Same 135 - Ai Vola Tabu (Vakadewa Makawa Vakavoutaki 2021)（FRV21）

Na Vakacaucautaki ni Vinaka kei na Kaukauwa ni Kalou

1Dou ia ki na yaca i Jiova na vakavinavinaka!

Dou ia na vakavinavinaka, oi kemudou na tamata i Jiova,

2oi kemudou sa tiko e na vale i Jiova,

e na lomanibai ni vale ni noda Kalou.

3Dou ia na vakavinavinaka vei Jiova; ni sa yalovinaka ko Jiova;

dou seretaka na yacana, ni sa ka vinaka.

4Ni sa digitaki ira na Jekope ko Jiova me nona,

io na Isireli me nona i yau talei.

5Ni'u sa kila sa levu ko Jiova,

io na noda Turaga sa uasivi vei ira kecega na kalou.

6A ka kecega sa vinakata ko Jiova, sa cakava ga,

mai lomalagi kei vuravura,

e na wasawasa kei na wai titobu kecega.

7Sa vakuvuya cake na kabukabu mai nai yalayala kei vuravura;

sa cakava na livaliva me tau kina na uca;

sa kauta mai na cagi mai na nona lololo.

8O koya ka vakamatea na ulumatua mai Ijipita,

na tamata kei na manumanu talega;

9ka sa tala nai vakatakilakila kei na ka vakurabui

e na nomu loma ni vanua Ijipita,

vei Fero, kei ira na nona tamata kece.

10O koya ka mokuta na veimatanitu lelevu,

ka vakamatei ira na tui kaukauwa—

11ko Sioni na nodra tui na Amoraiti,

kei Oki na tui Pasani,

kei na veimatanitu kecega mai Kenani—

12ka sa solia na nodra vanua mei votavota,

me nodra i votavota na nona tamata na Isireli.

13A yacamuni, i Jiova, sa tawa mudu;

io na kemuni vakananumi, i Jiova, ki nai tabatamata kecega.

14Ni na lewai ira na nona tamata ko Jiova,

ena veivutuni talega e na vukudra na nona tamata.

15 Same 115.4-8; Vtaki 9.20 A nodra matakau na veimatanitu na siliva kei na koula,

na cakacaka ni liga ni tamata.

16Era sa vakagusuna, ka ra sa sega ni vosa rawa;

era sa vakamatana, ka ra sa sega ni rai rawa;

17era sa vakadaligana, ka ra sa sega ni rogo rawa;

ka sa sega nai cegu e na gusudra.

18O ira era sa cakava era na tautauvata kei ira;

o ira kece talega era sa vakararavi vei ira.

19Dou vakavinavinaka vei Jiova, na vale i Isireli!

Dou vakavinavinaka vei Jiova, na vale i Eroni!

20Dou vakavinavinaka vei Jiova, na vale i Livai!

Oi kemudou sa rerevaki Jiova, dou vakavinavinaka vei Jiova.

21Me vakavinavinakataki ko Jiova mai Saioni,

o koya sa tiko mai Jerusalemi.

Dou ia vei Jiova na vakavinavinaka!