Vakarua 6 - Ai Vola Tabu (Vakadewa Makawa Vakavoutaki 2021)（FRV21）

Nai Vunau Levu Duadua

1“Sa vakaoqo na vunau—nai lesilesi kei na lewa—ka sa vakarota vei au ko Jiova na nomuni Kalou me'u vakavulica vei kemuni, mo ni cakava e na vanua ko ni sa lako yani kina mo ni taukena,

2mo ni rerevaki Jiova kina na nomuni Kalou, ka mo ni vakabauta kina na nona i vakaro kecega kei na nona vunau ka'u sa vakarota vei kemuni, koi kemuni, kei na luvemuni, kei na luvena na luvemuni, e na veisiga kecega ko ni sa bula kina, ka me dede kina nomuni bula.

3Ia mo ni rogoca mada, na Isireli, ka vakabauta mo ni cakava, me yacovi kemuni kina na ka vinaka, ka mo ni tubu me lewe levu sara me vaka sa yalataka vei kemuni ko Jiova na Kalou ni nomuni qase, e na vanua sa dave kina na sucu kei na oni.

4 Mari 12.29 “Mo ni rogoca, na Isireli: Ko Jiova na noda Kalou, ko Jiova sa dua bau.

5Maciu 22.37; Mari 12.30; Luke 10.27Mo ni lomani Jiova na nomuni Kalou e na lomamuni taucoko, kei na yalomuni taucoko, kei na nomuni kaukauwa taucoko.

6Vrua 11.18-20Ia na vosa oqo ka'u sa vakarota vei kemuni e na siga oqo, me tiko ga e na lomamuni.

7Mo ni gumatua ni vakavulica vei ira na luvemuni, ka dauvosataka ni kemuni sa tiko e na nomuni vale, ni kemuni sa lako voli talega e na sala, ni kemuni sa davo sobu, ka ni kemuni sa duri cake.

8Ia mo ni vauca mei vakatakilakila e na ligamuni, ia me ra vaka nai ukuuku e na maliwa ni matamuni.

9Mo ni vola talega e na duru ni sogo ni nomuni vale, kei nai sogo ni nomuni matamata-ni-koro.

Nai Vakaro me Baleta na Talaidredre

10 Vteki 12.7; 26.3; 28.13 “Ia ni sa kauti kemuni ko Jiova na nomuni Kalou ki na vanua sa bubului kina ko koya vei iratou na nomuni qase, vei Eparaama, vei Aisake, kei Jekope, me solia vei kemuni—ki na veikoro lelevu ka vinaka ko ni a sega ni tara,

11kei na veivale sa oso e na ka vinaka kecega ka ko ni a sega ni vakasinaita, kei na veikeli-wai ko ni a sega ni kelia, na veivaini kei na veiolive ko ni a sega ni tea—ka gauna ko ni sa kana ka mamau kina,

12mo ni qarauni kemuni de ko ni qai guilecavi Jiova, ko koya ka kauti kemuni mai na vanua ko Ijipita, mai na vale ni veivakabobulataki.

13Maciu 4.10; Luke 4.8Mo ni rerevaki Jiova ga na nomuni Kalou, ka qaravi koya, ka cavuta duaduaga na yacana ni ko ni sa bubului.

14Mo ni kakua ni muria na veikalou tani, na nodra veikalou na veimatanitu sa tiko vakavolivoliti kemuni,

15ni sa Kalou vuvu ko Jiova na nomuni Kalou e na kemuni maliwa; de waqa vei kemuni na cudru i Jiova na nomuni Kalou, ka vakawabokotaki kemuni mai na dela i vuravura.

16 Lako 17.1-7; Maciu 4.7; Luke 4.12 “Mo ni kakua ni vakatovolei Jiova vakaca na nomuni Kalou, me vaka ko ni a vakatovolea vakaca mai Masa.

17Mo ni vakabauta vakavinaka na vunau i Jiova na nomuni Kalou, kei na nona i vakaro, kei na nona i lesilesi, sa vakarota vei kemuni ko koya.

18Ia mo ni cakava na ka e dodonu ka vinaka e na mata i Jiova, me yacovi kemuni kina na ka vinaka, ia mo ni yaco kina mo ni taukena na vanua vinaka sa bubului kina ko Jiova vei ira na nomuni qase,

19me vakaseva tani e matamuni na nomuni meca kecega, me vaka sa yalataka ko Jiova.

20“Ni ra sa tarogi kemuni na luvemuni e na gauna mai muri, ka vaka, ‘A cava nai balebale ni vakaro, kei nai lesilesi, kei na lewa, sa vakarota vei kemuni ko Jiova na noda Kalou?’

21ko na qai kaya vua na luvemuni tagane, ‘Eda a bobula vei Fero mai Ijipita; a sa kauti keda tani mai Ijipita ko Jiova e na liga kaukauwa.

22A sa vakayacora ko Jiova eso nai vakatakilakila, kei na cakacaka mana e levu ka veivakararawataki, ki Ijipita, kivei Fero, kei na nona lewe-ni-vuvale kece, e matada.

23A sa kauti keda tani mai kina, me vakayacori keda, me solia vei keda na vanua sa bubului kina ko koya vei ira na noda qase.

24A sa vakaroti keda ko Jiova me cakava nai lesilesi kecega oqo, me da rerevaki Jiova na noda Kalou, me yacovi keda tikoga na ka vinaka, ka me vakabulai keda, me vaka e na siga oqo.

25Ia na ka oqo eda na dodonu kina, ni da sa vakabauta ka cakava nai vakaro kecega oqo e na mata i Jiova na noda Kalou, me vaka sa vakaroti keda ko koya.’