Niemaia 5 - Ai Vola Tabu (Vakadewa Makawa Vakavoutaki 2021)（FRV21）

Sa Vukei Ira na Dravudravua ko Niemaia

1Sa ra qai tagi vakalevu ko ira na tamata kei na watidra e na vuku ni wekadra na Jiu.

2Ni sa so vei ira era kaya, “Keimami sa lewe vuqa koi keimami, ko ira na luve i keimami, na tagane kei na yalewa. O koya keimami sa taura kina na sila, me keimami kana, ka bula.”

3Sa kaya talega eso, “Keitou sa solia na neitou vanua, na veiloga-ni-vaini, kei na veivale, me kenai vakadei ni sila vei keitou e na vuku ni dausiga.”

4Sa kaya talega eso, “Keitou sa kerea mada nai lavo me keitou solia nai vakacavacava vua na tui, a sa kenai vakadei na neitou vanua kei na neitou veiloga-ni-vaini.

5Ia keitou sa lewe vata kei ira na weka i keitou, na luve i keitou sa tautauvata kei na luvedra. Ka raica, keitou sa volitaki ira na luve i keitou na tagane kei na yalewa me ra bobula, ka so vei ira na luve i keitou ka yalewa era sa bobula tu; ia keitou sa sega ni voli ira tale rawa mai, ni sa nodra na tamata tani na neitou vanua kei na neitou veiloga-ni-vaini.”

6Ia ka'u a cudru vakalevu ni'u sa rogoca na nodra tagi kei na vosa oqo.

7Lako 22.25; Vsoro 25.35-37; Vrua 23.19,20Au sa qai vakanananu vakataki au, ka vunauci ira na turaga, kei ira era lewa tiko, ka kaya vei ira, “Dou sa taroga nai kere ni nomudou i yau era kerea, koi kemudou yadua mai na wekamudou.” Ia ka'u a lesia e dua nai soqosoqo levu me ra vorati kina.

8Ia ka'u a kaya vei ira, “Me vaka na ka keimami sa rawata, keimami sa vakabulai ira na wekada na Jiu, ko ira era sa volitaki eliu vei ira na veimatanitu tani; ia dou na qai volitaki ira li na wekamudou; se ra na volitaki mai vei keda?” Era sa qai galu, ka sega na ka me ra kaya.

9Au a kaya talega, “Sa sega ni vinaka na ka dou sa cakava. E sega li ni dodonu mo dou rerevaka na noda Kalou e na nomudou i valavala, e na vuku ni nodra vosa ca na veimatanitu tani, era sa noda meca?

10Koi au talega, kei ira na wekaqu, kei ira na noqu tamata, e rawarawa me keimami taroga na kenai kere ni lavo kei na sila vei ira. Ia sa kua mada vei keda na vakasaurara oqo.

11Dou vakasuka mada vei ira, io e na siga edaidai, na nodra vanua, na nodra veiloga-ni-vaini, na nodra veiolive, kei na nodra veivale, kei na kena tubu na wase ni lavo, kei na sila, na waini, kei na waiwai, dou sa taroga vei ira.”

12Era sa qai kaya, “Keimami na vakasuka, ka sega ni taroga vei ira e dua na ka; keimami na kitaka me vaka na nomu vosa.” Au a qai kacivi ira na bete, ka vakabubuluitaki ira, ni ra na cakava me vaka na vosa ni yalayala oqo.

13Au a ceburaka talega na noqu i sulu, ka kaya, “Me ceburaka vakakina na Kalou na tamata kecega mai na nona vale, mai na nona cakacaka talega, sa sega ni vakayacora nai yalayala oqo, ia me ceburaki vakakina ko koya, ka vakalalataki.” A ra sa kaya nai soqosoqo taucoko, “Emeni,” ka vakavinavinaka vei Jiova. A ra sa cakava na tamata me vaka na vosa ni yalayala oqo.

Na Yalo ni Dausolisoli i Niemaia

14Ia mai na gauna ka'u a lesi kina me'u nodra kovana e na vanua ko Juta, mai nai karuasagavulu ni yabaki ka yacova nai katolusagavulu ka rua ni yabaki i Atakisekise na tui, e tinikarua na yabaki, koi keitou kei ira na wekaqu, keitou sa sega ni kania na kena na kovana.

15Ia ko ira ka lesi me kovana eliu, era a dausaumi mai vei ira na tamata, a ra sa taura mai vei ira na kakana kei na waini, ka vasagavulu talega na sikeli siliva; io sa lewai ira na tamata ko ira na nodra tamata, ia ka'u a sega ni kitaka vakakina, ni'u sa rerevaka na Kalou.

16Ia ka'u a kitaka ga na cakacaka ni bai oqo, ka keitou a sega ni volia e dua na tiki ni vanua. A ra sa soqoni vata kecega na noqu tamata ki na cakacaka oqo.

17Ia sa daukana mai na noqu tepeli e le dua na drau ka limasagavulu vei ira na Jiu kei ira na turaga era lewa, kei ira talega eso era sa lako mai vei keimami mai vei ira na veimatanitu tani, era tiko voleka vei keimami.

18Ia na ka sa vakarautaki e na veisiga, sa dua na bulumakau, e ono na sipi digitaki; a sa vakarautaki vei au na toa, ka vakadua e na veibogitini sa kau mai na waini sa duidui ga; ia e na ka kecega oqo, ka'u a sega ni taroga na kena na kovana, ni sa bibi na nodra veivakabobulataki na tamata oqo.

19Mo ni nanumi au, na noqu Kalou, me'u vinaka kina, me vaka na ka ka'u sa kitaka vei ira na tamata oqo.