Same 147 - Ai Vola Tabu (Vakadewa Makawa Vakavoutaki 2021)（FRV21）

Me Vakacaucautaki na Veikaroni ni Kalou me Baleti Jerusalemi

1Dou ia na vakavinavinaka vei Jiova!

Ni sa ka vinaka me seretaki na vakavinavinaka vua na noda Kalou;

ni sa ka kamikamica; ka sa kilikili na vakavinavinaka.

2Sa tarai Jerusalemi cake ko Jiova;

sa soqoni ira vata na Isireli era sa vakasevi.

3Sa vakabulai ira sa kavoro na utodra,

ka sa vauca na nodra mavoa.

4Sa wilika ko koya na kedrai wiliwili na kalokalo;

sa vakayacani ira kecega.

5Sa levu na noda Turaga, ka levu na nona kaukauwa;

ka sa sega ni kilai rawa na nona vuku.

6Sa vakalevulevui ira na yalomalumalumu ko Jiova;

sa vakabalei ira ki na qele nai valavala ca.

7Dou seretaka na vakamolimoli vei Jiova;

dou sere e na api vua na noda Kalou.

8O koya sa tabonaka na lomalagi e na o,

o koya sa vakarautaka na uca me tau ki vuravura,

o koya sa vakatubura na co e na veiulunivanua.

9O koya sa solia na kedra na manumanu,

kei na kedra na luve ni reveni ni ra sa tagi.

10Sa sega ni marautaka ko koya na kaukauwa ni ose,

sa sega ni rekitaka na yava ni tamata.

11Sa rekitaki ira ko Jiova era sa rerevaki koya,

ko ira era sa nuitaka na nona loloma.

12Mo vakavinavinaka vei Jiova, ko iko Jerusalemi;

mo ia na vakavinavinaka vua na nomu Kalou, ko iko Saioni.

13Ni sa vakaukauwataka ko koya nai sogo lawalawa ni nomu matamata-ni-koro;

sa vakalougatataki ira na luvemu e na nomu loma ni koro.

14Sa vakayacora na sautu ko koya e na nomu vanua,

ka sa vakamamautaki iko e na witi vinaka sara.

15Sa tala yani na nona vunau e vuravura;

sa cici vakusakusa sara na nona vosa.

16Sa solia mai na uca-vulavula me vaka na vutika ni sipi;

sa vakamimiraca na tegu cevata me vaka na dravusa.

17Sa vakatauca na wai cevata me vaka na meme ni kakana—

o cei sa vosota rawa na nona liliwa?

18Sa vosa yani ko koya, ka vakawaicalataka;

sa vakaliwava na nona cagi, ka sa dave yani na wai.

19Sa tukuna na nona vosa vei ira na Jekope,

na nona vunau kei na nona lewa vei ira na Isireli.

20Sa sega ni caka vakaoqo ko koya ki na dua na matanitu;

ia era sa sega ni kila na nona lewa.

Dou ia na vakavinavinaka vei Jiova!