Jope 4 - Ai Vola Tabu (Vakadewa Makawa Vakavoutaki 2021)（FRV21）

Sa Vunauci Jope ko Elifasi

1Sa qai vosa ko Elifasi na kai Temani, ka kaya,

2“Kevaka keitou sa vakatovolea me vosa vei iko, ko na yalo ca beka?

Ia ko cei e tarovi koya rawa me kakua ni vosa?

3Raica, ko a vakavulici ira na lewe vuqa;

ia ko a dauvakaukauwataka na liga malumalumu.

4A nomu vosa sa dautokoni koya sa voleka ni bale,

ko sa dauvakaukauwataka na duru malumalumu.

5Ia oqo ni sa yacovi iko, ko sa yalowai;

ni sa tauvi iko, ko sa kidroa.

6Sa sega beka ni ka ko tudei kina na nomu rerevaka na Kalou,

kei na vu ni nomu i nuinui na nomu i valavala dodonu?

7“Mo nanuma mada, se ko cei e rusa ni sa sega ni cala?

Se muduki laivi mai vei na daucaka dodonu?

8E vaka ga oqo na ka ka'u sa dauraica, ni ko ira era sa daucuki e na caka ca,

ka kaburaka nai valavala ca, era sa tamusuka ga na ka ko ya.

9Ni sa ceguvi ira na Kalou era sa rusa,

ia ni sa liwavi ira na nona cudru era sa oti laivi.

10Na tagi ni laione, kei na domo ni laione rerevaki,

kei na batidra na luve ni laione sa vorolaki.

11Sa mate na laione qase ni sa sega na ka e cova,

a ra sa dui vakasesei na luve ni laione yalewa.

12“Ia sa tukuni lo vei au e dua na ka,

ka sa rogoca na daligaqu e dua na tikina lailai.

13 Jope 33.15 Ni'u a vakanananu tiko ki na raivotu ni bogi,

e na gauna sa daubiti ira na tamata sa moce lutu,

14sa tauvi au mai na rere, kei na sautaninini,

ka sa yavavala kina na suiqu kecega.

15Sa qai lako voli e mataqu e dua na yalo;

sa duri cake na vuti ni yagoqu.

16Sa tucake vakadua tu,

ia ka'u sa sega ni kila rawa na kenai rairai.

Sa tu e mataqu e dua na raivotu;

sa tu lo ga, ka'u sa qai rogoca e dua na domo, sa kaya,

17‘E na rawa beka ni vakadonui na tamata e na mata ni Kalou?

E na rawa beka ni savasava na tamata e matana na nona Dauveibuli?

18Raica, sa sega ni vakadinati ira na nona tamata;

ka sa vakacalai ira na nona agilosi;

19ena qai levu cake sara ko ira sa tiko e na vale qele,

ka sa nodra yavu na kuvu-ni-soso,

ka sa butuqaqi me vaka na sarasara.

20Era sa vurumemei tiko mai na mataka ki na yakavi;

ka ra sa yali vakadua ka sega e bau nanuma kina.

21Sa dautakali vei ira na kedra vinaka,

ka ra sa ciba ka segai na nodra vuku.’