1Ai vakarau lasu sa ka vakasisila vei Jiova,
ia nai vakabibi dodonu na ka e vinakata ko koya.
2Ni sa tubu mai na viavialevu, sa qai tubu talega na madua;
ia sa tu vei ira na yalomalumalumu na vuku.
3A nodra lomadina na yalododonu ena tuberi ira,
ia na nodra yaloveve na talaidredre ena vakarusai ira.
4Sa sega ni yaga nai yau e na siga ni cudru,
ia nai valavala dodonu sa ia na veivakabulai mai na mate.
5A nona yalododonu na lomadina ena vakadodonutaki kina na nona sala,
ia na nona ca na tamata ca ena bale kina ko koya.
6A nodra caka dodonu na yalododonu na ka era na vakabulai kina,
ia na nodra caka ca na tamata be era na rawai kina.
7Ni sa mate na tamata ca sa yali na ka e nuitaka,
kei na ka era nuitaka ko ira sa sega ni yalododonu ena yali ga.
8Sa dauvakabulai mai na ka rarawa na yalododonu,
ka sa yaco na tamata ca me kenai sosomi.
9Na gusuna na dauveivakaisini sa ca kina na kai nona,
ia na nodra vuku na yalododonu, era sa vakabulai kina.
10Sa reki na koro ni ra sa yaco ko ira na yalododonu,
ia ni ra sa rusa na tamata ca, sa ia na kaikaila.
11Ni ra sa ia na vosa ni veivakalougatataki na yalododonu, sa laveti na totoka ni koro,
ia e na gusu ni tamata ca sa vukici kina.
12Sa beca na kai nona ko koya sa sega ni vuku,
ia na tamata yalomatua sa na tiko lo.
13Ko koya sa lako voli ka daukakase sa tukuna tiko na ka e vuni tu,
ia ko koya sa yalodina e sega ni dautukuna na ka.
14Ni sa sega na bose vuku, ena ca na tamata,
ia sa na yaco na tiko vinaka ni sa lewe vuqa na daubose.
15Ena kune ka rarawa ko koya sa ia na veiyalayalati mei sosomi ni kai tani,
ia ko koya sa cata ni ia na veiyalayalati sa na yalodei.
16Na yalewa yalovinaka sa rogo vinaka tiko,
kei na tagane kaukauwa era sa taura tiko nai yau.
17A tamata yalololoma sa caka vinaka ki na yalona,
ia sa vakararawataka na yagona dina ko koya na lomaqa.
18Na tamata ca sa daucakacaka vakailasu,
ia vei koya sa kaburaka nai valavala dodonu ena dua dina kina na kenai sau vinaka.
19Me vaka sa rawa na bula e nai valavala dodonu,
sa vakakina ko koya sa cicimuria na ca, ena mate kina ko koya.
20Era ka vakasisila vei Jiova ko ira na yaloveve,
ia sa rekitaki ira sa dodonu na nodra i valavala.
21Ke ra veitauri liga ko ira sai valavala ca, era na sega ni dro bula rawa kina,
ia na nodra kawa na yalododonu era na vakabulai.
22Me vaka na mama koula e na ucu ni vuaka,
sa vakakina na yalewa matavinaka sa sega ni yalomatua.
23Sa ka vinaka duaduaga na ka era gadreva ko ira na yalododonu,
ia na ka era nuitaka ko ira nai valavala ca na cudru.
24Sa dua sa duibiubuita, ka sa tubu ga me levu;
sa dua talega sa maninitaka na ka ni sa sega ni dodonu,
ka sa tubu ga kina na dravudravua.
25A daulomasoli ena vakamamautaki,
ia ko koya sa vagunuva na tani ena vagunuvi talega ko koya.
26O koya sa maninitaka na sila, era na rukaki koya na tamata,
ia na vosa ni veivakalougatataki ena tauca na ulu i koya sa volitaka.
27O koya sa gumatua ni caka vinaka ena kune loloma,
ia ko koya sa gu ni caka ca, ena yaco vua.
28O koya sa vakararavi e na nona i yau ena bale,
ia na yalododonu era na bulabula me vaka na tabanikau.
29O koya sa vakararawataka na nona vale, sa na taukena na cagi,
ko koya talega sa lialia ena qaravi koya na lomavuku.
30A ka sa vuataka ko koya na yalododonu sa dua na kau ni bula,
ko koya talega sa rawa na yalo sa vuku.
31 1Pita 4.18 Raica, ko ira na yalododonu era na saumi e vuravura,
ka na vakalevu cake ko koya na dautalaidredre kei nai valavala ca.
Who We AreWhat We EelieveWhat We Do
2025 by iamachristian.org,Inc All rights reserved.
