Roma 6 - Ai Vola Tabu (Vakadewa Makawa Vakavoutaki 2021)（FRV21）

Mate ki nai Valavala Ca, Bula ena Vuku i Karisito

1A cava me da qai kaya? Me da sai valavala ca tiko li, me tubu vakalevu kina na loloma?

2E segai sara. Oi keda sa mate ki nai valavala ca, eda na kitaka tiko vakaevei nai valavala ca?

3Dou sa sega beka ni kila, koi keda kece sa papitaisotaki vei Karisito Jisu, eda sa papitaisotaki ki na nona mate?

4Kolo 2.12O koya eda sa bulu vata kaya kina, ni da sa papitaisotaki ki na nona mate, me vaka sa vakaturi cake tale mai na mate na Karisito e na kaukauwa nei Tamana, me da sai valavala vaka talega kina e na bula vou.

5Ia kevaka eda sa duavata me da vakataki koya e na nona mate, eda na vakataki koya talega e na nona tucake tale mai na mate.

6Ni da sa kila oqo, ni rau sa lauvako vata kaya ki na kauveilatai na noda tamata makawa, me takali kina na yago ni valavala ca, me da kakua tale ni bobula ki nai valavala ca.

7Ni sa sereki mai nai valavala ca ko koya sa mate tu.

8Ia kevaka eda sa mate vata kei Karisito, eda vakadinata ni da na bula vata kaya talega.

9Ni da sa kila ni sa vakaturi cake tale mai na mate na Karisito, ena sega ni mate tale; sa sega tale ni rawai koya na mate.

10Na mate ka mate kina ko koya, a sa mate vakadua e na vuku ni valavala ca; ia na bula ka bula kina, sa bula ga vua na Kalou.

11Mo dou vaka talega kina ni dou sa vakasami kemudou mo dou sa mate sara ki nai valavala ca ka bula vua na Kalou e na vuku i Karisito Jisu.

12O koya me qai kakua ni gumatua nai valavala ca e na yagomudou sa mate rawa, mo dou muria na kena gagadre ca.

13Kakua talega ni solia na veitikimudou ki nai valavala ca me caka kina na ka ca, ia dou soli kemudou ga vua na Kalou, me vaka dou sa bula mai na mate, kei na veitikimudou vua na Kalou me caka kina na ka e dodonu.

14Ni na sega ni veitaliataki kemudou nai valavala ca, ni dou sa sega ni lewai e na vunau, e na loloma ga.

Bobula ki nai Valavala Dodonu

15Ia ka vakaevei? Me da sai valavala ca tiko li, ni da sa sega ni lewai e na vunau, ka e na loloma ga? E segai sara.

16Dou sa sega beka ni kila, o koya yadua dou sa soli kemudou vua mo dou nona tamata mo dou talairawarawa vua, dou sa nona tamata ga dou sa talairawarawa kina; se ki na caka cala mo dou mate kina, se ki na caka dodonu mo dou vakadonui kina?

17Ia me ia na vakavinavinaka vua na Kalou, ni dou sa muria, mai na vu ni yalomudou, koi kemudou ka bobula ki nai valavala ca, nai vakarau ni vakavuvuli dou sa vakatavulici kina.

18Ia ni dou sa qai sereki mai nai valavala ca, dou sa qai qarava nai valavala dodonu.

19Au sa vosa vakatamata ga, ni sa malumalumu na yagomudou. Ia me vaka dou a solia eliu na veitikimudou me ra qarava na ka dukadukali, kei nai valavala ca me levu kina na ca, mo dou qai solia vakakina na veitikimudou me ra qarava na ka dodonu me caka kina na ka savasava.

20Ni dou a bobula tiko ki nai valavala ca, dou a yawa tu ki nai valavala dodonu.

21Ia ka cava na vuana dou sa rawata, e na gauna ko ya, mai na veika dou sa qai madua kina? Ni sa kenai cavacava ni veika oqori na mate.

22Ia ni dou sa qai sereki mai nai valavala ca, ka yaco me tamata ni Kalou, dou sa qai rawata na vuana e nai valavala savasava; kei nai cavacava, na bula tawa mudu.

23Ni sa kenai sau ni valavala ca na mate, ia sai solisoli walega ni Kalou na bula tawa mudu, e na vuku i Karisito Jisu na noda Turaga.