Dauveilewai 15 - Ai Vola Tabu (Vakadewa Makawa Vakavoutaki 2021)（FRV21）

Vakadrukai Ira na kai Filisitia ko Samisoni

1Ia e muri, e na vula ka tamusuki kina na witi, sa la'ki raici watina ko Samisoni, ka kauta e dua na luve ni me; ka kaya, “Au na lako vua na watiqu ki loqi.” Ia sa sega ni vakadonui koya me curu kina ko tamana na yalewa.

2A sa kaya na tama ni yalewa, “Au sa vakadinata ni ko sa cati koya, ka'u a soli koya kina vua na nomu i tau. Sa sega li ni matavinaka cake ko tacina? Me nomu mada ga ko koya, me kenai sosomi.”

3A sa kaya vei ira ko Samisoni, “E na gauna oqo, kevaka ka'u na vakacacani ira na kai Filisitia, au na sega ni beitaki kina.”

4A sa mani lako ko Samisoni, ka toboka e tolu na drau na fokisi, ka saumaka me veiuturi na buidra ka qai bukuya vata vakayayarua, ka vauca e dua na buka e na maliwa ni buidra yarua kecega.

5A sa tutuvaka na buka, ka biuti ira me ra lako e loma ni nodra sila na kai Filisitia sa sega ni tamusuki, ka sa vakama na veibinibini sila, kei na sila sa sega ni tamusuki, kei na veiwere ni olive.

6A ra sa taro na kai Filisitia, “O cei sa cakava na ka oqo?” A ra sa kaya, “Ko Samisoni, na vugona na kai Timinaca, ni sa kauta ko koya na watina, ka solia ki na nona i tau.” A ra sa lako cake na kai Filisitia, ka vakamai koya na yalewa kei na tamana e na bukawaqa.

7A sa kaya vei ira ko Samisoni, “Dou sa cakava na ka oqo, ia ka'u na sauma mada ga vei kemudou, ka'u na qai vakacegu.”

8A sa mokuti ira e nai moku levu, ka sa ravusebetaki ira; ka sa lako sobu ko koya ka la'ki tiko e na yasa ni vatu ko Etami.

9A ra sa lako cake na kai Filisitia, ka tiko vakaivalu mai Juta, ka sa robota na vanua mai Liai.

10A ra sa kaya ko ira na yavusa i Juta, “A cava dou sa lako cake mai kina vei keimami?” A ra sa kaya, “Keimami sa lako cake mai me vesuki Samisoni, me keimami cakava vua me vaka sa cakava vei keimami ko koya.”

11Sa qai lako sobu e lewe tolu na udolu na tamata vei ira na yavusa i Juta, ki na yasa ni vatu ko Etami, ka ra sa kaya vei Samisoni, “Ko sa sega li ni kila ni ra sa lewai keda na kai Filisitia? Ia a cava na ka oqo ko sa cakava vei keimami?” A sa kaya vei ira ko koya, “Au sa cakava ga vei ira me vaka na ka era sa cakava vei au.”

12A ra sa kaya vua, “Keitou sa lako sobu mai me vesuki iko, me soli iko ki na ligadra na kai Filisitia.” A sa kaya vei ira ko Samisoni, “Dou bubului mada vei au ni dou na sega ni mokuti au koi kemudou.”

13A ra sa kaya vua, “E sega, ia keitou na vesuki iko matua ga, ka soli iko ki na ligadra. Ia keitou na sega sara ni vakamatei iko.” A ra sa qai vesuki koya e na dali vou e rua, ka kauti koya cake mai na vatu.

14Ni sa yaco ko koya ki Liai, era sa kaikaila na kai Filisitia ni ra sa la'ki tavaki koya. A sa curumi koya vakaukauwa na Yalo i Jiova, a sa vuki na dali e ligana me vaka na wa sa kama yavu, a sa tasere mai na ligana na kenai vesu.

15A sa kunea ko koya e dua na sui-ni-galegale ni asa ka se qai mate ga, ka sa dodoka na ligana, ka taura, ka mokuta kina e le dua na udolu na tamata.

16A sa kaya ko Samisoni,

“E na sui-ni-galegale ni asa,

sa veibinibini cake nai binibini,

e na sui-ni-galegale ni asa

ka'u sa mokuta e le dua na udolu na tamata.”

17Ia ni sa vosa oti ko koya, sa qai biuta tani e ligana na sui-ni-galegale, ka vakayacana na tikina ko ya ko Rama i Liai.

18A sa mate e na viagunu, ka sa tagi vei Jiova, ka kaya, “O ni sa ia na veivakabulai levu oqo e na ligaqu na nomuni tamata, ia ka me'u na qai mate beka e na viagunu, ka bale ki na ligadra ko ira sa sega ni cili?”

19A sa kavidalaka na vatu mai Liai na Kalou, a sa vure mai kina na wai, a sa gunu ko koya, ka sa lesu tale mai na yalona, ka sa bula mai. O koya sa vakatoka kina na yacana ko Eni-akori, ko ya mai Liai, ka yacova na siga oqo.

20A sa lewai ira na Isireli ko koya, e na nodra gauna na kai Filisitia, ka yabaki ruasagavulu.