2 Veigauna 12 - Ai Vola Tabu (Vakadewa Makawa Vakavoutaki 2021)（FRV21）

Sa Valuti Juta ko Ijipita(1 Tui 14.25-28)

1Ia ni sa vakataudeitaka na matanitu ko Reopoama, ka vakaukauwataki koya, sa biuta na vunau i Jiova ko koya, kei ira vata kaya na Isireli kecega.

2Ia e na kenai kalima ni yabaki i Reopoama na tui, sa la'ki vala ki Jerusalemi ko Sisaki na tui Ijipita, ni ra a talaidredre vei Jiova,

3a sa lako vata kaya e tinikarua na drau (1,200) na qiqi-ni-valu, ka le ono na oba (60,000) na tamata dauvodo ose. A sa sega ni wili rawa ko ira na tamata era sa lako vata kaya mai Ijipita—ko ira na kai Libiya, ko ira na Sukiyi, kei ira na kai Eciopea.

4A sa rawa na veikoro vakabai sa nei Juta, ka lako ki Jerusalemi.

5Sa qai lako ko Semaia na parofita kivei Reopoama, kei ira na turaga ni Juta, era sa soqoni vata ki Jerusalemi e na vuku i Sisaki, a sa kaya vei ira, “Sa vosa vakaoqo ko Jiova, Dou sa biuti au, ia ka'u sa biuti kemudou kina ki na liga i Sisaki.”

6A ra sa qai vakayalomalumalumutaki ira, ko ira na turaga ni Isireli kei na tui; a ra sa kaya, “Sa yalododonu ko Jiova.”

7Ia ni sa raica ko Jiova ni ra sa vakayalomalumalumutaki ira, sa qai yaco mai na vosa i Jiova kivei Semaia, ka kaya, “Era sa vakayalomalumalumutaki ira; au na sega ni vakarusai ira, ia ka'u na vakabulai ira malua; ena sega talega ni sovaraki ki Jerusalemi na noqu cudru e na liga i Sisaki.

8Ia era na nona bobula; me ra kila kina na kenai valavala ni qaravi au, kei na kenai valavala ni qaravi ira na veimatanitu ni veivanua.”

9 1Tui 10.16,17; 2Vei 9.15,16 A sa lako mai ko Sisaki na tui Ijipita me kabai Jerusalemi, ka tokitaka nai yau ni vale i Jiova, kei nai yau ni nona vale na tui; a sa kauta kecega. Sa kauta tani talega nai sasabai koula ka cakava ko Solomoni.

10A sa vakaisosomitaka ko Reopoama na tui e nai sasabai parasa, ka solia vei ira na nodra turaga nai vakatawa era sai vakatawa-ni-katuba ni nona vale na tui.

11Ia ni sa la'ki curu na tui ki na vale i Jiova, sa lakova nai sasabai ko ira nai vakatawa, ka kauta tale ki na vale ni vakatawa.

12Ia ni sa vakayalomalumalumutaki koya, sa suka tani mai vua na cudru i Jiova, a sa sega kina ni vakarusai koya sara. Ia sa kune talega eso na ka vinaka e Juta.

Na Mate i Reopoama

13A sa vakataudeitaki koya ko Reopoama na tui e Jerusalemi, ka sa veiliutaki kina. Sa vasagavulu ka dua na yabaki i Reopoama ni sa buli me tui, a sa lewa mai Jerusalemi ka yabaki tinikavitu, na koro ka digitaka ko Jiova mai na nodra veiyavusa kecega na Isireli, me vakatikora kina na yacana. Ia na yaca i tinana ko Neema, na yalewa i Amoni.

14Ka sai valavala ca ga ko koya, ni sa sega ni vagolea na yalona me qaravi Jiova.

15Ia na cakacaka i Reopoama, a kenai vakatekivu, kei na kenai otioti, sa sega li ni volai e nai vola sa baleta na veitabatamata erau vola ko Semaia na parofita, kei Ito na daurai? A sa sega ni mudu na nodrau veivala ko Reopoama kei Jeropoama.

16A sa moce vata kei ira na nona qase ko Reopoama, a sa bulu e na koro i Tevita; a sa buli me tui ko Apaija na luvena, me kenai sosomi.