1 Timoci 1 - Ai Vola Tabu (Vakadewa Makawa Vakavoutaki 2021)（FRV21）

1Koi au ko Paula, nai apositolo i Karisito Jisu, e nai lesilesi ni Kalou na noda i Vakabula, kei Karisito Jisu na vu ni noda i nuinui,

2 Caka 16.1 Kivei Timoci, na luvequ dina e na vakabauta:

Me sa nomu na loloma, na yalololoma, kei na vakacegu mai vua na Kalou ko Tamada, kei Karisito Jisu na noda Turaga.

Nai Vakaro Eso me Baleta nai Vakavuvuli Lasu

3Me vaka ka'u a vakamasuti iko mo tiko ga mai Efeso, ni'u a lako ki Masitonia, mo vakarota kina vei ira eso me ra kakua ni vakatavulica nai vakavuvuli tani,

4me ra kakua talega ni dinata nai tukutuku wale kei nai vola ni kawa tawa mudu, sa tubu kina na veileti, ka sega ga na veivakatataki cake e na ka ni Kalou, o koya sa yaco e na vakabauta, au sa kitaka tale oqo.

5Ia na ka sa nakiti e na vunau na loloma mai na yalo savasava, kei na lewa-e-loma vinaka, kei na vakabauta dina.

6A sa cala mai kina ko ira eso, ka sa lesu tani me ra ia na veileti walega,

7a ra sa gadreva me ra vu-ni-vunau, ka ra sa sega ni kila na ka era sa dautukuna, se na ka era sa vosa doudou kina.

8Ia eda sa kila sa ka vinaka na vunau, kevaka sa muria na tamata me vaka na kenai valavala.

9Ni da sa kila sa sega ni bale na vunau vei ira na tamata yalododonu, vei ira ga era sa sega ni muria na vunau, ka sa dautalaidredre, vei ira era sa sega ni lotu, a ra sa dauivalavala ca, vei ira era sega ni yalosavasava, a ra sa vakasisila ga, vei ira era sa labata na tamadra, a ra sa labata na tinadra, a ra sa dauveiraravui,

10vei ira era sa dauveidauci, vei ira era sa veimoceri vakatagane, vei ira era sa daubutakoca na tamata, vei ira era sa daulasu, vei ira era sa daububului vakailasu, kei na ka tani kecega sa sega ni vaka nai vakavuvuli vinaka,

11me vaka nai tukutuku-vinaka vakaidina nei koya na Kalou dokai, ka'u sa lesi kina me'u vunautaka.

Na Vakavinavinaka me Baleta na Yaloveivosoti ni Kalou

12Ia ka'u sa vakavinavinaka vei Karisito Jisu na noda Turaga, o koya sa vakaukauwataki au, ni sa nanumi au ni'u sa lomadina, a sa lesi au ki na cakacaka vakaitalatala,

13Caka 8.3; 9.4-5ka dina ga ni'u a dauvosavakacaca eliu, kei na dauveivakacacani, kei na dauveivakasewasewani. Ia ka'u sa ciqoma na yaloveivosoti ni Kalou, ni'u a kitaka na veika oqo e na lialia kei na tawa vakabauta,

14ka sa vuabale e vukuqu na loloma ni noda Turaga, ka'u a vakabauti Karisito Jisu kina ka lomana.

15Sa dina na vosa, ka sa yaga me vakabauti vakalevu, ni sa lako mai ki vuravura ko Karisito Jisu me vakabulai ira na tamata i valavala ca—ka'u sa kena e ca duadua koi au.

16Ia e na vuku ga ni ka oqo ka'u sa ciqoma kina na yaloveivosoti ni Kalou, me vakaraitaka kina ko Jisu Karisito, e na vukuqu, na uasivi ni vosota vakadede, ka me'u i vakaraitaki vei ira era na vakabauti koya e muri me ra bula tawa mudu kina.

17Ki vua na Tui sa tawa-tubu, sa sega ni mate rawa, sa sega ni rairai, na Kalou vuku e duabau ga, ia me nona na vakarokoroko kei na lagilagi ka sega ni mudu. Emeni.

18Ai vakaro oqo ka'u sa solia vei iko, na luvequ Timoci, me vaka na parofisai ko a tukuni kina eliu, mo ia kina nai valu vinaka,

19mo taura matua na vakabauta kei na lewa-e-loma vinaka. Oqori era sa biuta eso, ka sa kasa kina na nodra vakabauta ka mate;

20sa vakaoqo ko Imeneo kei Alekisada, koi rau ka'u sa solia vei Setani, me rau kila kina me rau kakua ni dauvosavakacaca.