Tiko mai na Lekutu 10 - Ai Vola Tabu (Vakadewa Makawa Vakavoutaki 2021)（FRV21）

Na Davui Siliva

1A sa kaya vei Mosese ko Jiova,

2“Mo cakava vei iko e rua na davui siliva. Mo cakava e na siliva sa lautuki, ia mo uvuca me ra vakasoqoni vata kina nai vavakoso taucoko, ka me ra cavu tu kina me lako talega na veivavakoso.

3Ia ni ra sa uvuca, me ra qai soqoni vata vei iko nai vavakoso taucoko ki na katuba ni vale ni veitavaki.

4Ia ni ra sa uvuca e dua ga, me ra qai soqoni vata vei iko na turaga, era sa liutaki ira na veiudolu ni Isireli.

5Ia ni dou sa uvuca vakaivalu, me ra qai cavu tu me lako yani ko ira na veivavakoso sa tiko e na yasana ki na tokalau.

6Ia ni dou sa uvuca tale vakaivalu na kenai karua, me ra qai cavu tu me lako yani ko ira na veivavakoso sa tiko ki na yasana sa donuya na ceva. Me ra dau uvuca vakaivalu me ra cavu tu me ra lako yani.

7Ia ni dou sa via vakasoqoni ira vata nai soqosoqo taucoko, dou uvuca ga, ia mo kakua ni uvuca vakaivalu.

8Ia me sa nodratou i tavi ga na bete na luve i Eroni me uvuca na davui, ia erau sa lesi vei kemudou me sa tawa mudu e na nomudou veitabatamata.

9Ia kevaka dou sa ia nai valu e na nomudou vanua kei ira na meca era sa vakasaurarataki kemudou, dou na qai uvuca vakaivalu na davui ruarua; ia ena qai nanumi kemudou ko Jiova na nomudou Kalou, ia dou na vakabulai mai vei ira na nomudou meca.

10E na siga talega dou sa reki kina, kei na nomudou solevu sa lokuci, kei nai vakatekivu ni nomudou veivula, dou na uvuca na davui ruarua, ni sa tu na nomudou i soro kama, kei na nomudou i madrali ni veivinakati; mo dou nanumi kina e na mata ni nomudou Kalou: Koi au ko Jiova na nomudou Kalou.”

Era Biuti Saineai na Isireli

11A sa yaco e nai karuasagavulu ni siga e nai karua ni vula, e nai karua ni yabaki, sa qai kau cake na o mai na dela ni vale ni Kalou sa tu kina na vunau.

12A ra sa qai cavu tu me ra lako ko ira na Isireli mai na vanua lala mai Saineai; a sa toka na o mai na vanua lala mai Perana.

13Sa qai vakatekivu na nodra lako yani, me vaka sa vakarota ko Jiova e na gusu i Mosese.

14Sa nodra i liuliu na kuila ni nodra i tikotiko na yavusa i Juta, me vaka na nodra veivavakoso; a sa lewa na nona i vavakoso ko Nasoni na luve i Amenatave.

15A sa lewa nai vavakoso ni nodra yavusa na luve i Isakari ko Nicaneli na luve i Suari.

16A sa lewa nai vavakoso ni nodra yavusa na luve i Sevuloni ko Iliavi na luve i Eloni.

17A sa qai sere na vale ni Kalou; a ra sa cavu tu me ra lako yani ka colata na vale ni Kalou ko ira na luve i Kerisoni, kei ira na luve i Mirari.

18Sa qai tarava na kuila ni nodra i tikotiko na Rupeni, me vaka na nodra veivavakoso; a sa lewa na nona i vavakoso ko Ilisuri na luve i Siteuri.

19A sa lewa nai vavakoso ni nodra yavusa na luve i Simione ko Silumieli na luve i Surisatai.

20A sa lewa nai vavakoso ni nodra yavusa na luve i Kata ko Eliasafi na luve i Tiueli.

21A ra sa qai cavu tu me ra lako yani ko ira na luve i Koaca, ka ra colata na vale tabu; ia ka so era sa vakaduria cake eliu na vale ni Kalou, a ra tadu e muri ko ira oqo.

22Sa qai tarava na kuila ni nodra i tikotiko na luve i Ifereimi me vaka na nodra veivavakoso, a sa lewa na nona i vavakoso ko Ilisama na luve i Amiute.

23A sa lewa nai vavakoso ni nodra yavusa na luve i Manasa ko Kamelieli na luve i Pitasuri.

24A sa lewa nai vavakoso ni nodra yavusa na luve i Penijamini ko Epitani na luve i Kitione.

25Sa qai tarava sara na kuila ni nodra i tikotiko na luve i Tani, o koya sa muria sara nai tikotiko kecega, me vaka na nodra veivavakoso, a sa lewa na nona i vavakoso ko Eieseri na luve i Amisatai.

26A sa lewa nai vavakoso ni nodra yavusa na luve i Aseri ko Pakieli na luve i Okirani.

27A sa lewa nai vavakoso ni nodra yavusa na luve i Navitalai ko Eira na luve i Enani.

28Sa vakaoqo na nodra i lakolako na Isireli e na nodra veivavakoso, ni ra sa cavu tu me ra lako yani.

29A sa kaya ko Mosese vei Opapi, na luve i Riueli na kai Mitiani, na vugoi Mosese, “Keimami sa lako tu ki na vanua sa kaya kina ko Jiova, ‘Au na solia vei kemudou.’ Tou lako vata, ia keimami na caka vinaka vei iko, ni sa yalataka ko Jiova ena yacovi ira na Isireli na ka vinaka.”

30A sa kaya vua ko koya, “Au na sega ni lako; ia ka'u na lesu ga ki na noqu vanua, kivei ira na kai noqu.”

31A sa kaya ko koya, “Mo kakua ni laivi keimami, ni ko sa kila nai tikotiko e na vanua lala me keimami tiko kina, ia ko na vaka na mata vei keimami.

32Ia kevaka ko na lako vata kei keimami, keimami na qai kitaka vei iko na ka vinaka me vaka sa kitaka vei keimami ko Jiova.”

Era sa Lako Yani na Isireli

33A ra sa lako tani mai na ulunivanua i Jiova, ka lako tu ka bogi tolu. A sa liutaki ira tiko na kato ni veiyalayalati i Jiova e nai lakolako e na bogi tolu, me qara na yasana me ra vakacegu kina.

34Ia ni ra sa lako tu yani mai nai tikotiko, sa vakarurugi ira e na siga na o i Jiova.

35 Same 68.1 Ia ni sa dau liu yani na kato, sa dau qai kaya ko Mosese,

“Mo ni duri cake, i Jiova, ka me ra veiseyaki na nomuni meca,

ka dro tani e na matamuni ko ira era cati kemuni.”

36Ia ni sa dau vakatikori lesu tale na kato, sa qai kaya ko koya,

“Mo ni lesu tale mai, i Jiova, kivei ira na veiudolu vakavuqa ni Isireli.”