Esiteri 3 - Ai Vola Tabu (Vakadewa Makawa Vakavoutaki 2021)（FRV21）

Sa Nakita ko Amani me Vakawabokotaki Ira na Jiu

1Ia ni sa oti na veika oqo sa qai vakaceceretaki Amani na luve i Emitaca ka tagane, na luve i Ekaki, ko Asuerosi na tui, a sa vueti koya cake, ka vakatikora na nona i tikotiko me cecere cake vei ira kecega na turaga era tiko vata kaya.

2A ra sa cuva sobu ka rokovi Amani ko ira kece na nona tamata na tui, e na matamata-ni-koro ni tui, ni sa vakakina nai vakaro ni tui e na vukuna. Ia sa sega ni cuva ko Motekai, se vakarokoroko vua.

3Era sa qai kaya vei Motekai ko ira na nona tamata na tui era sa tiko e na matamata-ni-koro ni tui, “A cava ko sa bese kina ki nai vakaro ni tui?”

4Ia ni ra sa vosa vua e na veisiga, a sa sega ni vakarorogo vei ira ko koya, era sa qai tukuna vei Amani, me ra kila se na donu na ka e kitaka ko Motekai, se segai, ni sa tukuna oti vei ira ko koya ni sa Jiu ko koya.

5Ia ni sa kunea ko Amani ni sa sega ni cuva ko Motekai, se vakarokoroko vua, sa qai cudru vakalevu ko Amani.

6Ia sa nanuma ni ka wale me vakamatei Motekai duaduaga. O koya sa segata kina ko Amani me vakarusai ira kecega na Jiu e na matanitu taucoko i Asuerosi, io ko ira era kai vata kei Motekai ni sa tukuni oti vua ni ra kai vata kei Motekai.

7E nai matai ni vula, na vula ko Nisani, e nai katinikarua ni yabaki i Asuerosi na tui, era sa cakava na Puri—a kenai balebale oqori “na vakawiri madigi”—e na mata i Amani e na veisiga, kei na veivula, me yacova nai katinikarua ni vula, io na vula ko Eta.

8A sa kaya ko Amani vua na tui ko Asuerosi, “Sa dua na matanitu era sa dui veiseyaki ka dui tikotiko kei ira na tamata, e na veiyasana kecega ni nomuni matanitu. A sa duatani na nodra lawa ka sa duatani na nodra na matanitu kecega, era sa sega talega ni vakabauta na nona lawa na tui, o koya sa sega kina ni yaga vei kemuni na tui mo ni vosoti ira.

9Kevaka sa vinaka vei kemuni na tui, me volai mada me ra vakawabokotaki. Ia koi au, au na solia e dua na oba na taledi (340,000 na kilokaramu) siliva ki na ligadra era sa lesi me vakayacora na ka oqo, ka me kau ki na nona valeniyau na tui.”

10A sa ucuna na mama ni sitaba mai na ligana ko koya na tui, ka solia vei Amani na luve i Emitaca, na luve i Ekaki, na nodra meca na Jiu.

11A sa kaya vei Amani na tui, “Sa soli vei iko na siliva, ko ira talega na tamata, mo kitaka vei ira na ka e vinaka vei iko.”

12Era sa qai kacivi ko ira na nona vunivola na tui, e nai katinikatolu ni siga e nai matai ni vula, a sa volai, me vaka na vosa kece i Amani, vei ira na nona tamata turaga na tui, kei ira na kovana ni veiyasana kecega, kei ira na turaga ni tamata kecega e na veiyasana, me vaka na kenai volavola, vei ira talega na tamata kecega e na nodra dui vosavosa; sa volai e na yaca ni tui ko Asuerosi, a sa tabaki na kena drega e na nona mama na tui.

13A sa kauta na veivola ko ira na tamata era sa daucicivaka nai vola ki na veiyasana kecega ni tui, ka me vakarusai ira na Jiu, ka vakamatea, ka vakaoti ira kecega, ko ira na gone kei ira na qase, na gone lailai kei ira na yalewa, e na dua bauga na siga, e nai katinikatolu ni siga e nai katinikarua ni vula, na vula ko Eta, me taura talega na nodra i yau mei toki-ni-valu.

14Sa qai lavetaki nai vola ka sa kau ki na veiyasana kecega me tukuni kina vei ira na tamata kecega nai vakaro ni tui, ka me ra vakarau tu ka waraka na siga ko ya.

15Era sa qai lako yani na tamata era daucicivaka nai vola, ni ra sa vakariritaki e na vosa ni tui, a sa soli nai vakaro mai Susa na koro vakaturaga. A rau sa tiko sobu me gunu vata ko koya na tui kei Amani; ia sa kidroa ga na koro ko Susa.