Taniela 8 - Ai Vola Tabu (Vakadewa Makawa Vakavoutaki 2021)（FRV21）

Na Raivotu ni Sipi Tagane kei na Me Tagane

1E nai katolu ni yabaki ni lewa i Pelisasari na tui sa dua na raivotu e rairai vei au, io vei au ko Taniela, a sa tarava na ka ka rairai vei au eliu.

2Ia ka'u a raica na raivotu; a sa yaco, ni'u a raica, ka'u sa tiko mai Susa na vale vakaturaga, e na yasana vaka-Ilama; ia ni'u a raica na raivotu, ka'u a tiko e na bati ni uciwai ko Ulai.

3Ia ka'u a ta cake ka raica, sa dua na sipi tagane ka tu e na bati ni uciwai, a sa rua na kenai leu. Ia nai leu oqori sa cecere, ka dua sa cecere vei rau, ia ko ya sa cecere, sa tubu e muri.

4Au a raica na sipi tagane ni sa cumu tu vaka ki na ra, kei na vualiku, kei na ceva; a sa sega so na manumanu sa tu rawa e matana, sa sega talega e rawata me kaliraka mai na ligana; sa cakacaka ga ko koya me vaka na nona veitalia, a sa tubu me levu.

5Ia ni'u a vakananuma tiko, raica, sa dua na me tagane sa lako mai na ra ka lakova na dela i vuravura taucoko, a sa sega ni tara na qele. Ia na me tagane oqo sa dua na kenai leu vakaitamera e na maliwa ni matana.

6A sa lako mai ko koya ki na sipi tagane sa rua na kenai leu, o koya ka'u a raica ni sa tu e na bati ni uciwai, a sa ciciva mai e na nona cudru kaukauwa.

7Ia ka'u a raici koya ni sa toro mai ki na sipi tagane, ka sa yalo ca vua, ka sa vala kei na sipi tagane, ka musuka ruarua na kenai leu. Ka sa sega na kaukauwa vua na sipi tagane me tu rawa e matana, a sa vakabalei koya sobu ki na qele, ka buturaka. Ka sa sega e dua sa kaliraka rawa na sipi tagane mai na ligana.

8Ia na me tagane sa tubu kina me ka levu sara; ia ni sa kaukauwa ko koya, sa qai ramusu mai na kenai leu levu. A sa tubu cake mai me kenai sosomi e va na ka vakaidina, vaka ki na mata ni cagi vava kei lomalagi.

9Ia mai na dua vei iratou sa tubu mai e dua nai leu lailai, ka sa yaco me levu sara, vaka ki na mata ni ceva, ki na tokalau talega, ka vaka ki na vanua matalau.

10Vtaki 12.4A sa viavialevu mai, io vei ira nai vavakoso vakalomalagi; ka sa biuta sobu ki na qele eso vei ira nai vavakoso kei na kalokalo, ka buturaka.

11Io sa viavialevu talega ko koya vua na turaga ni vavakoso, ka sa kauta tani nai soro ni veisiga, ka sa biu wale na tikina ni nona vale tabu.

12Ia nai vavakoso, sa soli vata yani kei nai soro ni veisiga e na vuku ni talaidredre, a sa biuta na ka dina ki na qele; a sa cakacaka tiko ka yaco.

13Au a qai rogoca e dua sa yalosavasava ni sa vosa, ka sa vosa e dua tale na yalosavasava vua sa vosa eliu, “Me bogi vica tiko li na raivotu ni soro ni veisiga, kei na talaidredre sa vuna na veivakarusai, me soli vata kina na vale tabu kei nai vavakoso me buturaki sobu?”

14A sa kaya vei au ko koya, “Me bogi rua na udolu ka tolu na drau; ena qai vakasavasavataki na vale tabu.”

Sa Vakamacalataka ko Kaperieli na Raivotu

15A sa yaco, ni'u sa raica oti na raivotu, koi au ko Taniela, ka sa qara tiko na kenai balebale, raica, sa qai tu mai e mataqu e dua sa rairai vaka na tamata.

16Luke 1.19,26Ia ka'u sa rogoca na domo ni tamata e na maliwa ni bati ni uciwai ko Ulai, a sa kaci, ka kaya, “Ko iko Kaverieli, mo vakamacalataka vua na tamata oqo na raivotu.”

17A sa toro voleka mai ko koya ki na tikina ka'u sa tu kina, ia ni sa lako mai ko koya, ka'u sa rere, ka cuva vakatoboicu. Ia sa kaya vei au, “Mo kila, ko iko na luve ni tamata, ni sa baleta ga nai vakataotioti ni gauna na raivotu.”

18Ia ni sa vosa tiko vei au ko koya, ka'u sa moce lutu, ka vakanamata ki na qele; ia sa tarai au ko koya, ka sa vakaturi au cake me'u tu e na yavaqu.

19Ka kaya, “Raica, au na vakatakila vei iko na ka ena yaco e nai otioti ni cudru; ni na yaco ga e na gauna sa lokuci e nai vakataotioti ni gauna.

20A sipi tagane ko a raica, ka rua na kenai leu, koi rau na tui Mitia kei na tui Perisia.

21Ia na me vutivutia, sai koya na tui Kirisi, kei nai leu levu e na maliwa ni matana, sa kenai matai ni nodra tui.

22Ia ni sa musuki ko ya, ka tubu mai e va me kenai sosomi, ena tubu mai e va na matanitu mai na matanitu ko ya, ka na sega ni kaukauwa me tautauvata kaya.

23Ia e na gauna ki muri ni nodratou matanitu,

ni sa qai rui levu mai na nodra ca na dautalaidredre,

ena qai tubu mai e dua na tui e mata qaqa,

ka daukila vere.

24Ia ena gumatua ko koya ni sa qaqa,

ia sa sega ni nona dina na qaqa;

ena ka vakaidina na nona dauveivakacacani,

ena yaco ko koya ka cakacaka tiko.

Ka vakarusai ira sa kaukauwa,

kei na matanitu tabu.

25Ia ni sa qaseqase talega ko koya

ena vakayacora tiko na vere ni ligana,

ena daudokai koya talega e lomana.

Ia ni ra sa sautu tiko ena vakarusai ira kina na lewe vuqa,

ena bolei koya talega na nodra Turaga na turaga.

Ia ni sa sega na liga e tarai koya ena musuki ga ko koya.

26Ia sa dina ga na raivotu ni veiyakavi kei na veimataka sa tukuni oti. Ia ko iko, mo maroroya nai vola ni raivotu, ni sa ka ni gauna ka yawa.”

27Ia koi au, ko Taniela, ka'u a ciba, ka qai tauvi mate bogi vica; ka oti, ka'u sa tucake, ka cakava na nona cakacaka na tui. Ia ka'u a kidacalataka na raivotu, ka sa sega ni'u kila vakavinaka.