Jeremaia 6 - Ai Vola Tabu (Vakadewa Makawa Vakavoutaki 2021)（FRV21）

Sa Vakavolivoliti Jerusalemi ko Ira na Meca

1Dou dro tani, koi kemudou na Penijamini,

mai na loma i Jerusalemi!

Ia dou uvuca na davui mai Tikoa,

ka dou vakaduria na bukawaqa mei vakatakilakila mai Peci-akarimi;

ni sa dua na ca sa rairai mai na mata ni vualiku,

ka dua na veivakarusai levu.

2Au sa vakatauvatani koya na goneyalewa ni Saioni

kei na dua na yalewa matavinaka ka tabusiga;

3eratou na lako vua ko ira nai vakatawa kei na nodratou qele ni sipi;

era na mai birika vakavolivoliti koya na nodra valelaca;

era na dui kana yadua e nona tikina.

4“Dou vakarau i valu vua;

dou tu, me da ravuravu e na siga levu!

Ulei koi keda, ni sa kala na siga,

ni sa balavu mai na yaloyalo ni yakavi!

5Dou tucake, me da ravuravu e na bogi,

me da vakarusa na nona veivale vakaturaga!”

6Sa vakaoqo na vosa i Jiova-ni-lewevuqa,

“Dou taya sobu na kau,

ka viri suva kei Jerusalemi.

Oqo na koro me cudruvi;

sa caka e loma ni koro nai valavala vakasausa.

7Me vaka sa vakadavea na kena wai e dua na mata-ni-wai,

sa vakadavea vakakina ko koya na nona ca;

nai valavala kaukauwa kei na veivakacacani sa daurogo kina;

sa tiko ga e mataqu na mate kei na mavoa.

8Mo vakavulici mada, Jerusalemi,

de lako tani vei iko na yaloqu;

de'u vakalalataki iko

mo vanua e sega ni tawa.”

Na Talaidredre i Isireli

9Sa kaya vakaoqo ko Jiova-ni-lewevuqa,

“Era na vetia sara na kena vo ni Isireli

me vaka sa veti na vua-ni-vaini;

mo vakalesuya tale na ligamu ki na sova

me vaka na dauveti vua-ni-vaini.”

10Me'u vosa vei cei, ka ia kina na veivakasalataki,

me ra rogoca kina?

Raica, sa sega ni cilivi na daligadra,

a ra sa sega ni vakarorogo rawa;

raica, na vosa i Jiova sai tukutuku ca vei ira;

era sa sega ni vinakata.

11Ia ka'u sa sinai kina e na cudru i Jiova;

ka'u sa oca ni vosota.

“Sova yani vei ira na gone e gaunisala,

vei ira vata kei na nodra i soqosoqo na cauravou;

ni na tauri vata na tagane kei na watina,

na qase kei koya sa vuqa na nona siga.

12Ia ena soli vei ira na tani na nodra veivale,

kei na nodra veiwere kei na watidra;

ni'u na dodoka na ligaqu

vei ira na lewe-ni-vanua,”

sa kaya ko Jiova.

13“Ni ra sa daukocokoco kecega

ko ira na tamata wale kei ira talega na turaga;

a ra sa cakacaka vakailasu kecega na parofita

ka yacovi ira talega na bete.

14 Isi 13.10 Ka ra sa vakamavotaka vakaca ga na nona mavoa na goneyalewa ni noqu tamata,

ni ra kaya, ‘Dou vakacegu; dou vakacegu’,

ni sa sega na vakacegu.

15 Jere 8.10-12 Era sa madua beka ni ra sa kitaka na ka vakasisila?

E segai, era sa sega sara ni madua vakalailai,

sa sega sara talega ni ra mata madua rawa.

O koya oqo era na bale vata kina kei ira sa bale;

e na gauna ka'u na cudruvi ira kina, era na vakabalei sobu,”

sa kaya ko Jiova.

Era Cata na Isireli na Sala i Jiova

16Sa kaya vakaoqo ko Jiova,

“Dou tu e na sala, ka vakararai,

ka taroga nai lakolako makawa,

se sa evei na sala vinaka; ia dou lako ga kina,

dou na qai kunea kina na vakacegu ni yalomudou.

Ia era sa kaya, ‘Keimami na sega ni lako kina.’

17Au a lesia talega eso me nomudou i vakatawa, ka kaya,

‘Dou vakarorogo ki na rorogo ni davui.’

Ia era sa kaya, ‘Keimami na sega ni vakarorogo.’

18O koya oqo dou rogoca kina, na lewe ni veivanua,

ka kila, koi kemudou nai soqosoqo, na ka sa tu vei ira.

19Rogoca mada, na vuravura; raica, ka'u na vakayacora na ca vei ira na tamata oqo,

io na vua ni nodra nanuma,

ni ra sa sega ni rogoca na noqu vosa, se na noqu vunau;

era sa biuta ga.

20A cava na betena ni sa kau mai vei au na ka boi vinaka mai Sipa,

kei na kalamosi vinaka mai na vanua vakayawa?

A nomudou i soro kama sa sega ni donu,

kei na nomudou i madrali sa sega ni kamikamica vei au.

21O koya sa kaya kina ko Jiova,

‘Raica, ka'u na tauca vei ira na tamata oqo

na ka me ra toqi kina, ka ra na bale vata kina;

na qase kei na luvedra,

na tamata kei na wekana era na rusa.’ ”

Na Veivaluvaluti mai na Tokalau

22Sa kaya vakaoqo ko Jiova,

“Raica, e dua na matatamata sa lako mai na vanua mai na vualiku,

ia e dua na matanitu levu ena vakaturi mai nai yalayala kei vuravura.

23Era na lukuta na dakai kei na moto;

era sa yalokaukauwa, ka sega ni kila na loloma;

a domodra ena vadugu me vaka na wasawasa;

era sa vodo ose, ka tuvai me vaka na tamata

me ia nai valu kivei iko, na goneyalewa ni Saioni.”

24Keitou sa rogoca na kenai rogorogo,

sa malumalumu mai na liga i keitou;

sa tauvi keitou na rarawa,

kei na yaluma me vaka na yalewa sa taratara.

25Kakua ni ko lako yani ki na were,

ia mo kakua ni lakova na gaunisala;

e na vuku ni seleiwau ni meca

kei na rere sa tu e na veiyasana.

26Ko iko, na goneyalewa ni noqu tamata,

vauci iko e nai sulu taga, ka qiqi e na dravusa;

mo ia na tagi, me vaka e dua sa tagicaka na luvena e duabau ga,

na tagi rarawa sara,

ni na vakidacala na nona lako mai

vei keda na dauvakacaca.

27“Au sa lesi iko mo vale cecere e na kedra maliwa na noqu tamata, mo vale kaukauwa,

mo kila ka vakatovolea kina na nodra i valavala.

28Ko ira kecega era sa dauvuki vakaca,

era sa daulako voli ka vakaucaca;

era sa parasa ka kaukamea,

ko ira kecega era sa dauvakacaca.

29Sa kama nai iri ni bukawaqa,

a sa oti e na bukawaqa na uma;

sa sega ni yaga na nona cakacaka na dauvakariri siliva,

ni sa sega ni takivi tani na tamata ca.

30Era na vakatokai me siliva biu,

ni sa biuti ira ko Jiova.”