Josua 3 - Ai Vola Tabu (Vakadewa Makawa Vakavoutaki 2021)（FRV21）

Era Takosova na Joritani na Isireli

1A sa sou e na mataka ko Josua ka ra sa biuti Sitimi. Era sa qai lako mai ki na Joritani, ko koya kei ira kecega na Isireli, ka ra moce kina ni bera ni ra qai lako takoso ki tai kadua.

2Ni sa oti e bogi tolu, era qai lako nai vakalesilesi e na maliwa ni tikotiko

3ka ra vakaroti ira na tamata, ka kaya, “Ni kemuni sa raica na kato ni veiyalayalati i Jiova na nomuni Kalou, kei ira na bete na Livai ni ra sa colata yani, mo ni qai cavu tu mai na nomuni i tikotiko, ka muria.

4Ia me tiko e dua nai yalayala e na kemuni maliwa kei na kato ni veiyalayalati, ka me rua na udolu na kiupiti beka na kenai vakarau. Ni kakua ni toro volekata, baleta mo ni kila rawa kina na sala mo ni na lakova, me vaka ni ko ni se sega mada ni se lakova na sala oqo eliu.”

5A sa qai kaya vei ira na tamata ko Josua, “Ni vakasavasavataki kemuni; ni na kitaka na cakacaka mana eso ko Jiova e na kemuni maliwa e na mataka.”

6A sa vosa vei ira na bete ko Josua, ka kaya, “Dou laveta cake na kato ni veiyalayalati, ka liutaki ira na tamata.” A ra laveta cake na kato ni veiyalayalati, ka liutaki ira na tamata.

7A sa kaya vei Josua ko Jiova, “Au na vakatekivu me'u vakalevulevui iko e na siga oqo e na matadra kecega na Isireli, me ra kila kina ni'u na tiko vata kei iko me vaka ka'u a tiko vata kei Mosese.

8Ia ko iko, mo vakaroti ira na bete era sa colata na kato ni veiyalayalati, ka kaya, ‘Ni dou sa lako mai ki na bati ni wai ni Joritani, dou na tu vakadua e na Joritani.’ ”

9A sa kaya vei ira na Isireli ko Josua, “Ni toro mai, ka rogoca na vosa i Jiova na nomuni Kalou.”

10Sa kaya talega ko Josua, “E na ka oqo kemuni na kila ni sa tiko e na kemuni maliwa na Kalou bula, ka na vakasevi ira vakaidina e matamuni na kai Kenani, kei ira na Itaiti, kei ira na Aivaiti, kei ira na Perisaiti, kei ira na Kakesaiti, kei ira na Amoraiti, kei ira na Jepusaiti.

11Raica, na kato ni veiyalayalati nei koya na Turaga kei vuravura kecega sa liutaki kemuni ki loma ni Joritani.

12Ia oqo, ni kauta e le tinikarua na tamata mai vei ira na veiyavusa i Isireli, me tau yadua na tamata mai na veiyavusa.

13Ia ni sa tu e na wai ni Joritani na qeteqete ni yavadra na bete sa colata na kato i Jiova na Turaga kei vuravura kecega, ena qai mudu ni drodro na wai ni Joritani, io na wai sa drodro sobu mai cake, ka na bini ki cake sara me vaka e dua na suvasuva levu.”

14Ia ni ra sa cavu tu na tamata mai nodra veivale laca, me ra lakova na Joritani, sa qai liutaki ira na tamata ko ira na bete ka colata na kato ni veiyalayalati;

15ia ni ra sa yaco ki na Joritani ko ira ka colata na kato, ka sa dromu e na bati ni wai na yavadra na bete ka colata na kato (ni sa dauvuabale na Joritani ka sa dauluvu na batina, e na gauna ni magomago),

16sa qai tu vakadua na wai sa drodro sobu mai cake, ka sa tubu me cecere, ka vaka e dua na suva levu, ka vakayawa sara mai Atama, na koro sa rau veivolekati kei Saricani; a sa muduki laivi oqori sa lako sobu vaka ki na waitui mai na vanua veibuca, io, na wasa Tuituina. A ra sa lako ki tai kadua ko ira na tamata e na tikina ka donui Jeriko.

17A sa tudei e na qele mamaca e na loma ni Joritani ko ira na bete era colata na kato ni veiyalayalati nei Jiova, a sa lako e na qele mamaca ki tai kadua ko ira kecega na Isireli, ka sa oti na matanitu taucoko ni ra lakova na Joritani.