2 Cesalonaika 3 - Ai Vola Tabu (Vakadewa Makawa Vakavoutaki 2021)（FRV21）

Mo ni Masulaki Keitou

1Meu tinia, oi kemudou na veiwekani, dou masulaki keitou, me cici yani na vosa ni Turaga ka me dokai tiko, me vaka vei kemudou,

2ka me keitou vakabulai talega mai vei ira na tamata era yalo vakatani ka ca; ni sa sega vei ira kecega na vakabauta.

3Ia sa lomadina na Turaga, o koya ena vakataudeitaki kemudou, ka maroroi kemudou mai na ca.

4Ia keitou sa vakadinata na Turaga e na vukumudou, ni dou sa qai cakava ka dou na cakava e muri na veika keitou sa vakarota vei kemudou.

5Ia me tubera mada na yalomudou na Turaga ki na loloma ni Kalou, kei na dauvosota me vakataki Karisito.

Sa Noda i Tavi me Da Cakacaka Tikoga

6Ia keitou sa vakarota vei kemudou, na veiwekani, e na yaca ni noda Turaga ko Jisu Karisito, mo dou kakua ni tiko vata kaya e dua vei ira na veiwekani sa dauia nai valavala vakatani, ka sega ni vaka nai vakavuvuli era sa rogoca vei keitou.

7Ni dou sa kila sa kilikili kei kemudou mo dou vakadamurimuri keitou; ni keitou a sega ni valavala vakatani e na kemudou maliwa;

8ka keitou sa sega ni kana walega vua e dua na tamata; ia keitou a oga ka oca e na bogi kei na siga, me keitou kakua kina ni vakabibitaka e dua vei kemudou.

9E segai ni sa sega ni dodonu vei keitou, ia me keitou sa nomudou i vakarau ga mo dou vakadamurimuri keitou.

10Io, ni keitou a tiko kei kemudou, sa neitou i vakaro oqo vei kemudou, me kakua ni kana ko koya sa sega ni cakacaka.

11Ni keitou sa rogoca sa so vei kemudou, era sa ia tiko nai valavala vakatani, era sa sega sara ni cakacaka, a ra sa makutu vakatani.

12Ia ko ira era sa vakaoqo keitou sa vakarota ka vakamasuta e na vuku ni noda Turaga ko Jisu Karisito, me ra tiko malua ka daucakacaka, ka kania ga na kedra.

13Ia koi kemudou, na veiwekani, dou kakua ni ceguoca e na cakacaka vinaka.

14Ia kevaka e dua sa sega ni talairawarawa ki na neitou vosa e nai vola oqo, dou vakatakilakilataka na tamata ko ya, ka kakua ni tiko vata kaya, me madua kina ko koya.

15Ia mo dou kakua ga ni nanumi koya me meca, mo dou vakatavulica ga me vaka sa wekamudou.

Na Kena i Tinitini

16Ia na Turaga ni veivakacegui me solia tiko ga vei kemudou na vakacegu e na ka kecega. Me tiko vata kei kemudou kecega na Turaga.

17Au sa loloma yani koi au ko Paula, ka'u sa vola oqo e na ligaqu dina. O koya oqo nai vakatakilakila e nai vola kecega au sa vola vakakina.

18Me nomudou kecega na loloma ni noda Turaga ko Jisu Karisito. Emeni.