Filipai 3 - Ai Vola Tabu (Vakadewa Makawa Vakavoutaki 2021)（FRV21）

Na Yalosavasava Dina

1Meu tinia oi kemudou na wekaqu, mo dou reki e na Turaga. Meu vola vei kemudou na veika ka'u a vola eliu sa sega dina ni ka rarawa vei au, ia na ka dou sa tu vinaka kina.

2Dou qarauni kemudou vinaka mai na koli, dou qarauni kemudou mai vei ira era sa daucaka ca, dou qarauni kemudou mai vei ira na cili.

3Sai keda ga na veicili koi keda sa masu vakayalo vua na Kalou, ka rekitaki Karisito Jisu, ka sega ni vakararavi ki na yago.

4Ia koi au, e dina sa noqu na ka vakayago me'u vakararavi kina.

Kevaka e dua tale sa nanuma sa tu vua e dua na ka vakayago me vakararavi kina, au sa uasivi cake kina:

5Caka 23.6; 26.5; Roma 11.1au a cilivi e nai kawalu ni siga, au a sucu me luve i Isireli, mai na yavusa i Penijamini, koi au na Iperiu sa sucu mai na Iperiu; e na ka ni vunau, au a Farisi;

6Caka 8.3; 22.4; 26.9-11e na ka ni lomakatakata, au a vakacacana nai soqosoqo lotu; e na veivakadonui sa vakayacori mai na vunau, sa sega na noqu cala.

7Ia na veika ka'u a taleitaka e sa vaka me yali vakadua vei au me noqu kina na Karisito.

8Io, e dina ga, ni'u sa qai vakayalitaka vakadua vei au na ka kecega ni sa uasivi cake kina na veikilai kei Karisito Jisu na noqu Turaga. E na vukuna ka'u sa vosota kina me yali vei au na ka kecega, ia ka'u sa okati ira me ra de-ni-manumanu walega, me'u rawai Karisito kina me noqu,

9me keirau kune vata kaya, me kakua ni tu vei au na veivakadonui sa rawa mai na vunau, ia ko ya ga sa rawa e na vakabauti Karisito, na veivakadonui sa mai vua na Kalou e na vuku ni vakabauta.

10Me'u kilai koya kei na kaukauwa ni nona tucake tale mai na mate, ka me keirau veitokani vata kaya e na ka rarawa, me'u vakatauvatani kaya e na nona mate,

11de rawa ni yaco vakakina vei au na tucake tale mai na mate.

Sasaga me Rawati nai Cocovi

12Au sa sega ni kaya ni'u sa rawata kece, se'u sa vinaka sara; ia ka'u sa sasaga tikoga me'u taura dina na ka sa tauri au kina ko Karisito Jisu.

13Oi kemudou na veiwekani, au sa sega ni vakasamataka ni'u sa taura oti; ia sa dua bauga na ka ka'u sa kitaka, au sa guilecava na ka sa sivi, ka'u sa kakavaki me'u tadolova na ka ki liu,

14ka'u sa ciciva na cere, me'u tauca na cere sa kacivi au kina mai cake na Kalou e na vuku i Karisito Jisu.

15O koya me da qai lomavata e na ka oqo, oi keda kecega sa matua e na lotu; ia kevaka sa dua na ka dou sa sega ni lomavata kina, ena vakaraitaka talega vei kemudou na Kalou na ka ko ya.

16Ia, na ka eda sa yacova sara ga, me da muria tiko nai vakarau ko ya.

17 1Kori 4.16; 11.1 Oi kemudou na veiwekani, dou muri au vata ga, ka vakaraici ira era sai valavala vakakina, ni keitou sai vakarau vei kemudou.

18Ni ra sa lewe vuqa ka'u sa tukuna wasoma vei kemudou, ia ka'u sa qai tukuna talega ni'u sa tagi tiko, ni ra sa meca ni kauveilatai i Karisito e na nodra i valavala.

19Ia sa kedrai tinitini na rusa; a nodra kalou na ketedra; era sa vakalevulevui e na nodra ka e veivakamaduataki; a ra sa daunanuma na veika ni vuravura.

20Ia eda sa lewe ni koro mai lomalagi koi keda, eda sa waraka mai kina nai Vakabula, na Turaga ko Jisu Karisito.

21O koya ena vakamataliataka na yagoda sa malumalumu, me vakatauvatani kei na yagona sa vakaiukuukutaki, me vaka na kaukauwa sa vakamalumalumutaka rawa kina na ka kecega ko koya.