1 Tui 15 - Ai Vola Tabu (Vakadewa Makawa Vakavoutaki 2021)（FRV21）

Sa Tui Juta ko Epaijami(2 Veigauna 13.1—14.1)

1E na kenai katinikawalu ni yabaki i Jeropoama na tui, na luve i Nipati, sa tekivu me lewa vei ira na Juta ko Epaijami.

2Sa tui tiko mai Jerusalemi ka yabaki tolu. Ia na yaca i tinana ko Meeka, na luve i Apisalome.

3A sa muria ko koya nai valavala ca kecega i tamana, o koya ka kitaka ni sa bula eliu vua; a sa sega ni dodonu na lomana vei Jiova na nona Kalou, me vaka na loma i Tevita na nona qase.

41Tui 11.36Ia e na vuku i Tevita ga sa solia vei koya ko Jiova na nona Kalou e dua na cina mai Jerusalemi, ni sa vakatubura na luvena me taravi koya, ka me vakataudeitaki Jerusalemi,

52Samu 11.1-27ni sa cakava ko Tevita na ka e dodonu e na mata i Jiova, ka sega ni lesu tani mai na dua na ka sa vakaroti vua e na veisiga kecega ni nona bula, ka vakavo ga na ka me baleti Uraia na Itaiti.

62Vei 13.3-21A rau sa veivaluti ko Reopoama kei Jeropoama e na gauna kece ni nona bula.

7Ia na vo ni cakacaka i Epaijami, kei na ka kecega ka cakava ko koya, sa sega li ni volai e nai Vola ni Veika sa Caka e na Nodra Gauna na Tui Juta? A rau sa veivaluti tiko ko Epaijami kei Jeropoama.

8A sa moce vata kei ira na nona qase ko Epaijami; a sa bulu ko koya e na koro i Tevita; a sa tui ko Esa na luvena, me kenai sosomi.

Sa Tui Juta ko Esa(2 Veigauna 15.16—16.6)

9Ia e na kenai karuasagavulu ni yabaki i Jeropoama na tui Isireli, sa tekivu me lewa vei ira na Juta ko Esa.

10A sa tui tiko ko koya mai Jerusalemi ka yabaki vasagavulu ka dua. Ia na yaca i tinana ko Meeka, na luve i Apisalome.

11A sa caka dodonu ko Esa e na mata i Jiova, me vakataki Tevita na nona qase.

122Vei 15.8-15A sa vakasevi ira tani mai na vanua era sai valavala vaka-Sotoma, ka biuta tani na matakau kecega ka cakava ko ira na nona qase.

13Ia ko Meeka talega na tinana, sa vakasivoya ko koya me kakua ni ranadi tiko, ni sa cakava e dua na matakau ki na kalouyalewa ni veikau. A sa vakacacana na nona matakau ko Esa, ka vakama mai na uciwai ko Kitironi.

14Ia sa sega ni biu tani na veitikina cecere, ka sa dodonu ga vei Jiova na loma i Esa e na nona gauna kecega.

15A sa kauta ki na vale i Jiova na veika ka vakatabuya ko tamana me nei Jiova, kei na veika ka vakatabuya ko koya me nei Jiova—na siliva, kei na koula, kei nai yaya.

16A rau sa veivaluti tiko ko Esa kei Pasa na tui Isireli e na nodrau gauna kecega.

17A sa lako cake ko Pasa na tui Isireli me veivala kei ira na Juta, a sa tarai Rama, ka me dredre vua e dua me lako tani se lako mai vei Esa na tui Juta.

18A sa qai kauta ko Esa na siliva kei na koula kecega sa vo tu e nai yau ni vale i Jiova, kei nai yau ni vale-ni-tui, ka solia ki na ligadra na nona tamata. A sa vakauta ko Esa na tui kivei Peni-etati na luve i Tapirimoni, na luve i Esioni, na tui Siria, o koya sa tiko mai Tamasiko, ka kaya,

19“Sa dua na nodaru veiyalayalati, ka dua vei rau na tamaqu kei na tamamu. Raica, ka'u sa vakauta vei iko e dua na ka-ni-loloma, na siliva kei na koula. Mo lako mai, mo tinia na nomudrau veiyalayalati kei Pasa na tui Isireli, ka me lako tani vei au ko koya.”

20A sa vakarorogo vei Esa na tui ko Peni-etati, ka talai ira na kavetani ni nona mataivalu me veivala kei na nodra veikoro na Isireli. A sa samuti Aijoni, kei Tani, kei Epeli-peci-meeka, kei Kineroci taucoko, kei na vanua taucoko ko Navitalai.

21Ia ni sa rogoca ko Pasa, sa tarova na nona tarai Rama tiko ko koya, ka sa la'ki tiko mai Tirisa.

22A sa qai kacivi ira kecega na Juta ko Esa na tui, ka sa sega ni vo e dua. A ra sa kauta tani na veivatu mai Rama kei na kena kau ka tarai Rama tiko kina ko Pasa; a sa tara kina ko Esa na tui na koro ko Kipa e Penijamini kei Misipa.

23Ia na vo ni cakacaka kecega i Esa, kei na nona kaukauwa kecega, kei na ka kecega ka cakava ko koya, kei na veikoro ka tara ko koya, sa sega li ni volai e nai Vola ni Veika sa Caka e na Nodra Gauna na Tui Juta? Ia e na gauna sa qase kina sa tauvi mate na yavana.

24A sa moce vata kei ira na nona qase ko Esa, ka sa bulu vata kei ira na nona qase e na koro i Tevita na nona qase, ka sa tui ko Josefati na luvena me kena i sosomi.

Sa Tui Isireli ko Netapi

25A sa tekivu me lewa vei ira na Isireli ko Netapi, na luve i Jeropoama, e na kenai karua ni yabaki i Esa na tui Juta, a sa tui vei ira na Isireli ka yabaki rua.

26A sa daucaka ca ko koya e na mata i Jiova, ka muria nai tovo i tamana, kei na nona i valavala ca ka vakaivalavalacataki ira kina na Isireli.

27A sa buki kena vere ko Pasa na luve i Eaija, e na vuvale i Isakari; a sa mokuti koya ko Pasa mai Kipiconi, sa nodra na kai Filisitia, ni ra sa tiko vakaivalu ki Kipiconi ko Netapi kei ira kecega na Isireli.

28Ia sa vakamatei koya ko Pasa e na kenai katolu ni yabaki i Esa na tui Juta, ka sa tui ko koya me kena i sosomi.

291Tui 14.10Ia ni sa tui ko koya, sa mokuti ira kecega na lewe-ni-vuvale i Jeropoama; sa sega ni vakabula vei Jeropoama e dua sa cegu rawa, ka sa vakarusai koya oti, me vaka na vosa i Jiova ka cavuta ko koya e na gusu ni nona tamata ko Eaija na kai Sailo—

30e na vuku ni valavala ca i Jeropoama ka kitaka ko koya, ka sa vakaivalavalacataki ira kina na Isireli, e na nona i valavala ka vakacudrui Jiova kina na nodra Kalou ni Isireli.

31Ia na kena vo ni cakacaka i Netapi, kei na ka kecega ka cakava ko koya, sa sega li ni volai e nai Vola ni Veika sa Caka e na Nodra Gauna na Tui Isireli?

32A rau sa veivaluti ko Esa kei Pasa na tui Isireli e na nodrau gauna kecega.

Sa Tui Isireli ko Pasa

33E na kenai katolu ni yabaki i Esa na tui Juta, sa tekivu me lewa ko Pasa, na luve i Eaija, vei ira kecega na Isireli mai Tirisa, ka sa lewa yabaki ruasagavulu-ka-va.

34A sa daucaka ca ko koya e na mata i Jiova, ka muria nai tovo i Jeropoama, kei na nona i valavala ca sa vakaivalavalacataki ira kina na Isireli.