Jope 24 - Ai Vola Tabu (Vakadewa Makawa Vakavoutaki 2021)（FRV21）

Sa Kudruvaka ko Jope na Veivakasaurarataki e Vuravura

1“A cava sa sega kina ni vakayacori na gauna ni veilewai vei Koya sa Kaukauwa,

ka cava era sega kina ni kunea na nona siga ko ira era kilai koya?

2Eso na tamata era kisira nai yalayala ni vanua;

era kovea na qele ni sipi ka la'ki vakania.

3Era vakasava tani na nodra asa na luveniyali,

era sa taura na nona bulumakau na yada mei vakadinadina.

4Era sa biuti ira tani na dravudravua mai na sala;

sa ra vunitaki ira vata vakataki ira na dravudravua kei vuravura.

5Raica, me vaka na asa kila mai na vanua dravuisiga,

era sa lako ki na nodra cakacaka ka sou e na mataka,

ka qara matua na kedra sa rawa mai na vanua lala,

na kedra kei na kedra talega na luvedra.

6Era dui tamusuka na kedra mai na were

ka ra sa vetia na nodra vaini nai valavala ca.

7Era sa davo luvawale e na bogi ka sega ni vakaitutuvi,

ka sega ni vakaitutuvi e na liliwa.

8Era sa suasua e na uca mai na veiulunivanua,

ka ra sa mokota na vatu ni sa sega na vanua me ra vakaruru kina.

9“Eso era sa kaliraka tani na luveniyali mai na mata-ni-sucu,

ka taura mei vakadei ni dinau na luvedra lalai na dravudravua.

10Era sa lako luvawale voli, ka sega ni vakaisulu;

ka dina ni ra viakana, era kauta voli ga nai vau sila;

11era sa caka waiwai e nodra loma ni bai na tamata ca;

era butubutu e nai keli-waini, ia era vakaleqai ga e na viagunu.

12Sa ra vutugu na tamata mai loma ni koro,

ka sa qoqolou na yalo i koya sa mavoa;

ia sa sega ni vakacalai ira na Kalou.

13“Era tu ko ira era daubesetaka na rarama,

ko ira era sega ni kila na kena sala,

se tiko e na kenai lakolako.

14Sa yadra mai na daulaba ni sa kida na mataka,

ka me vakamatea na dravudravua kei na luveniyali,

ka sa vaka na daubutako e na bogi.

15A matana talega na dauyalewa sa waraka na yakavi,

ka sa kaya, ‘Ena sega ni kunei rawa au e dua na tamata’;

ka sa ubia na matana.

16Ni sa butobuto era keli-rukuta na vale;

era sa sogolati ira e na siga;

era sa sega ni kila na rarama.

17Ni sa tautauvata na mataka kei na yaloyalo ni mate vei ira;

ka sa nodra i tokani na veika rerevaki ni yaloyalo ni mate.

18“Ko sa kaya, ‘Era sa totolo sara e na dela ni wai;

sa cudruvi na nodra i votavota ni vanua;

sa sega ni dua me gole ki na nodra veiloga-ni-vaini.

19Sa kauta tani na wai ni uca-vulavula na lauqa kei na katakata;

a sa vakakina nai bulubulu vei ira era sai valavala ca.

20Sa guilecavi ira na kete ni vakasucu gone;

sa taleitaki ira ko koya na baca-ni-qele;

era sa sega ni nanumi tale;

sa raramusumusu kina na caka ca me vaka e dua na vunikau.’

21“Era sa vakacacani koya sa yava, na yalewa sa sega ni vakaluveni,

ka sa sega ni caka vinaka vua na yada.

22Ia na Kalou sa dauvakabalavutaka ga na nodra bula na tamata qaqa e na nona kaukauwa;

era sa ta cake e na gauna era lomaleqataka kina na bula.

23Sa soli vei ira ko koya me ra tiko vakacegu, ka ra sa tokoni,

ka sa vakaraica na nodra sala na matana.

24Era sa vakalevulevui me bogi vica ga, ka sa yali tale yani;

era sa vakamalumalumutaki sobu ka vakasoqoni vata tale me vakataki ira na tamata kecega;

era sa doloki me vaka na sola ni sila.

25Ia kevaka sa sega ni vakakina, ko cei me na vakadinadinataka ni'u sa vosa lasu,

ka vakatawayagataka na noqu vosa?”