1A sa yaco tale vei au na vosa i Jiova, ka vaka:
2“Ko iko na luve ni tamata, mo vakanamata mada ki Jerusalemi, ka vakatauca na nomu vosa ki na veiyasana tabu, ka parofisaitaka na ka ca ki na vanua ko Isireli,
3ka kaya ki na vanua ko Isireli, Sa kaya vakaoqo ko Jiova: Raica, koi au na nomu meca, ka'u na ucuna na noqu i seleiwau mai na kena taga, ka muduki ira tani na yalododonu kei ira na tamata ca era tiko vei iko.
4Ia ni'u na muduka tani vei iko na yalododonu kei na tamata ca, ena ucu kina na noqu i seleiwau mai na kena taga me taya na tamata kecega mai na mata ni ceva ka yacova na mata ni vualiku;
5me ra kila na tamata kecega ni sai au ko Jiova ka'u sa ucuna na noqu i seleiwau mai na kena taga; ka na sega ni dara tale kina.
6“Ia ko iko, na luve ni tamata, mo vutugu kina, me vaka sa ramusu na tolomu; ia mo vutugu e na rarawa e matadra.
7Ia ni ra sa kaya vei iko, ‘A cava ko sa vutugu kina?’ mo qai kaya, ‘E na vuku ni dua nai rogorogo ni sa voleka mai. Ena waicala na loma ni tamata kecega, ka na wadamele na ligadra kecega, ka na ceguoca na yalodra kecega, ka na vaka na wai na durudra kecega. Raica, sa lako tiko mai, ka na vakayacori’,” sa kaya na Turaga ko Jiova.
8Sa yaco tale vei au na vosa i Jiova, ka vaka:
9Ko iko na luve ni tamata, mo parofisai mada, ka kaya, Sa vosa vakaoqo ko Jiova, mo kaya:
Ai seleiwau, ai seleiwau sa vagata tu,
ka sa soloti talega;
10sa vagata tu me ia kina na veivakamatei vakaidina,
sa soloti oti me sa makamakalivata!
Me da qai ia vakaevei na marau?
Ni ko sa beca ga na kau,
kei na bula vakaivakarau taucoko.
11A sa solia ko koya nai seleiwau me soloti,
me sa taurivaki e na liga;
a sa vagatataki, ka sa soloti nai seleiwau,
me soli ki na ligana na dauveivakamatei.
12Mo tagi ka qoqolou, ko iko na luve ni tamata,
ni na baleti ira na noqu tamata;
ena tauci ira kecega na turaga ni Isireli;
ena tarai ira na noqu tamata na rerevaka nai seleiwau.
O koya oqo, mo kuitataka kina na dibina.
13Ni sa qai yaco mai na veivakatovolei, ka na vakaevei kevaka ena beca talega na kuita? Ena sega tale, sa kaya na Turaga ko Jiova.
14Ia ko iko, na luve ni tamata, mo ia kina na parofisai;
ka tavia vata na ligamu.
Laiva me bale vakarua nai seleiwau, ka vakatolu;
sai seleiwau ga ni veivakamatei.
Ai seleiwau ni veivakamatei levu—
sa viribaiti ira;
15ka sa waicala kina na lomadra
ka tarabe e lewe vuqa.
Ka'u sa vaqara nai seleiwau rerevaki
ki na nodra matamata-ni-koro kecega,
io, sa makamakalivata mai,
ka soloti tu me ia kina na veivakamatei.
16Mo ravuravu yani vaka ka vaka,
ki nai matau se nai mawi!
Ki na yasana ga sa qara vakadodonu kina na matamu.
17Ia koi au talega ka'u na ravuravu e na liga ki na liga,
ka vakaceguya kina na noqu cudru;
koi au ko Jiova ka'u sa vosa vakaoqo.
18A sa yaco tale vei au na vosa i Jiova, ka vaka:
19“O iko talega, na luve ni tamata, mo lesia e rua na sala, me lako yani kina nai seleiwau i tui Papiloni. Me dua bau ga na vanua me vu mai kina ruarua. Ia mo lewa e dua na tikina, me sa tekivu kina na sala ki na koro.
20Ia mo lesia e dua na sala me yaco kina nai seleiwau ki Rapa na nodra koro na kawa i Amoni, kei Juta talega, mai Jerusalemi na koro vakabai.
21Ni sa tu ko tui Papiloni e na basoga ni salatu, ni sa basoga rua, me ia mada na veidigidigiyaka; sa vakayavalata na gasau, sa taroga na matakau, sa dikeva na yate.
22E na ligana i matau sa tu na madigi kei Jerusalemi, me lesi ira na turaga-ni-valu, me dalaga na gusudra ni sa ia na veivakamatei, me tabalaka na domo ni kaila, me viritura nai tukituki-ni-bai ki na matamata-ni-koro, me viria na suva, me tara na vale ni valu.
23Ia ena yaco me sa dua na madigi vakailasu vei ira era sa bubului oti. Ia sa na vakananuma ga ko koya ki na nodra caka cala, me ra sa tauri.
24“O koya oqo sa kaya kina na Turaga ko Jiova: Ni dou sa kitaka na nomudou caka cala me sa nanumi, ni sa vakavotui mai na nomudou talaidredre, ka sa kilai na nomudou i valavala ca e na nomudou cakacaka kecega— io e na vuku ni dou sa nanumi, dou na tauri kina e na liga.
25Ia ko iko, na turaga ni Isireli na tamata be ka ca,
ka sa yaco na kemu siga,
me tini kina na caka cala,
26sa kaya vakaoqo na Turaga ko Jiova:
Mo luvata tani nai sala dina, ka kauta tani nai sala vakatui;
ena sega ni koyakoya tiko ga na ka.
O koya sa vakasivoi mo toroya cake,
kei koya sa levu cake mo vakasivoya.
27Au na vukica me rusa,
me rusa, io me rusa!
(Ia ena segasega tale.)
Ka me lako mada mai ko koya sa dodonu me nona;
vei koya ga ka'u na solia kina.
28 Jere 49.1-6; Isi 25.1-7; Emo 1.3-15; Sefa 2.8-11 “Ia ko iko, na luve ni tamata, mo ia na parofisai ka kaya, Sa kaya vakaoqo na Turaga ko Jiova e na vukudra na kawa i Amoni, kei na nodra veivakalialiai; ia mo kaya:
Ai seleiwau, ai seleiwau! Sa ucu tu me ia na veivakamatei
ka sa soloti vakalevu sara me sa makamakalivata.
29Ni ra raica tiko na raivotu lasu me nomu,
na caka mana vakailasu me nomu,
me ra vakabalei iko ki na domodra
ko ira sa moku ka tamata ca—
ko ira ka sa yaco mai na nodra siga,
nai cavacava ni gauna ni veitotogitaki.
30Me'u vakasuka li ki na kena taga?
E na yasana ko a buli kina,
io e na vanua ko a sucu kina,
ka'u na lewai iko kina.
31Ia ka'u na sovaraka vei iko na noqu cudru,
ka'u na uvuci iko e na bukawaqa ni noqu cudru;
ka soli iko ki na ligadra na dauvakacaca,
era daukila na veivakarusai.
32Ko na kena buka me bukani kina na bukawaqa;
ia na kemu dra ena tu ga e na loma ni vanua;
ko na sega ni nanumi tale,
ni sai au ko Jiova ka'u sa vosa vakaoqo.
Who We AreWhat We EelieveWhat We Do
2025 by iamachristian.org,Inc All rights reserved.
