Vakarua 24 - Ai Vola Tabu (Vakadewa Makawa Vakavoutaki 2021)（FRV21）

Vakaro e Vauca na Vakawati kei na Veibiu

1 Maciu 5.31; 19.7; Mari 10.4 “Ni sa vakawati kei na dua na yalewa na tagane, ka sa qai sega ni lomana ni sa kunea vua e dua na ka sa sega ni savasava kina, me qai vola e dua nai vola ni veibiu ka solia ki na ligana, ka vakatalai koya tani mai na nona vale.

2Ia ni sa lako tani mai na nona vale, sa tara vua me la'ki veiwatini kei na tamata tani.

3Ia kevaka sa cati koya na watina e muri, ka vola e dua nai vola ni veibiu, ka solia ki na ligana, ka vakatalai koya tani mai na nona vale, se sa mate na watina e muri, o koya ka taura me watina,

4sa tabu vua na watina eliu, o koya ka talai koya yani, me taura tale me watina, ni sa vakatawasavasavataki oti; ni sa ka vakasisila oqo e na mata i Jiova. Ia mo ni kakua ni vakavuna me ca na vanua sa solia vei kemuni ko Jiova na nomuni Kalou mo ni taukena.

Na Veilawa Tale Eso

5“Ni sa qai vakawati vou e dua na tagane, me kakua ni lako yani ki nai valu ko koya, me kakua talega ni lesi ki na dua na cakacaka. Me tiko lalaga ga mai nona vale ka yabaki dua, ka vakamarautaka na watina sa qai taura ko koya.

6“Me kakua ni taurivaki na vatu-i-qaqi sa toka e cake se toka e ra me kenai vakadinadina ni ka, ni sa taurivaki kina na kenai vakadinadina ni ka sa bula kina na tamata.

7 Lako 21.16 “Kevaka sa kune na tamata ni sa butakoca e dua vei ira na wekana na Isireli me nona bobula, se me volitaka; ena qai mate na tamata butako ko ya; ia ko ni na vakaotia kina na ca mai na kemuni maliwa.

8 Vsoro 13.1—14.54 “Mo ni qarauni kemuni e na vuku ni mate ca na vukavuka, mo ni nanuma vinaka ka mo kitaka na ka kecega era sa vakavulica vei kemuni ko ira na bete na Livai; ni nanuma mo ni cakava na ka ka'u a vakarota vei ira.

9Tiko 12.10Mo ni nanuma na ka sa cakava ko Jiova na nomuni Kalou vei Miriama e na sala ni ko ni a lako tani mai Ijipita.

10 Lako 22.26,27 “Ni ko ni sa solia me talevaki e dua na ka vua na kai nomuni, mo ni kakua ni curuma na nona vale mo kauta mai vua nai vakadinadina ni ka sa soli me talevaki.

11Mo ni tu ga e tautuba, ia na tamata ko ni sa solia vua na ka me talevaki, ena kauta vei kemuni ki tautuba nai vakadinadina ni ka sa soli me talevaki.

12Ia kevaka sa dravudravua na tamata ko ya, me kakua ni vakabogi vei iko na nona i vakadinadina ni ka sa soli me talevaki.

13Mo ni solia dina vua nai vakadinadina ni ka sa soli me talevaki, ni sa dromu na mata-ni-siga, me moce rawa ko koya e nona i tutuvi, ka me vosavakalougatataki kemuni kina. Ia ena wili oqo me nomuni cakacaka dodonu e na mata i Jiova na nomuni Kalou.

14 Vsoro 19.13 “Mo ni kakua ni vakasaurarataka na tamata sa voli na nona cakacaka sa vakaloloma ka dravudravua, se sa dua vei ira na wekamuni, se dua vei ira na nomuni vulagi sa tiko e nomuni vanua e na nomuni lomanibai.

15Mo ni solia nai voli ni nona cakacaka e na kena siga, me kakua ni dromu mada na mata-ni-siga, ni sa dravudravua ko koya ka sa gadreva; de tagicaki kemuni ko koya vei Jiova, ia ko ni sa na cala kina.

16 2Tui 14.6; 2Vei 25.4; Isi 18.20 “Me ra kakua ni vakamatei na qase e na vukudra na gone, me ra kakua talega ni vakamatei na gone e na vukudra na qase. Ena vakamatei na tamata yadua e na vuku ni nona i valavala ca.

17 Lako 23.9; Vsoro 19.33,34; Vrua 27.19 “Mo ni kakua ni kauta vakatani na lewa vua na vulagi, se ko ira sa sega na tamadra; se kauta na nona i sulu na yada me kenai vakadinadina ni ka.

18Ia mo ni nanuma ga ni kemuni a bobula mai Ijipita, a sa vakabulai kemuni mai kina ko Jiova na nomuni Kalou; o koya ka'u sa vakaroti kemuni kina mo ni kitaka na ka oqo.

19 Vsoro 19.9,10; 23.22 “Ni ko ni sa tamusuka na nomuni sila e na nomuni veiwere, ka sa guilecava e dua nai vau sila e na were, mo ni kakua ni lakova tale. Me nona ga na vulagi, kei ira sa sega na tamadra, kei na yada, me vakalougatataki kemuni kina ko Jiova na nomuni Kalou e na cakacaka kecega ni ligamuni.

20Ni ko ni sa samuta na nomuni vu ni olive, mo ni kakua ni lakova tale na tabana. Me nona ga na vulagi, kei ira sa sega na tamadra, kei na yada.

21Ni ko ni sa tauca na vua ni nomuni veivaini, mo ni kakua ni lakova tale na kena vo. Me nona ga na vulagi, kei ira sa sega na tamadra, kei na yada.

22Ia mo ni nanuma ni ko ni a bobula mai na vanua ko Ijipita; o koya ka'u sa vakaroti kemuni kina mo ni kitaka na ka oqo.