Taniela 7 - Ai Vola Tabu (Vakadewa Makawa Vakavoutaki 2021)（FRV21）

Na Raivotu ni Manumanu Lelevu e Va

1E nai matai ni yabaki i Pelisasari na tui Papiloni sa tadra ko Taniela ka raica eso na raivotu e na nona i mocemoce. Sa qai vola na tadra ko koya, ka tukuna na kenai lakolako.

2Sa kaya ko Taniela, “Au a vakaraica e na noqu raivotu e na bogi, ka raica, sa veivala na cagi vava mai na waitui levu,

3Vtaki 13.1; 17.8ka sa vude cake mai na waitui e va na manumanu lelevu, sa duidui na kedratou i bulibuli yadua.

4Vtaki 13.2A kenai matai sa vaka na laione ka sa vakatabana vakaikeli. Ni'u a vakaraica tiko, a sa vuti mai na lawe ni tabana, ka sa vakaduri cake mai na qele, ka sa vakatudonutaki e na yavana me vaka na tamata, ka sa soli vua na yalo ni tamata.

5Ka raica, sa dua tale na manumanu, na kenai karua, ka sa vaka na bea. A sa duri tu e na dua na ligana, ka sa tolu na sui ni sarisari sa katia tu e gusuna, ka ra sa kaya vua vakaoqo, ‘Tucake, kania vakalevu na lewe ni yago!’ ”

6Ka oti oqori, ka'u a vakaraica, ka raica, sa dua tale, e vaka na lepate, ka sa va na tabana vakamanumanu vuka e dakuna; sa va talega na uluna na manumanu oqori; ia sa soli kina na lewa.

7Vtaki 12.3; 13.1Ka oti oqori, ka'u a vakaraica e na raivotu e na bogi, ka raica e dua na manumanu, na kenai kava, sa ka rerevaki vakaidina, ka kaukauwa sara. A batina sa lelevu ka kaukamea; sa daubasuraka voli na ka e kania, ia na kena vo sa buturaka. A sa duatani oqo ka duatani na manumanu kecega sa liu mai vua, ka sa tini na kenai leu.

8Vtaki 13.5,6Ni'u a vakananuma tiko nai leu, raica, e dua nai leu lailai sa tubu cake mai e na kedra maliwa, ia e tolu nai leu ka tu eliu sa cavuivuvu mai e matana. Ka raica, sa so na matana nai leu oqo sa vaka na mata ni tamata, ka dua na gusuna sa dauvosa vakaviavialevu.

Na Veilewai ena Mata i Koya sa Bula Ka Sega Ni Mudu

9 Vtaki 20.4; 1.14 “Au a raica tiko,

ka so nai tikotiko vakaturaga sa qai viritoka,

a sa dabe kina ko Koya sa bula e na Veisiga,

sa vulavula na nona i sulu me vaka na uca vulavula,

kei na drau ni uluna sa vaka na vutika ni sipi e savasava;

sa nona i tikotiko na yameyame ni bukawaqa,

ia na yavana sa vaka na bukawaqa.

10 Vtaki 5.11; 20.12 A bukawaqa sa drodro mai vua,

ka ra sa udolu vakaudolu sa qaravi koya,

ka oba vakaoba sa wavu tu e matana.

Sa tekivutaki na mataveilewai,

ka sa tevuki nai vola.

11“Au a qai vakaraica e na vuku ni domo ni vosa lelevu sa cavuta nai leu ko ya. Au a raica tiko ni sa vakamatei na manumanu ko ya, ka vakarusai na yagona, ka sa biu ki na bukawaqa.

12Ia na kedra vo na manumanu, sa kau tani na nodratou lewa, ia sa vakabalavutaki ga na nodratou bula ka dua na yabaki kei na dua na gauna.

Sa Soli Vua na Luve ni Tamata na Kaukauwa

13 Maciu 24.30; 26.64; Mari 13.26; 14.62; Luke 21.27; Vtaki 1.7,13; 14.14 “Au a vakaraica e na raivotu ni bogi,

ka raica, sa lako mai e na o kei lomalagi

e dua sa vaka na Luve ni tamata.

Ka sa lako mai kivei Koya sa bula e na Veisiga,

ka ra sa kauti koya sara vua.

14 Vtaki 11.15 A sa soli vua na lewa, kei na vakarokoroko, kei na matanitu, me ra qaravi koya ko ira na tamata kece, kei na veivanua, kei na dui vosavosa; a nona lewa na lewa sa sega ni mudu, ena sega ni takali, kei na nona matanitu ena sega ni vakarusai.

Sa Vakatakilai nai Balebale ni Raivotu i Taniela

15“Ia koi au ko Taniela sa qai rarawa na yaloqu e na yagoqu, ia sa vakidroataki au na raivotu oqo.

16Au a torova e dua vei ira sa wavu tu, ia ka'u sa taroga vua na kena dina ni ka kecega oqo. A sa tukuna mai vei au ko koya, ka sa vakatakila vei au na kenai balebale ni veika oqo.

17‘Na manumanu lelevu oqo e va, sa le va na tui eratou na tubu cake e vuravura.

18Vtaki 22.5Ia ko ira na yalosavasava i Koya sa Cecere Sara era na rawata na matanitu ka ra na taukena na matanitu ka sega ni mudu—me tawa mudu ka tawa mudu.’

19“Au a qai via kila na kena dina e na vuku ni kenai kava ni manumanu, o koya ka duatani vei iratou kecega, o koya ka rerevaki sara, ka vakabatina kaukamea, ka vakaiqaso parasa; o koya ka daubasuraka voli, ka musumusuka, ka buturaka tu na kena vo;

20e na vuku talega ni leu e tini ka tu e uluna, ka dua tale sa tubu cake mai, ka tolu sa bale e matana—nai leu ko ya ka vakamatana, ka dua na gusuna sa dauvosa vakaviavialevu sara, na kenai rairai sa kaukauwa vakalevu ka vakalailai na kenai rairai ni nona i tokani.

21Vtaki 13.7Au a raica nai leu ko ya, ni sa qai ia nai valu vei ira na yalosavasava, ka sa gumatua vei ira;

22Vtaki 20.4ka yacova na nona lako mai ko Koya sa bula e na Veisiga; ka sa qai soli na lewa vei ira na yalosavasava i Koya sa Cecere Sara; ka sa qai yaco na gauna me ra taukena kina na matanitu ko ira na yalosavasava.

23“Sa qai vaka ko koya: ‘A kenai kava ni manumanu,

sa na kenai kava ni matanitu sa na tubu e vuravura,

ena duatani oqori ka duatani na veimatanitu kecega;

ia ena kania na vuravura taucoko,

ka na buturaka, ka musumusuka.

24 Vtaki 17.12 Ia nai leu e tini,

e na matanitu ko ya sa lewe tini na tui ena tubu mai,

ka dua talega ena tubu me taravi ira.

Ena duatani ko koya oqo vei ira ka tubu eliu,

ia ena vakamalumalumutaka ko koya e lewe tolu na tui.

25 Vtaki 12.14; 13.5,6 Ia ena daucavuta ko koya na vosa ca vei Koya sa Cecere Sara,

ka na dauvakacacani ira na yalosavasava nei Koya sa Cecere Sara,

ka vakananuma me vukica na gauna eso kei na lawa eso;

ia ena soli ki na ligana ka me oti mada e dua na gauna

ka so tale na gauna ka dua na tiki ni gauna.

26Ia ena tiko na mataveilewai,

ka ra na kauta tani na nona lewa,

me vakacacana ka vakarusa, ka me vakaotia sara.

27 Vtaki 20.4; 22.5 Ia na matanitu kei na lewa,

kei na kena levu ni veimatanitu e ruku i lomalagi taucoko,

ena soli vei ira na yalosavasava nei Koya sa Cecere Sara;

a nona matanitu sa matanitu e sega ni mudu,

ia ko ira na turaga kecega era na qaravi koya ka talairawarawa vua.’

28“Sa vaka tu oqo na kenai tinitini ni ka ko ya. Ia koi au ko Taniela, sa vakidroataki au vakalevu sara na nanuma ni lomaqu, ka sa duatani mai vei au na mataqu; ia ka'u a maroroya ga e lomaqu.”