauta yani

ki na tai kadua ni soniwai ni veiwilou.

8Ni sa volivolita nai yalayala kei Moapi

na kena tagi;

sa rogo na kena qoqolou ki Ekileimi,

ki Pieri-elimi talega.

9Ni sa sinai e na dra na wai ni Timona;

ni'u na kauta mai kivei Timona eso tale na ka—

na laione me baleti ira na kai Moapi sa dro bula,

vei ira na vo-ni-bula sa vo tiko e na vanua.