2 Samuela 15 - Ai Vola Tabu (Vakadewa Makawa Vakavoutaki 2021)（FRV21）

Sa Tuvatuva-ka ko Apisalome me Tui

1Sa oti na ka oqo, sa qai vakarautaka vua ko Apisalome eso na qiqi-ni-turaga ka so na ose, kei na tamata daucici e lewe limasagavulu me liu tiko vua.

2A sa dau sou e na veimataka ko Apisalome, ka la'ki tu e na bati ni sala mai na matamata-ni-koro. Ia ni sa lako mai vua na tui e dua na tamata me lewa e na vuku ni dua na ka sa veiletitaki, sa qai daukacivi koya ko Apisalome, ka kaya, “O cei na koro ko sa lako mai kina?” Ia ni sa kaya vakaoqo, “Sa lako mai na yavusa o ka e Isireli na nomuni tamata,”

3sa qai daukaya vua ko Apisalome, “Raica, sa vinaka ka dodonu na ka ko lako mai kina, ia sa sega ga ni dua e lesia na tui me rogoci iko.”

4E qai daukaya tale ko Apisalome, “Ke'u lesi mada ga me'u turaganilewa ni vanua oqo! Era na qai lako mai kina vei au na tamata yadua sa dua na nona ka sa veiletitaki se dua na ka me lewai, ia ka'u na lewa vakadodonu vua.”

5Ia ni sa toro mai e dua na tamata me vakarokoroko vua, sa daudodoka yani na ligana ko koya, ka tauri koya, ka reguca.

6A sa cakava vakaoqo ko Apisalome vei ira kecega na Isireli era sa lako mai vua na tui me ia na veilewai. A sa rawa kina na yalodra na Isireli ko Apisalome.

7Sa oti e vasagavulu na yabaki, sa qai kaya vua na tui ko Apisalome, “Me'u lako mada me'u vakayacora na noqu bubului ka'u a cavuta vei Jiova mai Epironi.

8Ni sa cavuta na bubului na nomuni tamata, ni'u a tiko mai Kesuri mai Siria, ka kaya, ‘Kevaka sa na vakalesui au tale ki Jerusalemi ko Jiova, au na qai qaravi Jiova.’ ”

9A sa kaya vua ko koya na tui, “Mo lako e na vakacegu.” A sa ia ko koya, ka lako ki Epironi.

10Ia sa tala ko Apisalome eso na dauvakau-i-tukutuku vuni me ra lako lo ki na nodra yavusa kecega na Isireli, me ra kaya, “Ni dou sa rogoca ni uvu na davui, dou qai kaya, ‘Sa tui mai Epironi ko Apisalome!’ ”

11A ra sa lako vata kei Apisalome e le rua na drau na tamata mai Jerusalemi; era sa vulagi sureti, ka ra sa lako e na savasava ni vakasama, ni ra sa sega ni kila e dua na ka.

12A sa talatala ko Apisalome me lako mai na nona koro mai Kilo, ko Eitofeli na kai Kilo, na daunivakasala i Tevita, ka ni sa vakacabora tiko nai soro ko koya. A sa kaukauwa cake na buki vere, ni ra sa lewe levu cake tikoga na tamata era sa vuki vei Apisalome.

Sa Dro Tani mai Jerusalemi ko Tevita

13A sa lako mai vei Tevita e dua na tamata daukau-i-tukutuku, ka kaya, “Sa golevi Apisalome na yalodra na Isireli.”

14Sa qai kaya ko Tevita vei ira kecega na nona tamata era tiko vata kaya mai Jerusalemi, “Tou mai ia! Me da sa dro, de qai sega ni da vakabulai rawa mai vei Apisalome. Totolo, de vauci keda vakasauri ko koya, ka vakacacani keda, ka samuta na koro e nai seleiwau.”

15A ra sa kaya vua na tui ko ira na nona tamata, “Ko ira na nomuni tamata sa vakarau tu me ra kitaka na ka kecega ko ni sa vinakata na neimami turaga na tui.”

16Sa qai lako yani na tui, ka sa muri koya ko ira kecega na nona lewe-ni-vuvale. A sa laiva na tui e lewe tini na yalewa, eratou watina lalai, me vakatawa na vale.

17Ka sa lako yani na tui, ka ra sa muri koya ko ira kecega na tamata; a ra sa la'ki tao e nai otioti ni vale.

18A ra sa lako siviti koya ko ira kecega na nona tamata; kei ira kecega na Kireci, kei ira kecega na Pileci, kei ira kecega na kai Kaca, era le ono na drau na tamata era sa muri koya mai Kaca, era sa lako siviti koya na tui.

19Sa qai kaya na tui vei Itei na kai Kaca, “A cava ko sa lako talega kina kei keda? Mo lesu, ka tiko kei koya na tui, ni ko sa kai tani ko iko, ka sa tiko vulagi walega.

20O a lako walega mai e na noa, ia me'u vakavuna li edaidai na nomu veilakoyaki kei keimami, ka ni'u sa lako oqo koi au ki na vanua ka'u sa sega ni kila? Mo lesu tale, ka kauti ira vata tale kei iko na wekamu e na loloma kei na dina.”

21Ia sa sauma vua na tui ko Itei, ka kaya, “Me vaka sa bula ko Jiova, ka sa bula na noqu turaga na tui, ena tiko ga na nomuni tamata e na tikina sa tiko kina na noqu turaga na tui, se na bula se na mate.”

22Ka sa kaya vei Itei ko Tevita, “Mo qai lako yani, ka liu yani.” A sa qai lako yani ko Itei na kai Kaca, kei ira kecega na nona tamata, kei ira kecega na lalai era tiko vata kaya.

23A ra sa tagi vakadomoilevu na vanua taucoko ni ra sa lako takoso na tamata kecega, ka sa lako kosova talega na tui na soniwai ko Kitironi, ka ra sa lako yani na tamata kecega vaka ki na vanua lala.

24Ka sa lako cake mai ko Epaiaca, ka raica, sa lako talega mai ko Setoki vata kei ira kecega na Livai, ka ra sa colata tiko na kato ni veiyalayalati ni Kalou. A ra sa tauca sobu na kato ni Kalou me yacova ni ra sa lako sivita kece na koro ko ira kecega na tamata.

25Sa qai kaya vei Setoki na tui, “Mo kauta tale yani ki na koro na kato ni Kalou. Kevaka sa lomani au ko Jiova, ena vakalesui au tale ko koya me'u raica na ka oqo kei na nona vale talega.

26Ia kevaka sa kaya vakaoqo, ‘Au sa sega ni vinakati iko,’ raica, au sa tu vakarorogo oqo, me kitaka ga vei au ko koya na ka e vinaka vua.”

27Sa kaya talega vei Setoki na bete ko koya na tui, “E sega beka ni dua na daurai ko iko? Mo lesu tale ki na koro e na vakacegu, kei rau talega na luvemudrau, ko Eiimaasi na luvemu, kei Jonacani na luve i Epaiaca.

28Raica, ka'u na wawa toka e na buca ni vanua lala me yacova ni sa yaco mai e dua na nomudou i tukutuku vei au.”

29A sa kauta lesu tale na kato ni Kalou ki Jerusalemi ko Setoki kei Epaiaca, ka rau sa tiko ga mai kea.

30Ia sa cabe cake ko Tevita e nai cabecabe ni Ulunivanua ni Veiolive, ka sa tagi voli ni sa lako tu, ka sa ubi tu na uluna, ka sa sega ni vakaivava na yavana. A ra sa ubia na uludra na tamata kecega era tiko vata kaya, ka ra sa lako cake, ka tagi lako ga.

31A sa tukuni vei Tevita, ka vaka, “Ko Eitofeli sa tiko vata kei ira era bukivere vata kei Apisalome.” A sa kaya ko Tevita, “I Jiova, au masuti kemuni mo ni vakasesea mada na ka sa vakasalataka ko Eitofeli.”

32Ni sa yaco ki delana ko Tevita, e na vanua sa daulotu kina vua na Kalou, raica, sa tavaki koya ko Usai na Ariki ka sa kadresu tu na nona kote ka kaburaki tu e uluna na qele.

33A sa kaya vua ko Tevita, “Kevaka ko na lako vata kei au, ko na vakaicolacolataki au vakalevu.

34Ia kevaka ko sa lesu tale ki na koro, ka kaya vei Apisalome, ‘Ka'u na nomuni tamata, koi kemuni na tui; ni ka'u sa nona tamata na tamamuni eliu, ia ka'u na qai nomuni tamata talega,’ ka o na qai vakamalumalumutaka kina e na vukuqu na ka e vakasalataka ko Eitofeli.

35Sa sega li ni tiko vata kei iko mai kea koi rau na bete, ko Setoki kei Epaiaca? O koya oqo, na ka kecega ko na rogoca mai na nona vale na tui, mo qai tukuna vei rau na bete ko Setoki kei Epaiaca.

36Raica, sa tiko vata kei rau mai kea na luvedrau, ko Eiimaasi, na luve i Setoki ka tagane, kei Jonacani, na luve i Epaiaca ka tagane; ia mo dou dautalai rau mai vei au me tukuna na ka kecega dou sa rogoca.”

37Ni sa lesu yani ki na koro ko Usai nai tau i Tevita, a se qai curu sara tikoga ki Jerusalemi ko Apisalome.