Isikeli 33 - Ai Vola Tabu (Vakadewa Makawa Vakavoutaki 2021)（FRV21）

Ko Isikeli nai Vakatawa i Isireli(Isikeli 3.16-21)

1Sa yaco tale vei au na vosa i Jiova, ka vaka:

2“Ko iko na luve ni tamata, mo vosa vei ira na luvedra na nomu tamata ka kaya vei ira, Ni kevaka ka'u sa kauta mai nai seleiwau ki na dua na vanua, ka ra kauta ko ira na lewe-ni-vanua e dua na nodra tamata ka lesi koya me nodra i vakatawa,

3ka kevaka sa raica ko koya nai seleiwau ni sa lako tiko mai ki na vanua ka sa mani uvuca kina na davui me vakasalataki ira na tamata,

4ka kevaka sa rogoca e dua na tamata na domo ni davui ka sega ni vakabauta, ka sa yaco mai nai seleiwau ka sa mate kina ko koya, sa na baleti koya duaduaga na nona mate.

5Sa rogoca ko koya na domo ni davui ka sa sega ni muria nai vakasala; na nona mate sa baleti koya ga. Ia kevaka e a muria nai vakasala ko koya, ena rawa ni vakabulai koya.

6Ia kevaka sa raica ko koya nai vakatawa ni sa lako tiko mai nai seleiwau, ka sa sega ni uvuca na davui, ka ra sa sega ni vakasalataki na tamata, ka kevaka sa yaco mai nai seleiwau ka sa mate kina e dua vei ira na tamata, sa mate yani ko koya e na nona i valavala ca, ia na nona dra ka'u na taroga vua nai vakatawa.

7“Ia ko iko, na luve ni tamata, ka'u sa qai lesi iko oqo mo nodra i vakatawa na vale i Isireli. Ena gauna cava ga ko rogoca kina na vosa sa tau mai na gusuqu, mo solia sara vei ira nai vakasala ni sa lako mai vei au.

8Kevaka ka'u sa kaya vua na tamata ca, “Ko iko na tamata ca, ko na mate vakaidina,” ka ko qai sega ni vosa vua na tamata ca mo vakasalataki koya me vuki tani mai na nona i tovo ca, sa na mate ga na tamata ca ko ya e na nona i valavala ca, ia na nona dra ka'u na taroga vei iko.

9Ia ko iko, kevaka ko sa vakasalataka na tamata ca e na vuku ni nona i tovo ca me sa biuta sara, ka sa sega ni biuta ko koya na nona i tovo, ena mate ga ko koya e na nona i tovo ca; ia ko iko, ko sa vakabula na yalomu.

Na Lewa Dodonu kei na Yaloveivosoti ni Kalou

10“Ia ko iko, na luve ni tamata, mo kaya vei ira na vale i Isireli; Dou sa dauvosa vakaoqo: ‘Ia na noda talaidredre kei na noda i valavala ca, sa saumi vei keda, ka da sa vuca yani kina. Ia eda na qai bula rawa vakaevei koi keda?’

11Mo kaya vei ira, Me vaka ni'u sa bula, sa kaya na Turaga ko Jiova, au sa sega ni vinakata me mate na tamata ca, ia au vinakata ga me lesu mai na tamata ca mai na nona i tovo, ka me bula; dou lesu mai, dou vuki tani mai na nomudou i tovo ca; e na vuku ni cava dou sa via mate kina, koi kemudou na vale i Isireli?

12“O koya oqo, ko iko na luve ni tamata, mo kaya vei ira na luvedra na kai nomu, A nona i valavala dodonu na yalododonu ena sega ni vakabulai koya e na siga sa talaidredre kina ko koya; ia na nona ca na tamata ca, ena sega ni mate kina ko koya e na siga sa lesu kina mai na nona ca; ko koya talega sa yalododonu ena sega ni bula rawa kina e na siga sai valavala ca kina ko koya.

13E dina ga ni'u sa kaya vua na tamata yalododonu ni na bula vakaidina ko koya, ia ke sa vakararavi ga ko koya ki na nona i valavala dodonu ka sai valavala ca, ena sega ni nanumi na nona i valavala dodonu kecega; ia e na vuku ni nona i valavala ca sa cakava, ena mate kina ko koya.

14E dina ga ni'u sa kaya talega vua na tamata ca, ‘Ko na mate vakaidina’, ia ke sa lesu mai ko koya mai na nona i valavala ca ka cakava na ka dodonu ka vinaka—

15ka kevaka sa lesuva tale na tamata ca na nona vosa ni yalayala, ka vakasuka talega na ka sa butakoca, ka sa muria na vunau ni bula, ka sega ni cakava na ka ca—ena bula vakaidina ko koya, ka na sega ni mate.

16Ena sega e dua na nona i valavala ca sa kitaka oti me na beitaki vua. Sa qai cakava na ka dodonu ka vinaka; ena bula vakaidina ko koya.

17“Ia era kaya ko ira na luve ni kai nomu, ‘Sa sega ni dodonu nai valavala ni Turaga’, ia ko ira ga, sa sega ni dodonu na nodra i valavala.

18Ni sa lesu tani na yalododonu mai na nona i valavala dodonu, ka sa cakava na ka ca, ena mate kina ko koya.

19Ia ni sa lesu na tamata ca mai na nona ca, ka cakava na ka sa dodonu ka vinaka, ena bula kina ko koya.

20Ia dou sa kaya tiko, Sa sega ni dodonu nai valavala ni Turaga. Oi kemudou na vale i Isireli, au na dui lewai kemudou yadua me vaka na nomudou i valavala.”

Na Bale i Jerusalemi

21 2Tui 25.3-10; Jere 39.2-8; 52.4-14 Ia e nai tinikarua ni yabaki ni neimami tiko vakabobula, e nai katini ni vula, e nai kalima ni siga ni vula, sa qai lako mai vei au e dua sa dro mai Jerusalemi, ka sa kaya, “Sa vakadrukai na koro.”

22Ia na liga i Jiova sa tu vei au e na yakavi, ni se bera ni tadu mai ko koya sa dro mai, ka sa dalaga na gusuqu, ka se bera ni lako mai vei au ko koya e na mataka; ia sa dalaga na gusuqu, ka'u sa qai sega ni galu tiko.

23Sa qai yaco vei au na vosa i Jiova, ka vaka:

24“Ko iko na luve ni tamata, o ira sa vakatawa na veitikina lala e na vanua ko Isireli era sa vosa, ka kaya, ‘Sa lewe dua ga ko Eparaama, ni sa taukena na vanua, ia koi keda, eda sa lewe vuqa; ia sa soli ga vei keda na vanua me da taukena.’

25O koya oqo mo kaya kina vei ira, Sa kaya vakaoqo na Turaga ko Jiova: Dou sa kania na dra mei coi ni kemudou, dou sa ta cake talega ki na nomudou matakau, ka ia talega na veivakamatei; ia mo dou taukena li na vanua?

26Dou sa ravita tu na nomudou i seleiwau, dou sa cakava na ka vakasisila, dou sa dui vakacacana na watina na kai nona; ia mo dou taukena li na vanua?

27Mo vosa vakaoqo vei ira, Sa kaya vakaoqo na Turaga ko Jiova: Me vaka ni'u sa bula koi au, ko ira era vakatawa na veitikina lala era na mate ga e nai seleiwau, ia ko koya talega mai nai bili ka'u na soli koya ki na manumanu me ra kania, ko ira talega mai na uluvatu kei na qara-vatu era na mate e na mate dauveiveitauvi.

28Ni'u na vakalalataka sara na vanua, ena mudu talega na nona kaukauwa sa viavialevu; ena lala talega na veiulunivanua i Isireli, me sega e dua na tamata me lakova.

29Era na qai kila ni sai au ko Jiova, ni'u sa vakalalataka sara na vanua e na vuku ni nodra i valavala vakasisila kecega era sa cakava.

30“Ko iko talega, na luve ni tamata, ko ira na luvedra na kai nomu era sa veivosakitaki iko tikoga mai na lalaga ni veivale kei na kena katuba talega, ka ra sa dui veivosaki vakataki ira na veiwekani, ka kaya, ‘Tou mai rogoca mada, se vosa cava sa yaco mai vei Jiova.’

31Ka ra sa lako mai vei iko me vaka ni ra curu mai ko ira na tamata, ka ra sa mai tiko e matamu me vakataki ira na noqu tamata, ka ra rogoca na nomu vosa, ka ra sa sega ni cakava. Ni sa tiko e na gusudra na vosa vakayalololoma, ia na lomadra sa muria na nodra daukocokoco ga.

32Ka raica, ko sa tautauvata vei ira kei na nona meke ni veilomani e dua sa domo vinaka, ka sa qiria vakavinaka nai vakatagi; ni ra sa rogoca na nomu vosa, ka sega ni cakava.

33Ia ni sa qai yaco na ka oqo—raica, ena yaco ga!—era na qai kila kina ni a tiko e na kedra maliwa e dua na parofita.”