1 Tui 19 - Ai Vola Tabu (Vakadewa Makawa Vakavoutaki 2021)（FRV21）

Sa Dro Tani mai vei Jesipeli ko Ilaijia

1A sa tukuna vei Jesipeli ko Eapi na ka kecega ka cakava ko Ilaijia, ka ni sa vakamatei ira kecega na parofita e nai seleiwau.

2A sa tala ko Jesipeli e dua na tamata kivei Ilaijia, ka kaya, “Me ra qai sauma vei au ko ira na kalou, ka vakaikuritaka, kevaka ka'u sa sega ni cakava me tautauvata na nomu bula me vakataka e dua vei ira oqori e na gauna vata vakaoqo ni mataka.”

3A sa rere ko Ilaijia, ka sa cavu tu, ka dro yani me bula, ka yaco ki Peri-sepa, ka nei Juta, ka biuta mai kea na nona cauravou.

4 Jona 4.3 Ia sa lako tu ko koya ka bogi dua e loma ni vanua lala, ka sa yaco yani ka la'ki tiko sobu e na dua na ruku ni junipa. A sa masu me mate yani ko koya, ni sa kaya, “Sa rauti au; ia oqo, i Jiova, mo ni vakaotia ga na noqu bula, ni'u sa sega ni vinaka cake vei ira na noqu qase.”

5Sa qai davo sobu ka moce e na dua na ruku ni junipa. Ka raica, a sa tarai koya e dua na agilosi, ka kaya vua, “Mo duri cake mo kana.”

6A sa vakararai voli ko koya, ka raica, sa voleka ki na uluna e dua na keke sa vavi e na vatu katakata, kei na dua na saqa wai. A sa kana ko koya ka gunu, ka davo sobu tale.

7A sa qai lako vakarua mai na agilosi i Jiova, ka tarai koya, ka kaya, “Mo duri cake mo kana, ni sa rui balavu vei iko na sala.”

8A sa duri cake ko koya, ka kana ka gunu, ka lako e na kaukauwa ni kakana ko ya ka siga vasagavulu ka bogi vasagavulu ki Orepi na ulunivanua ni Kalou.

9A sa la'ki curuma e dua na qara vatu mai kea, ka moce kina; ka raica, sa vosa vua ko Jiova, ka kaya vua, “A cava ko mai cakava eke, Ilaijia?”

10Roma 11.3A sa kaya ko koya, “Au a lomakatakata vakalevu e na vuku i Jiova na Kalou-ni-lewevuqa. Ni ra sa biuta na veiyalayalati kei kemuni ko ira na Isireli, ka ra sa talaraka sobu na nomuni cabocabo-ni-soro, ka vakamatei ira na nomuni parofita e nai seleiwau. Ia koi au, ka'u sa vo duaduaga, ka ra sa segata tiko me ra vakamatei au.”

Rau Sota ko Ilaijia kei na Kalou mai Orepi

11A sa kaya ko koya, “Mo lako yani ka la'ki tu e na dela ni ulunivanua e na mata i Jiova, ni sa vakarau lako siviti iko ko Jiova.” Ka raica, sa liwa mai e dua na cagi levu ka kaukauwa sa sea na veiulunivanua, ka sa vorolaka na veiuluvatu e na mata i Jiova, ia sa sega ni tiko e na cagi ko Jiova. Ni sa oti na cagi, sa qai uneune na vanua, ia sa sega ni tiko e na uneune ko Jiova;

12ni sa oti na uneune ni vanua, sa qai dua na bukawaqa, ia sa sega ni tiko e na bukawaqa ko Jiova. Ia ni sa oti na bukawaqa, sa qai rogo mai e dua na domo lailai ka malumu.

13Ia ni sa rogoca ko Ilaijia, a sa ubia na matana e nona i tutuvi, ka curu yani, ka la'ki tu e na mata ni qara vatu. Ka raica, sa rogo vua e dua na vosa, ka vaka, “I Ilaijia, a cava ko sa cakava tiko eke?”

14A sa kaya ko koya, “Au a lomakatakata vakalevu e na vuku i Jiova na Kalou-ni-lewevuqa. Ni ra sa biuta na veiyalayalati kei kemuni ko ira na Isireli, era sa talaraka sobu na nomuni cabocabo-ni-soro, ka vakamatei ira na nomuni parofita e nai seleiwau. Ia koi au, ka'u sa vo duaduaga, ka ra sa segata tiko me ra vakamatei au.”

152Tui 8.7-13A sa kaya vua ko Jiova, “Mo lako, ka lesu tale e na nomu i lakolako e loma ni vanua lala ki Tamasiko. Ia ni ko sa yaco kina, mo lumuti Eseeli me tui Siria,

162Tui 9.1-6ka lumuti Jeu na luve i Nimesai me tui Isireli, ka lumuti Ilaisa na luve i Safati, na kai Epelimeola, me parofita me kemui sosomi.

17Ia ko koya sa dro bula mai nai seleiwau i Eseeli, ena vakamatea ko Jeu, kei koya sa dro bula mai nai seleiwau i Jeu, ena vakamatea ko Ilaisa.

18Roma 11.4Ia ka'u sa maroroya me noqu e le vitu na udolu vei ira na Isireli, ko ira kecega sa sega ni tekiduru vei Peali, kei na gusudra kecega sa sega ni reguci koya.”

Na Kacivi nei Ilaisa

19A sa lako tani mai kea ko koya, ka sa kunei Ilaisa na luve i Safati ni sa taura tiko nai sivi yara. Era sa yarataka tiko e ruasagavulu-ka-va na bulumakau, era noka vata vakayayarua, ka sa lako vata ko koya kei rau na kenai katinikarua. A sa lako yani vei koya ko Ilaijia, ka biuta vua na nona i tutuvi.

20A sa biuta tu na bulumakau ko koya, ka cicimuri Ilaijia, a sa kaya, “Me'u la'ki reguca mada na tamaqu kei na tinaqu, ka'u na qai muri iko.” A sa kaya vua ko koya, “Mo lesu tale yani; a cava beka ka'u sa kitaka vei iko?”

21A sa lesu yani ko koya, ka kauti rau na bulumakau ni siviyara, ka vakamatea, ka sa vakasaqa na lewedrau e nai yaya ni siviyara, ka solia vei ira na tamata, ka ra sa kana. Sa qai cavu tu, ka la'ki muri Ilaijia, ka qaravi koya.