Vakatekivu 38 - Ai Vola Tabu (Vakadewa Makawa Vakavoutaki 2021)（FRV21）

Ko Juta kei Tema

1Ia e na gauna ko ya sa lako sobu tani vei ira na veitacini ko Juta, ka la'ki tiko kei na dua na kai Etulama, a yacana ko Ira.

2A sa kunea mai kea ko Juta na luve ni dua na kai Kenani na yalewa, a yacana ko Sua; a sa kauti koya, ka la'ki moce kaya.

3A sa kunekune ko koya, ka vakasucuma e dua na luvena tagane; ia ko Juta sa vakayacani koya ko Eri.

4A sa kunekune tale ko koya, ka vakasucuma na luvena tagane; ia na yalewa sa vakayacani koya ko Onani.

5A sa vakasucu tale ka sa tagane, ka sa vakayacani koya ko Sela. Ia, ni sa vakasucumi koya, sa tiko ko Juta mai Kisipi.

6A sa kauta ko Juta e dua na yalewa, me wati Eri na nona ulumatua na yacana ko Tema.

7A sa tamata ca e na mata i Jiova ko Eri na ulumatua i Juta; a sa vakamatea ko Jiova.

8A sa kaya vei Onani ko Juta, “Mo curu vua na yada nei tuakamu, ka mo veiwatini kaya, ka vakatubura na kawa vua na tuakamu.”

9Ia ni sa kila ko Onani ni na sega ni nona na kawa, a sa yaco ni sa curu vua na yada nei tuakana, sa qai sovara ki na qele na nona wai-ni-vakaluveni, de solia na kawa vua na tuakana.

10Ia na ka sa cakava ko koya sa ca e na mata i Jiova, ka sa vakamatei koya talega.

11A sa kaya ko Juta vei Tema na vugona, “Mo tiko vakayada ga e na vale i tamamu, ka me tubu mada ko Sela na luvequ”—ni sa rerevaka ko koya de mate talega ko koya me vakataki rau na tuakana. A sa mani lako ko Tema ka tiko e na vale i tamana.

12Ia e na dua na gauna e muri, a sa mate na luve i Sua ka yalewa, ko koya na wati Juta. Ni sa oti na gauna ni vakaloloku i Juta, a sa lako cake ki Timinaca vei ira na tamata era daukotiva na nona sipi, ko koya kei na nona i tau ko Ira na kai Etulama.

13A sa tukuni vei Tema, ka vaka, “Raica, sa lako cake ki Timinaca na vugomu me kotiva na nona sipi.”

14A sa luvata tani na nona tabuisulu vakayada, ka daramaka nai ubi ni mata, ka vakaitutuvitaki koya, ka la'ki tiko e na matamata ki Eneima e na sala ki Timinaca. A sa raica ko koya ni sa tamata levu ko Sela, ia sa sega ga ni musuki vua me watina.

15Ni sa raici koya ko Juta, a sa nanuma ni sa yalewa dautagane, ni sa ubia na matana ko koya.

16A sa lako vakatikitiki vua e na sala, ka kaya, “Lako mai, me'u moce vata kei iko,” ni sa sega ni kila ni vugona. A sa kaya ko koya, “A cava ko na solia, mo qai moce vata kei au?”

17A sa kaya, “Au na vakauta vei iko e dua na luve ni me mai na qele ni me.” A sa kaya ko koya, “Ko na solia beka na kenai vakadinadina ni na kau mai?”

18A sa kaya, “A cava na ka me'u solia vei iko me kenai vakadinadina?” A sa kaya ko koya, “A nomu mama kei na nomu qato, kei na nomu i titoko.” A sa solia vua ko koya, ka sa la'ki moce kaya, ka sa kunekune vua ko koya.

19A sa cavu tu ko koya, ka lako yani, a sa luvata tani vua na nona i ubi, ka vakaisulu tale e na nona tabuisulu vakayada.

20Ia ni sa tala yani na nona i tau na kai Etulama ko Juta me kauta na luve ni me, ka me kau lesu tale mai kina nai vakadinadina sa tu vua na yalewa, a sa sega ni kunei koya.

21A sa tarogi ira na lewe ni koro, ka kaya, “Sa evei na yalewa dautagane ka tiko e Eneima e na bati ni sala?” A ra sa kaya, “Sa sega ni dua na yalewa dautagane e tu eke.”

22A sa lesu tale vei Juta, ka kaya, “Au sa sega ni kunei koya. A ra sa kaya talega na tamata e na vanua ko ya, ‘Sa sega ni dua na yalewa dautagane e tu eke.’ ”

23A sa kaya ko Juta, “E vinaka me kauta ko koya me la'ki nona, de daru na qai veiwalitaki. Raica, ka'u a vakauta na luve ni me oqo, ia ko sa sega ni kunei koya.”

24Ia sa oti e tolu na vula, sa qai tukuni vei Juta, ka vaka, “Ko Tema na vugomu sa ia na dautagane, ka sa bukete kina ko koya.” A sa kaya ko Juta, “Dou kauti koya mada mai, me mai vakamai.”

25Ia ni sa kau mai ki tautuba, sa qai tukutuku yani vua na vugona, ka kaya, “Au sa bukete vua na tamata sa nona na veika oqo.” Ka sa kaya ko koya, “Mo raica mada se sa nei cei na veika oqo, na mama, kei na qato, kei nai titoko.”

26A sa kila ko Juta, ka sa kaya, “Sa dodonu cake vei keirau ko koya, ni'u a sega ni soli koya vei Sela na luvequ.” A sa sega tale vakadua ni moce kaya.

27Ni sa yaco mai na siga me vakasucu kina, raica, sa drua na vua ni ketena.

28Ia ni sa vakasucu tiko, sa dodoka yani na ligana e dua vei rau; a sa taura na vu-ni-kalou ka viviga na ligana e na wa kulakula, ka kaya, “O koya oqo sa liu mai.”

29Ia ni sa vakasuka tale na ligana, raica, sa lako mai na tacina; a sa kaya na vu-ni-kalou, “Sa dua na basubasu ko sa cakava e na vukumu!” O koya oqo sa vakatokai kina na yacana ko Peresi.

30Ni sa oti, sa qai lako mai na tuakana, ko koya ka vivi na ligana e na wa kulakula, ka sa vakayacani koya ko Sira.