Taito 1 - Ai Vola Tabu (Vakadewa Makawa Vakavoutaki 2021)（FRV21）

Nai Vakabula

1Koi au ko Paula, na dauveiqaravi ni Kalou kei na apositolo i Jisu Karisito, e na vuku ni nodra vakabauta na tamata sa digitaki ira na Kalou, kei na vakatusai ni vakavuvuli dina sa vakalou,

2e na vakanuinuitaki ni bula tawa mudu, o koya sa yalataka eliu na Kalou, o koya sa sega ni lasu rawa, ka sa qai vakatekivu e muri ko vuravura—

3a sa qai vakaraitaka na nona vosa e na kena gauna ni sa vunautaki, ka'u sa lesi kina me'u ia me vaka na nona vosa na Kalou na noda i Vakabula,

4 2Kori 8.23; Kala 2.3; 2Timo 4.10 Kivei Taito, na luvequ dina me vaka na vakabauta sa tu vei keda kecega:

Me sa nomu na loloma, na yalololoma, kei na vakacegu mai vua na Kalou ko Tamada kei na Turaga ko Karisito Jisu na noda i Vakabula.

Na Cakacaka i Taito mai Kiriti

5Au a laivi iko mai Kiriti, mo vakadodonutaka na veika sa vo, ka mo lesia nai talatala qase ki na veikoro yadua, me vaka ka'u a vakarota vei iko:

61Timo 3.2-7kevaka e dua sa sega ni cala, sa vakawati vakadua, a ra sa vakabauta ko ira na luvena, a sa sega ni beitaki vei ira nai valavala vakatani, se na talaidredre.

7Ni sa dodonu me tawa cala nai talatala qase, me vaka sai talatala ni Kalou. Me kakua ni domoqa, me kakua ni daucudrucudru, me kakua ni daugunu waini, me kakua ni dauveiba, me kakua ni daudomona nai yau vakasisila;

8ia me dauvakacegui ira na vulagi, me daulomani ira na tamata vinaka, me yalomatua, me yalododonu, me yalosavasava, ka me bula vakaivakarau.

9Me taura matua nai vakavuvuli dina sa vakatavulici kina, me rawata ko koya me vakarota nai vakavuvuli sa vinaka, ka vunauci ira talega era sa vosa vakatani.

Me Ra Saqati nai Vakavuvuli Vakailasu

10Ni ra sa lewe vuqa era sai valavala vakatani, era sa dautalanoa walega ka dauveivakaisini, era sa vakakina vakalevu ko ira na cili.

11Ia ka sa dodonu me ra vagalui, ni ra sa vakacalai ira kece na lewe-ni-vuvale eso, ni ra sa vakatavulica na ka sa sega ni kilikili, e na vuku ni yau vakasisila.

12E dua vei ira, a nodra parofita, sa kaya,

“A nodra i tovo ga na kai Kiriti me ra daulasu, era manumanu ca, era sa daukana ka vucesa.”

13Sa dina nai tukutuku oqo. O koya oqo mo qai vunauci ira vakadodonu, me vinaka kina na nodra vakabauta,

14me ra kakua ni nanuma nai tukuni walega vaka-Jiu, se na nodra veivakaro na tamata era sa lesu tani mai nai vakavuvuli dina.

15Sa savasava na ka kecega vei ira era sa yalosavasava, ia vei ira era sa dukadukali ka sega ni vakabauta sa sega na ka sa savasava; ia sa dukadukali na nodra lewa-e-loma kei na yalodra.

16Era kaya era sa kila na Kalou, ia e na nodra i valavala era sa cakitaka. Era sa tamata vakasisila, ka talaidredre, ka sega ni yaga ki na dua na cakacaka vinaka.