Jope 39 - Ai Vola Tabu (Vakadewa Makawa Vakavoutaki 2021)（FRV21）

1“Ko sa kila beka na gauna sa dauvakasucu kina na me ni veiulunivanua?

Ko sa bau dauvakadikeva li na vakasucu ni dia ni veikau?

2Ko rawa beka ni wilika na levu ni vula era yacova,

ka ko kila beka na gauna era vakasucu kina,

3e na gauna era koto sobu kina, ka vakarautaki ira na luvedra,

ka ra sa vakasucuma na luvedra?

4Sa kaukauwa vinaka na luvedra, era sa tubu cake e na vanua galala;

era sa lako yani, ka sega ni lesu tale vei ira.

5“Ko cei sa vakatala na asa kila me lako yani e na galala?

Ko cei sa sereka nai vesu ni asa yava totolo,

6o koya ka'u sa cakava vua na vanua lala me nona vale,

kei na vanua talasiga me nona i tikotiko?

7Sa beci ira na lewe vuqa e na koro;

ka sa sega ni rogoca na nona kaila na draiva.

8Sa daulakova na veiulunivanua me kana voli kina,

ka sa dauvakasaqara na co drokadroka kecega.

9“Ena via qaravi iko beka na bulumakau yadru kila?

Ena via tiko bogi dua beka e na nomu lomanibai?

10Ko sa vauca rawa beka e na kena dali ki nai siviyara,

se na muri iko ko koya me na qaru qele e na buca?

11Ko na vakararavi li vua ni sa levu na nona kaukauwa,

ka ko na biuta beka vua na nomu i tavi cakacaka?

12Ko vakabauti koya li me na kauta lesu mai na nomu sila

ka yauta mai ki na nomu lololo?

13“Na taba ni ositeriji sa dautevuki ka vakacakurobaroba,

ia na tabana kei na lawena sa sega ni vuka rawa vaka na belo.

14Ni sa vakotora tu ga na kena yaloka ki na qele

ka laiva me vakatakatataki e na kuvu-ni-soso,

15ka sa guilecava ni na rawa ni butuka na tamata

se na buturaka na manumanu kila.

16Sa loma kaukauwa vei ira na luvena, me vaka era sega ni nona;

sa oca wale ko koya, ka sa sega ni rere,

17baleta ni sa vakayacora vua na Kalou me guilecava na vuku,

ka sa sega ni vakayalomatuataki koya.

18Na gauna sa tevuka cake kina na vuti ni tabana ko koya me dro,

a sa dredrevaka ga na ose kei koya sa vodoka.

19“Ko sa solia beka vua na ose na kaukauwa?

Ko sa vakatobetaka na domona e na tobe balavu?

20Ko sa qisi koya beka me rika me vaka na vodre?

Na suru ni ucuna sa ka rerevaki.

21Sa qeva na buca e na yavana, ka reki e na nona kaukauwa;

ka sa lako yani me la'ki tavaki ira nai yaragi.

22Sa dredrevaka na rere, ka sa sega ni taqaya;

sa sega talega ni dro tani mai nai seleiwau.

23Sa taqa ki vua na taga ni gasau,

kei na moto makamakalivata kei nai sasabai.

24Sa tiloma na qele e na nona lomakatakata kei na cudru;

ka sa sega ni tu vakadua ni sa rogo mai na uvu ni davui.

25Ni sa voqa mai na domo ni davui, sa kaya ko koya ‘Aa!’

A sa boica nai valu ni sa yawa tu,

kei na nodra kurukuru na kavetani, kei na kaikaila.

26“Sa vuka cake beka na manulevu e na nomu vuku,

ka vakatetaba me vuka ki na mata ni ceva?

27Sa vuka cake beka na ikeli ni ko sa vakarota,

ka cakava mai cake na nona sova?

28Sa bula voli mai na uluvatu ka sa cakava na nona sova

e na bati ni uluvatu ka vanua dredre.

29Mai na vanua ko ya sa irova mai kina na kena;

sa raica rawa na matana mai na dua na vanua yawa sara.

30 Maciu 24.28; Luke 17.37 Ko ira na luvena era sa daugunu dra;

ia e na vanua sa no kina na mate, sa tiko kina ko koya.”