1Sa ra vala kei ira na Isireli ko ira na kai Filisitia, ka ra sa dro tani ko ira na Isireli mai vei ira na kai Filisitia, ka ra bale mate mai na Ulunivanua ko Kilipoa.
2A ra sa cici muri Saula kei iratou na luvena ko ira na kai Filisitia. Ko ira na kai Filisitia era sa qai mokuti Jonacani kei Epinatapi kei Malikisua, o iratou na luve i Saula.
3A sa gumatua vei Saula nai valu, ka sa lau gasau ko koya vei ira na tamata dauvavana; a sa vakamavoataki vei ira na dauvavana.
4A sa kaya ko Saula vua sa daucolata na nona i yaragi, “Ucuna na nomu i seleiwau ka suaki au kina, de ra lako mai na tamata sa sega ni cili oqo, ka suaki au, ka vakalialiai au.” Ia sa bese ko koya sa daucolata na nona i yaragi, ni sa rere vakalevu. A sa taura ga kina na nona i seleiwau ko Saula, ka baletaka.
5Ia ni sa raica ko koya sa daucolata na nona i yaragi ni sa mate tu ko Saula, a sa baletaka talega ko koya na nona i seleiwau, ka mate vata kaya.
6A sa mate kina ko Saula, kei iratou na luvena tolutolu, kei koya sa daucolata na nona i yaragi, kei ira na nona tamata kecega, e na siga vata ko ya.
7Ia ni ra sa raica ko ira na Isireli era sa tiko e na yasa ni buca kadua, kei ira era tiko mai tai kadua ni Joritani ni ra sa dro na Isireli ka sa mate tu ko Saula kei iratou na luvena, era sa qai biuta na nodra veikoro, ka dro. A ra sa qai lako mai ko ira na kai Filisitia ka tiko kina.
8Ia e na mataka, ni ra sa lako na kai Filisitia me ra luvata tani na nodra i sulu na moku, era sa kunei Saula kei iratou na luvena tolutolu, ni ratou sa bale tu e na Ulunivanua ko Kilipoa.
9A ra sa tamusuka na uluna, ka luvata tani na nona i yaragi, ka ra vakatadu mata voli ki na nodra vanua na kai Filisitia, me ra tukuna e na bure ni nodra veimatakau, vei ira talega na tamata.
10A ra sa ciqira na nona i yaragi e na bure i Aseteroci, ka ra sa vakota na yagona ki na bai ni koro mai Peci-sani.
11Ia ni ra sa rogoca na kai Jepesi-kiliati na ka sa kitaka vei Saula ko ira na kai Filisitia,
12era sa cavu tu ko ira kecega na tamata qaqa, ka lako tu e na bogi taucoko ko ya, ka kevutaka sobu na yago i Saula kei na yagodratou na luvena mai na bai ni koro mai Peci-sani, ka lesu tale mai ki Jepesi, ka vakama mai kina.
13A ra sa kauta na suidratou ka buluta e na ruku ni dua na vunikau mai Jepesi, ka lolo me bogi vitu.
Who We AreWhat We EelieveWhat We Do
2025 by iamachristian.org,Inc All rights reserved.
