Vakatakila 19 - Ai Vola Tabu (Vakadewa Makawa Vakavoutaki 2021)（FRV21）

Na Marau mai Lomalagi

1Sa oti na veika oqo, ka'u a rogoca na domodra na lewe vuqa mai lomalagi, era sa kaya,

“Aleluya!

Na veivakabulai, kei na vakavinavinaka, kei na vakarokoroko, kei na kaukauwa,

sa nona ga na noda Kalou,

2 Vrua 32.43; 2Tui 9.7 ni sa dina ka dodonu na nona lewa;

ni sa lewai koya na yalewa ka dautagane vakalevu,

o koya sa vakadukadukalitaki vuravura e na nona dautagane,

ka sa sauma vei koya na kedra dra na nona tamata dauveiqaravi.”

3 Aisea 34.10 A ra sa qai kaya tale,

“Aleluya!

Sa kuvu cake na kena kubou me sega ni mudu.”

4A sa cuva sobu na qase e lewe ruasagavulu-ka-va, kei na ka bula e le va, a ra sa vakarokoroko vua na Kalou o koya sa tiko e nai tikotiko-vakaturaga, ka kaya,

“Emeni. Aleluya!”

5 Same 115.13 A sa dua na domo sa rogo mai nai tikotiko-vakaturaga, sa kaya,

“Vakavinavinaka ki na noda Kalou,

oi kemudou kecega na nona dauveiqaravi,

kei kemudou sa rerevaki koya,

se dou tamata lalai se dou turaga.”

6 Isi 1.24; Same 93.1; 97.1; 99.1 Au sa rogoca na ka e vaka na domo ni lewe vuqa, ka vaka na domo ni wai e vuqa, ka vaka na domo ni kurukuru levu, sa kaya,

“Aleluya!

Sa lewa na Turaga na Kalou Kaukauwa sara.

7Tou marau ka reki

ka ia na vakarokoroko vei koya,

ni sa yaco na vakawati ni Lami,

ka sa vakarautaki koya vakai koya na watina yalewa;

8ka sa vakadonui vua me vakaisulu

e na lineni matailalai, sa savasava ka lumilumisa”—

ni sa nodra i valavala dodonu na yalosavasava na lineni matailalai.

9 Maciu 22.2,3 Ka sa kaya vei au na agilosi, “Mo vola, Sa kalougata ko ira era sa kacivi ki nai vakayakavi ni vakawati ni Lami.” A sa kaya vei au ko koya, “Oqo gona na vosa dina ni Kalou.”

10Ia ka'u a cuva ki yavana me'u vakarokoroko vei koya. A sa kaya vei au ko koya, “Raica, mo kakua! Oi au na nomu i tokani dauveiqaravi, ka dua vei ira na tacimu ka sa taura tiko nai tukutuku kei Jisu. Vakarokoroko ga vua na Kalou!” Ia nai tukutuku kei Jisu sai koya na yalo ni parofisai.

O Koya sa Vodoka na Ose Vulavula

11 Isi 1.1; Same 96.13; Aisea 11.4 Ia ka'u a raici lomalagi ni sa dola tu, ka raica sa dua na ose vulavula! O koya sa vodo kina sa vakatokai ko Dodonu ka Dina, ka sa lewa vakadodonu ko koya ka kitaka nai valu.

12Tani 10.6A matana e vaka na yameyame ni buka, ka sa toka e na uluna nai sala-vakaturaga e vuqa; a sa volai na yacana, ia sa sega na tamata e kila, o koya duaduaga.

13A sa vakaisulu e nai sulu sa kureitaki kina na dra, ka sa vakatokai na yacana Na Vosa ni Kalou.

14Ia ko ira na mataivalu mai lomalagi era sa muri koya, ni ra sa vodo e na veiose vulavula, a ra sa vakaisulu e na lineni matailalai, e vulavula ka savasava.

15Same 2.9; Aisea 63.3; Joeli 3.13; Vtaki 14.20A sa dara mai na gusuna e dua nai seleiwau gata, me yaviti ira kina na veimatanitu ko koya, ia ena lewai ira e nai titoko kaukamea. A sa butuka ko koya nai keli-waini ni cudru waqawaqa ni Kalou Kaukauwa.

16Ia na yacana sa volai e na nona i sulu kei na sagana talega, “Na Tui ni tui kecega kei na Turaga ni veituraga kecega.”

Sa Vakadrukai na Manumanu kei na Nona Mataivalu

17 Isi 39.17-20 Ia ka'u a raica e dua na agilosi sa tu e na mata-ni-siga, ka sa kaci e na domo levu ko koya, ka kaya vei ira kecega na manumanu era vuka e na maliwa kei lomalagi, “Dou vakasoqoni kemudou vata mai ki nai vakayakavi ni Kalou levu,

18mo dou kania na lewedra na tui, kei na lewedra na turaga-ni-valu, kei na lewedra na tamata qaqa, kei na lewedra na ose, kei ira era sa vodo kina—na lewedra kecega, se rai taukei se ra bobula, se ra tamata lalai se ra turaga.”

19Ia ka'u a raica na manumanu, kei ira na tui kei vuravura, kei na nodra mataivalu, era sa soqoni vata mai me ra veivala kaya sa vodo e na ose, kei ira na nona mataivalu.

20Vtaki 13.1-18A sa tauri na manumanu, ka sa tauri vata kaya na parofita vakailasu, o koya sa kitaka na cakacaka mana e matana, o koya sa dau lari ira kina era sa volai e nai vakatakilakila ni manumanu, kei ira era sa vakarokoroko ki na nona matakau. Oi rau ruarua oqo erau sa biu bulabula ki na drano bukawaqa sa caudre e na sulifure.

21Ia ko ira na kena vo era sa vakamatei e nai seleiwau i koya sa vodo e na ose, nai seleiwau sa lako mai na gusuna; ia ko ira kecega na manumanu vuka era sa mamau e na lewedra.