Isikeli 38 - Ai Vola Tabu (Vakadewa Makawa Vakavoutaki 2021)（FRV21）

Na Kaba Vakaivalu i Koki

1A sa yaco vei au na vosa i Jiova, ka vaka:

2Vtaki 20.8“Ko iko na luve ni tamata, mo vakanamata mada ki Koki, na vanua nei Mekoki, na nodra turaga na Meseki kei Tupali, ka parofisaitaka na ca ena yaco vei ira,

3ka mo vaka, Sa kaya vakaoqo na Turaga ko Jiova: Raica, koi au na nomu meca, ko iko Koki, ka nodra turaga na Rosi kei na Meseki, kei na Tupali.

4Ia ka'u na vakalesui iko ki muri, ka vakacoba na siwa ki na gusumu, ka kauti iko mai, kei na nomu mataivalu kecega, na ose kei na tamata e vodo ose, era dui vakaisulu kecega e nai sulu ni valu, e dua nai vavakoso levu, era taura kecega nai sasabai kei nai vakaruru kei nai seleiwau.

5Ko ira vata kei Perisia, kei Eciopea, kei Libia, era vakaisasabai ka vakaivakaruru-ni-ulu kecega;

6ko Komera kei na nona mataivalu kecega; ko Peci-tokama mai na mata ni vualiku kei na nona mataivalu kecega—sa na le vuqa na tamata ena tiko vata kei iko.

7“Mo vakarau tu, ka mo dou vakarau tikoga, ko iko kei ira na nomu i soqosoqo kecega era sa soqoni vata vei iko, ka mo nodra i vakatawa.

8Sa vuqa mada na bogi, ko na qai cudruvi. Ni sa oti na veiyabaki, ko na qai valuta na vanua sa vakasukai lesu mai nai valu, ka vakasoqoni mai na veimataqali e vuqa, io ki na veiulunivanua i Isireli, ka dau lala tu ga. Ka sa qai kau tale mai na veimatanitu, ka ra na tiko vinaka vata ko ira kecega.

9Ko na cabe mai me vaka na cava, ko na lako cake mai me vaka na o, mo dou ubia na vanua, ko iko, kei na nomu mataivalu kecega, ia koi kemudou vata kei na veimataqali e vuqa.

10“Sa kaya vakaoqo na Turaga ko Jiova: Io, e na siga ko ya, ena qai tubu e lomamu eso na ka, ko na vakananuma talega e dua na nanuma ca

11ka ko na kaya, ‘Au na lako cake ka valuta na vanua sa tiko kina na veikoro e sega ni vakabai; au na lako ka vorati ira era sa tiko vakacegu ka sa ra tiko vinaka, sa ra tiko wale kecega ka sega na nodra bai, ka sa sega talega na nodra i vakadei se nai sogo’,

12me'u taura kina nai toki ni valu ka kauta na veika era taukena, ka mo vagolea kina na ligamu ki na veiyasana lala sa tawa tale, io vei ira na lewe-ni-vanua sa ra vakasoqoni mai na veimatanitu, sa ra vakamanumanu ka vakaiyau, ka ra sa tiko e na loma ni vanua.

13Ko ira mai Sipa kei Titana, kei ira na dauveivoli mai Tasisi, kei ira kece na kena luve ni laione, era na kaya vei iko, ‘Ko sa lako mai mo mai kauta nai toki ni valu, ne? Ko sa vakasoqoni ira li na nomu i soqosoqo mo kauta na veika era taukena, mo taura na siliva kei na koula, mo kauta tani na manumanu kei nai yau, me vesuki nai yau levu sara, ne?

14“O koya oqo mo ia kina na parofisai, ko iko na luve ni tamata, ka kaya vei Koki, Sa kaya vakaoqo na Turaga ko Jiova: E na siga ko ya ni ra qai tiko vinaka na noqu tamata na Isireli, ko na sega beka ni kila, ne?

15Ia ko na qai lako mai na nomu yasana mai na yasayasa vakavualiku, koi kemudou vata kei ira na lewe vuqa, era vodo ose kece, nai vavakoso levu, kei na mataivalu kaukauwa.

16Ia ko na cabe vakaivalu cake mai ki vei ira na noqu tamata na Isireli, me vaka na o me ubia na vanua; ena yaco e na gauna mai muri, ka'u na qai kauti iko mai ki na noqu vanua, me ra kilai au na veimatanitu tani, ni'u sa vakarokorokotaki vei iko, Koki, e matadra.

Na Cudruvi i Koki

17“Sa kaya vakaoqo na Turaga ko Jiova: Sai iko li ka'u a vosa kina eliu e na gusudra na noqu tamata na parofita ni Isireli, ka ra parofisai e na gauna ko ya me vuqa mada na yabaki ka'u na qai kauti iko mai vei ira?

18Ia sa kaya na Turaga ko Jiova ena yaco e na gauna talega ko ya ni sa lako vakaivalu mai ko Koki ki na vanua ko Isireli, ni na qai rairai e mataqu na noqu cudru.

19Ia e na dela ni noqu vuvu kei na noqu cudru waqawaqa, ka'u sa kaya, E dina, e na siga ko ya ena dua kina na uneune levu e na vanua ko Isireli.

20Era na sautaninini e na rere e mataqu na ika ni waitui, kei manumanu vuka, kei na manumanu ni vanua, kei na ka kecega sa qasi voli e na qele, kei na tamata kecega sa tiko e dela i vuravura. Ena talaraki sobu talega na veiulunivanua, ka lutu mai na uluvatu, ka bale sobu ki na qele na bai kecega.

21Ia ka'u na vakarota nai seleiwau me baleti Koki e na noqu veiulunivanua kecega, sa kaya na Turaga ko Jiova. Era na dui vala na tamata yadua kei na kai nona.

22Ia ka'u na ia na veilewai me baleti koya e na mate dauveiveitauvi kei na vakadave-dra, ka'u na vakatauca talega vua kei na nona mataivalu kei na veimataqali e vuqa era tiko kaya na uca tau bi, kei na uca-cevata lelevu, na bukawaqa, kei na sulifure.

23Ia ka'u na vakalevulevui au, ka vakarokorokotaki au, ni'u sa vakatakilai e matadra na veimatanitu e vuqa, ka ra na kila ni sai au ko Jiova.