Lako Yani 6 - Ai Vola Tabu (Vakadewa Makawa Vakavoutaki 2021)（FRV21）

Vakadeitaki na Nodra Sereki na Isireli

1A sa kaya vei Mosese ko Jiova, “Oqo ko na qai raica na ka ka'u na kitaka vei Fero: Ni na laivi ira ko koya me ra lako e na vuku ni liga kaukauwa, ia e na vuku ni liga kaukauwa ena vakasevi ira tani mai na nona vanua.”

2 ia ka'u a sega ni kilai vei ira e na yacaqu ko JIOVA.

4Ia ka'u a vakataudeitaka talega na noqu vosa ni yalayala vei iratou, me'u solia vei iratou na vanua ko Kenani, na vanua era veilakoyaki voli kina, eratou a tiko vulagi kina.

5Ia ka'u sa rogoca talega na nodra vutugu na Isireli, era sa vakabobulataka ko ira na kai Ijipita; ia ka'u sa nanuma na noqu vosa ni yalayala.

6O koya oqo mo kaya kina vei ira na Isireli, ‘Sai au ko Jiova, ia ka'u na kauti kemuni tani mai na nodra i lesilesi-bibi na kai Ijipita, ia ka'u na sereki kemuni mai na nodra veivakabobulataki, ka vakabulai kemuni e na ligaqu sa dodo tu, kei na cudru levu.

7Ia ka'u na kauti kemuni mai mo ni noqu tamata, ia ka'u na nomuni Kalou. Ia ko ni na kila ni sai au ko Jiova na nomuni Kalou, ko koya sa kauti kemuni tani mai na nodra i lesilesi-bibi na kai Ijipita.

8Ia ka'u na kauti kemuni ki na vanua ka'u a bubului kina me'u solia vei Eparaama, vei Aisake, kei Jekope; ia ka'u na solia vei kemuni mo ni kenai taukei. Koi au ko Jiova.’ ”

9A sa vosa vakakoya vei ira na Isireli ko Mosese; ia era sa sega ga ni vakarorogo vei Mosese ni sa mavoa na yalodra ka ni ra sa vakabobulataki vakararawa sara.

10A sa vosa vei Mosese ko Jiova, ka kaya,

11“Mo lako mada, ka la'ki kaya vei Fero na tui Ijipita me sereki ira na Isireli me ra biuta na nona vanua.”

12Ia sa vosa e na mata i Jiova ko Mosese, ka kaya, “Raica, ko ira na Isireli era sa sega ni vakarorogo vei au; me na qai rogoci au vakacava ko Fero ni'u sa sega ni dauvosa matata?”

13A sa vosa vei Mosese kei Eroni ko Jiova, ka vakaroti rau me rau lako vei ira na Isireli, vei Fero talega na tui Ijipita, ka me kauti ira tani na Isireli mai na vanua ko Ijipita.

Nai Tukutuku ni Vuvale nei Mosese kei Eroni

14Ko ira oqo sa turaga e na vale ni nodra qase: ko iratou na tagane na luve i Rupeni, na ulumatua i Isireli; ko Enoke, kei Palu, ko Esironi, kei Kamai; sai ira oqo na vuvale i Rupeni.

15Ia na tagane na luve i Simione; ko Jimueli, kei Jamini, kei Oati, kei Jakini, kei Soari, kei Saula, a luvena e dua na yalewa ni Kenani; sai ira oqo na vuvale i Simione.

16 Tiko 3.17-20; 26.57,58; 1Vei 6.16-19 Ia oqo na yacadratou na tagane na luve i Livai, e na nodra i tabatamata; ko Kerisoni, kei Koaca, kei Mirari, ia na yabaki sa bula kina ko Livai sa dua na drau ka tolusagavulu ka vitu.

17A luve i Kerisoni; ko Lipini, kei Semeai, e na nodrau vuvale.

18Ia na luve i Koaca: ko Emirami, kei Isari, kei Epironi, kei Usieli, ia na yabaki sa bula kina ko Koaca e dua na drau ka tolusagavulu ka tolu.

19Ia na luve i Mirari erau tagane; ko Mali, kei Musi. Sai ira oqo na vuvale i Livai, e na nodra i tabatamata.

20Ia ko Emirami sa vakawati kei Jokapeti na gane i tamana; a sa sucu na luvedrau ko Eroni kei Mosese, ia na yabaki sa bula kina ko Emirami e dua na drau ka tolusagavulu ka vitu.

21Ia na tagane na luve i Isari; ko Kora, kei Nefeki, kei Sikiri.

22Ia na luve i Usieli; ko Misaeli, kei Ilisabani, kei Siciri.

23Ia ko Eroni sa vakawati kei Elisepa, ko koya na luve i Amenatave, na gane i Nasoni; a sa vakasucumi Netapi, kei Epaiu, kei Iliesa, kei Icama, ko koya.

24Ia na tagane ka luve i Kora: ko Asiri, kei Ilikana, kei Epiasafi; sai ira oqo na nodra vuvale na luve i Kora.

25Ia ko Iliesa, na luve i Eroni, sa vakawati kei na dua vei ira na yalewa na luve i Putieli; a sa vakasucumi Finiasi vua. Sa vakaoqo na turaga vei ira na qase ni Livai, e na nodra veimataqali.

26Koi rau oqo ko Eroni kei Mosese sa kaya kina ko Jiova, “Drau kauti ira na Isireli mai na vanua ko Ijipita me vaka na nodra veivavakoso.”

27Koi rau oqo ka vosa vei Fero na tui Ijipita me rau kauti ira na Isireli mai Ijipita, koi rau oqo ko Mosese kei Eroni.

Nai Vakaro nei Jiova vei Mosese kei Eroni

28E na siga ka vosa kina vei Mosese ko Jiova mai na vanua ko Ijipita,

29sa vosa vei Mosese ko Jiova, ka kaya, “Koi au ko Jiova; mo tukuna vei Fero na tui Ijipita na ka kecega ka'u sa kaya vei iko.”

30Ia sa kaya e na mata i Jiova ko Mosese, “Raica, au sa tamata gusu berabera, ena qai vakarorogo vakacava li vei au ko Fero?”